كونگرەسمەندەر ترامپتىڭ يزرايل-يران قاقتىعىسىنا ارالاسۋ وكىلەتتىگىن شەكتەۋگە تىرىسىپ وتىر

استانا. KAZINFORM - ا ق ش- تا رەسپۋبليكاشىلدار مەن دەموكراتتاردىڭ ءبىر توبى تاياۋ شىعىستا سوعىستى باستاماس بۇرىن اكىمشىلىكتەن كونگرەستىڭ ماقۇلداۋىن الۋدى تالاپ ەتەتىن قارارعا داۋىس بەرۋگە نيەتتى، دەپ حابارلايدى NBC News.

جاڭادان پايدا بولعان كواليتسيا پرەزيدەنت دونالد ترامپتىڭ كونسەرۆاتيۆتى جاقتاستارىن، سونداي-اق اسىرەسە كونگرەستىڭ رۇقساتىنسىز ا ق ش- تىڭ شەتەلدىك قاقتىعىستارعا قاتىسۋىنا قارسى شىققان پروگرەسسيۆتى دەموكراتتاردى بىرىكتىرىپ وتىر.

قارجىلىق ماسەلەلەردە ترامپقا قارسى تۇرۋدان قورىقپاعان وكىلدەر پالاتاسىنىڭ مۇشەسى (كەنتۋككي شتاتىنان رەسپۋبليكاشىل)، ليبەرتاريان توماس مەسسي وكىلدەر پالاتاسىنىڭ مۇشەسى (كاليفورنيا شتاتىنان دەموكرات) رو حاننامەن بىرىگىپ، جانجالعا كەز كەلگەن ماعىنالى جولمەن كىرىسپەس بۇرىن اكىمشىلىكتەن كونگرەستىڭ ماقۇلداۋىن الۋدى تالاپ ەتەتىن سوعىس وكىلەتتىكتەرى تۋرالى قارار بويىنشا داۋىس بەرۋگە كۇش سالۋعا تىرىسادى.

- بۇل ءبىزدىڭ سوعىس ەمەس. ءتىپتى ەگەر سولاي بولسا دا، كونگرەسس مۇنداي ماسەلەلەردى ءبىزدىڭ كونستيتۋتسياعا سايكەس شەشۋى ءتيىس، - دەپ جازدى توماس مەسسي X الەۋمەتتىك جەلىسىندە.

ونىڭ مالىمدەمەسى پروگرەسسيۆتى دەموكراتتاردىڭ، سونىڭ ىشىندە نيۋ-يوركتەگى وكىل الەكساندريا وكاسيو- كورتەس پەن ميچيگانداعى راشيدا تلايبتى قوسا العاندا، زاڭ جوباسىن قولداۋعا ۋادە بەرۋىنە اكەلدى.

- مەن بۇل قاراردى قولداۋ مۇمكىندىگىن اسىعا كۇتەمىن. امەريكالىق حالىق مۇندايعا ەندى الدانبايدى. بىزگە يراكتاعى «جاپپاي قىرىپ-جوياتىن قارۋ» تۋرالى وتىرىك ايتىلدى، ول ميلليونداعان ادامنىڭ ءومىرىن جالماپ، تاعدىرىن وزگەرتتى. ترامپ كونگرەسستە داۋىس بەرىلمەيىنشە سوعىس باستاي المايدى، - دەدى راشيدا تلايب، - دەپ مالىمدەدى راشيدا تلايب.

مەسسي مەن حاننا بۇل شارانى بىرنەشە كۇن ىشىندە پالاتانىڭ تولىق داۋىس بەرۋىنە ءماجبۇر ەتەتىن ارتىقشىلىق قارار رەتىندە ەنگىزۋدى جوسپارلاپ وتىر. ترامپپەن تىعىز بايلانىس ورناتقان لۋيزيانا وكىلى، سپيكەر مايك دجونسون بۇل ارتىقشىلىقتى جويۋ مۇمكىندىگىنە يە بولۋى مۇمكىن، ويتكەنى بۇل اسكەري وكىلەتتىك تۋرالى قارار.

كاپيتوليدە ۆيردجينيا شتاتىنان دەموكرات، سەناتور تيم كەين ترامپتىڭ ا ق ش- تىڭ يرانمەن سوعىسۋعا ءبىرجاقتى تارتۋىنا توسقاۋىل قويۋ ارەكەتتەرىنە جەتەكشىلىك ەتىپ وتىر.

- مەن يزرايل مەن يران اراسىنداعى اسكەري قيمىلداردىڭ سوڭعى شيەلەنىسۋى قۇراما شتاتتاردى تاعى ءبىر بىتپەيتىن قاقتىعىسقا اپارۋى مۇمكىن دەپ الاڭدايمىن. امەريكا حالقى تاياۋ شىعىستاعى تاعى ءبىر بىتپەيتىن سوعىسقا اسكەر جىبەرۋگە مۇددەلى ەمەس، - دەپ حابارلادى تيم كەين.

مەسسي مەن حاننا ا ق ش- تىڭ يەمەندەگى سوعىسقا قاتىسۋىن شەكتەۋگە ۇمتىلعان ترامپتىڭ ءبىرىنشى اكىمشىلىگى كەزىندە دە وسىنداي قاراردىڭ بىرلەسكەن اۆتورلارى بولعان. ترامپ وكىلدەر پالاتاسى مەن سەنات قابىلداعان قارارعا قول قويعان جوق، ءبىراق اقىرى ا ق ش اسكەرىنىڭ بەلسەندى ءرول اتقارۋ تالپىنىسىنان باس تارتتى.

بۇعان دەيىن ەۋروپالىق ديپلوماتيا باسشىسى كايا كاللاس ترامپ اكىمشىلىگىن يران-يزرايل قاقتىعىسىنا اسكەري تۇرعىدا ارالاسۋدان ساقتاندىرعانىن جازعان بولاتىنبىز.