وڭتۇستىك كورەيانىڭ پحەنتحەك قالاسىندا پوليتسيا شەتەلدىكتەردىڭ قاتىسۋىمەن بولعان جاپپاي توبەلەستى تەرگەپ جاتىر. تەرگەۋ بارىسىندا قازاقستان مەن قىرعىزستان ازاماتتارى اراسىنداعى توپتىق جانجال نۇسقاسى تەكسەرىلىپ جاتىر، دەپ حابارلايدى kznews.kz Yonhap اگەنتتىگىنە سىلتەمە جاساپ حابارلايدى.
پوليتسيا 20 جاستاعى ەكى ەر ادامدى - رەسەي ازاماتى مەن قىرعىزستان ازاماتىن ۇستاعان. ولار توبەلەس كەزىندە جاراقات الىپ، اۋرۋحاناعا جەتكىزىلدى. الايدا ۇستالعاندار شابۋىلعا قاتىسقانىن جوققا شىعارىپ، كوشەدە كەلە جاتقاندا سوققىعا جىعىلعانىن ايتىپ وتىر.
قالعان قاتىسۋشىلار وقيعا ورنىنان قاشىپ كەتكەن. ولاردىڭ كىم ەكەنى جانە ازاماتتىعى ازىرگە انىقتالعان جوق. پوليتسيا قازاقستاندىقتاردىڭ دا جانجالعا قاتىسى بولۋى مۇمكىن دەگەن نۇسقانى تەكسەرىپ جاتىر. الايدا ازىرگە مۇنى راستايتىن ناقتى دەرەك جوق.
پوليتسيا نە تەكسەرىپ جاتىر؟
وقيعا ورنىنان اعاش تاقتايلار مەن بەيسبول تاياعى تابىلعان. ال تەمىر شەگەلەر قاعىلعان قارۋ قولدانىلدى دەگەن اقپارات ازىرگە راستالمادى.
پوليتسيا بەينەباقىلاۋ كامەرالارىنداعى جازبالاردى جانە جانجالعا قاتىسۋشىلار ءمىنۋى مۇمكىن كولىكتەردىڭ نومىرلەرىن زەرتتەپ جاتىر. تەرگەۋشىلەر سونداي-اق ولاردىڭ الدىن الا كەزدەسۋگە كەلىسكەن-كەلىسپەگەنىن جانە كولىكتى كىم ۇسىنعانىن انىقتاۋعا تىرىسۋدا.
«قوعامدا الاڭداۋشىلىق تۋىنداماۋى ءۇشىن كۇدىكتىلەردى ۇستاعانعا دەيىن قىلمىستىڭ الدىن الۋعا باعىتتالعان ارنايى شارالارعا قولدا بار بارلىق قىزمەتكەردى جۇمىلدىرامىز»، - دەدى پوليتسيا وكىلى.
ەگەر شابۋىلعا قاتىسقانى دالەلدەنسە، كىنالىلەر بەس جىلعا دەيىن باس بوستاندىعىنان ايىرىلۋى نەمەسە 10 ميلليون ۆون، شامامەن 3,39 ميلليون تەڭگەگە دەيىن ايىپپۇل تولەۋى مۇمكىن. ال وسى جاعدايعا بايلانىستى دەنە جاراقاتىن كەلتىرگەنى انىقتالسا، جازا ءبىر جىلدان ون جىلعا دەيىن باس بوستاندىعىنان ايىرىلۋى ىقتيمال.
قىلمىستىق جازادان بولەك، شەتەل ازاماتتارىنا وڭتۇستىك كورەيادان دەپورتاتسيالانۋ قاۋپى دە بار. بۇل ماسەلەنى كوشى-قون ورگاندارى ءىستىڭ ءمان-جايى مەن ولاردىڭ ەلدە بولۋ مارتەبەسىن ەسكەرە وتىرىپ قارايدى. ازىرگە ۇستالعانداردى ەلدەن شىعارۋ تۋرالى شەشىم قابىلدانعان جوق.