استانا. KAZINFORM - گونكونگتاعى اۋكسيوندا ەجەلگى كوگۋرە پاتشالىعىنىڭ التىن ءمورى 1,39 ميلليون دوللارعا ساتىلدى. بۇل باستاپقى باعادان توعىز ەسە جوعارى ءارى تاريحي جادىگەرلەر اراسىندا رەكوردتىق كورسەتكىش، دەپ جازادى UzA اگەنتتىگى.
ءموردىڭ بيىكتىگى - 2,8 س م، سالماعى - 88 گرام. جىلقى پىشىنىندە جاسالعان. مالىمەتتەر بويىنشا، بۇل ءمور قىتايدىڭ جيڭ اۋلەتى تاراپىنان كوگۋرە پاتشالىعىنا ديپلوماتيالىق سىيلىق رەتىندە بەرىلگەن بولۋى مۇمكىن.
بۇل ءموردىڭ كوگۋرەمەن بايلانىستى العاشقى بەلگىلى ءمور رەتىندە تاريحي ماڭىزى بار. ەگەر ول شىنايى بولسا، كورەيا مەن قىتاي اراسىنداعى ەجەلگى قارىم-قاتىناستار تۋرالى ماڭىزدى اقپارات بەرە الادى.
Фото: China Guardian Auctionsكورەي تاريحشىلارى مورگە قاتىستى تەرەڭ عىلىمي زەرتتەۋلەر جۇرگىزۋدى قولدايدى. ءبىراق ءمور كورەيالىق ەمەس جەكە كوللەكسيونەردىڭ قولىنا ءتۇسىپ كەتكەندىكتەن، بۇل مۇمكىندىكتەن ايىرىلدى، دەيدى ماماندار.
ريزابەك نۇسىپبەك ۇلى
«قازاق ءتىلى مەن ادەبيەتى» ماماندىعىنىڭ ماگيسترى.
2009 -جىلدان بەرى "قازاقپارات" حالىقارالىق اقپارات اگەنىتتىگىندە قىزمەت اتقارادى.
"قازاقپارات" حالىقارالىق اقپارات اگەنتتىگىن دامىتۋعا قوسقان ۇلەسى ءۇشىن جانە ەلىمىزدىڭ اقپارات سالاسىنا سىڭىرگەن ەڭبەگى ءۇشىن «كۇمىس بىتىكشى» مەدالىنىڭ يەگەرى.
حالىقارالىق، رەسپۋبليكالىق جىر ءمۇشايرالارىنىڭ جۇلدەگەرى.