ەكونوميكادا پروينفلياتسيالىق فاكتورلار ساقتالىپ وتىر - ۇلتتىق بانك

استانا. KAZINFORM - ەكونوميكادا پروينفلياتسيالىق فاكتورلار ساقتالىپ وتىر. بۇل تۋرالى ۇلتتىق بانك ءتوراعاسى تيمۋر سۇلەيمەنوۆ ايتتى.

«ۇلتتىق بانكتىڭ اقشا-كرەديت ساياساتى كوميتەتى بازالىق مولشەرلەمەنى 14,75 پايىزعا دەيىن تومەندەتۋ تۋرالى شەشىم قابىلدادى. بۇل شەشىمدە ناقتى دەرەكتەر مەن جاڭارتىلعان بولجامدار ەسكەرىلدى. ماكروەكونوميكالىق كورسەتكىشتەردىڭ بولجامدارىن جاڭارتۋمەن قاتار ينفلياتسيا تاۋەكەلدەرىنىڭ باعالاۋى دا تۇزەتىلدى. جىلدىق ينفلياتسيا باياۋلاپ كەلەدى. دەگەنمەن، ونىڭ باياۋلاۋ قارقىنى دا تومەندەدى. بۇل ءبىزدىڭ بولجامىمىزبەن سايكەسەدى. ينفلياتسياعا قاتىستى حالىق كۇتۋلەرىنىڭ ءۇش اي قاتارىنان تومەندەۋى - ءبىز ءۇشىن وڭ بەلگى. الايدا، ينفلياتسيانىڭ ورنىقتى بولىگىندەگى كورسەتكىشتەر ءالى دە جوعارى. بۇل باعا تۇراقتىلىعىن قامتاماسىز ەتۋ شارالارىن جالعاستىرۋدى قاجەت ەتەدى»، - دەدى ول ۇلتتىق بانكتە وتكەن بريفينگىدە.

ونىڭ اتاپ وتۋىنشە، ەكونوميكادا پروينفلياتسيالىق فاكتورلار ساقتالىپ وتىر. ولاردىڭ ىشىندە تۇتىنۋشىلىق سۇرانىس، فيسكالدىق ىنتالاندىرۋ جانە جوعارى ينفلياتسيالىق كۇتۋلەر بار. سىرتقى ورتادا جاھاندىق ينفلياتسيانىڭ باياۋلاعانى سەزىلەدى. وعان ەلدەردىڭ مونەتارلىق ساياساتى جانە ەنەرگيا كوزى مەن ازىق-تۇلىك باعاسىنىڭ تومەندەۋى ىقپال ەتۋدە. كەيبىر ايماقتارداعى لوگيستيكا ماسەلەلەرى جانە رەسەي مەن قىتايداعى ينفلياتسيانىڭ قارقىن الۋى الاڭداۋشىلىق تۋعىزادى.

«ىشكى سۇرانىس كورسەتكىشتەرىندە، ينفلياتسيالىق كۇتۋلەردە بايقالاتىن ۇردىستەر، سونداي-اق بيۋجەت ساياساتى پارامەترلەرىندەگى جانە سىرتقى جاعدايداعى بەلگىسىزدىك ۇستامدى قاتاڭ اقشا-كرەديت شارتتارىن ساقتاۋدى تالاپ ەتەدى. ءبىزدىڭ باستى مىندەتىمىز - ورتا مەرزىمدە ينفلياتسيانى 5 پايىزعا دەيىن تومەندەتۋ»، - دەدى تيمۋر سۇلەيمەنوۆ.