ق ر زاڭنامالارىندا پاتەر ىشىندە، بالكوندا، لودجيادا تەمەكى شەگۋگە تىيىم سالىنباعان. سايكەسىنشە ونىڭ ءتۇتىنى، ءيىسى كورشىڭىزدىڭ پاتەرىنە كىرىپ، جايسىزدىق تۋدىرسا دا دالەلدەۋ قيىنعا تۇسەدى.
- بالكوندا تەمەكى شەگۋ مەن تەمەكى تۇقىلىن سىرتقا لاقتىرۋ - ەكى بولەك ماسەلە. بالكوندا تۇرىپ تەمەكى شەگۋگە ارنايى تىيىم سالىنباعان. بۇل قۇقىق بۇزۋ بولىپ سانالمايدى. الايدا تەمەكى تۇقىلىن بالكوننان، لودجيادان نەمەسە تەرەزەدەن سىرتقا لاقتىرۋعا تىيىم سالىنادى. بۇل ءورت قاۋىپسىزدىگى تالاپتارىن بۇزىپ، باسقا ادامداردىڭ ءومىرى مەن مۇلكىنە قاۋىپ ءتوندىرۋى مۇمكىن. ق ر اكىمشىلىك قۇقىق بۇزۋشىلىق تۋرالى كودەكسىنىڭ 410-بابى بويىنشا ءورت قاۋىپسىزدىگى تالاپتارىن بۇزعانى ءۇشىن اكىمشىلىك جاۋاپكەرشىلىكتى قاراستىرىلعان. ناقتى قانداي جازا قولدانىلاتىنى قۇقىق بۇزۋدىڭ ءمان-جايىنا جانە زاڭنىڭ ءتيىستى نورماسىنا بايلانىستى انىقتالادى. جەكە تۇلعالارعا العاشقى كەزدە ەسكەرتۋ جاسالىپ، قۇقىق بۇزۋ قايتالانعان جاعدايدا 20 ا ە ك مولشەرىندە ايىپپۇل سالىنادى، - دەدى اقتوبە وبلىستىق ت ج د باسپا ءسوز قىزمەتى.
كوپقاباتتى تۇرعىن ۇيدە كورشىلەر اراسىنداعى داۋ-داماي، قۇقىق بۇزۋ «تۇرعىن ءۇي قاتىناستارى تۋرالى» زاڭى اياسىندا دا رەتتەلەدى. ءبىراق بۇل زاڭدا دا شىلىم يىسىنە قاتىستى اشىق ايتىلماعان.
- «تۇرعىن ءۇي قاتىناستارى تۋرالى» زاڭىڭ 36-بابىنا سايكەس پاتەردىڭ مەنشىك يەسى سانيتاريالىق، ەكولوگيالىق جانە وزگە دە تالاپتاردى ساقتاۋعا مىندەتتى. الايدا تەمەكى تۇتىنۋ تالاپتارىنىڭ ساقتالۋىن باقىلاۋ جانە اكىمشىلىك شارا قولدانۋ تۇرعىن ءۇي ينسپەكتسياسىنىڭ قۇزىرەتىنە جاتپايدى. بۇل ماسەلە بويىنشا جەرگىلىكتى پوليتسيا قىزمەتىنە جۇگىنۋ ۇسىنىلادى، - دەپ حابارلادى اقتوبە قالالىق تۇرعىن ءۇي ينسپەكتسياسى.
اقتوبە وبلىستىق پ د باسپا ءسوز قىزمەتىنىڭ حابارلاۋىنشا، اكىمشىلىك قۇقىق بۇزۋشىلىق تۋرالى كودەكستىڭ 441-بابى سايكەس كوپقاباتتى ۇيلەردىڭ ورتاق كەڭەستىگى، ونىڭ ىشىندە كىرەبەرىستە، پودەزدە شىلىم شەگۋگە بولمايدى. سونداي-اق ق ر «حالىق دەنساۋلىعى جانە دەنساۋلىق ساقتاۋ جۇيەسى تۋرالى» زاڭىندا دا ۇيلەردىڭ كىرەبەرىسى تىيىم سالىنعان اۋماققا جاتادى. ال ەپيدەميولوگتار بولسا مۇنداي سۇراق قۇزىرەتىنە كىرمەيتىنىن ايتتى.
بۇعان دەيىن حابارلاعانىمىزداي، الەمدە 1,7 ميلليونعا جۋىق ادام «ەرىكسىز شىلىم شەگۋدىڭ» قۇربانى بولدى. بۇل كەلەڭسىز جايتتىڭ زاردابىن تارتقانداردىڭ تورتتەن بىرىنەن استامى - قورعانسىز بالالار. 2023 -جىلى ولاردىڭ سانى شامامەن 767 ميلليون ادامعا جەتكەن.