كومىرگە كەزەك: وسكەمەندە قارا وتىندى ارزان باعامەن الۋعا ءوتىنىش قابىلداۋ باستالدى

وسكەمەن. KAZINFORM - وسكەمەندە الەۋمەتتىك كومىرگە الدىن الا ءوتىنىش قابىلداۋ باستالدى، دەپ حابارلايدى Kazinform ءتىلشىسى.

جىل سايىن كۇزدىڭ قازان جانە قاراشا ايلارىندا قالاداعى كومىر تۇيىقتارىندا ۇزىن-سونار كەزەك قالىپتاسادى. سونىڭ الدىن الۋ ءۇشىن الەۋمەتتىك باعامەن ساتىلاتىن قارا وتىندى الۋعا ءوتىنىشتى قابىلداۋ ەرتە باستالىپ وتىر.

الەۋمەتتىك تۇرعىدا وسال ساناتتاعى وتباسىلاردى كومىرمەن ۋاقتىلى قامتاماسىز ەتۋ ءۇشىن قالا اكىمدىگى، «قاراجىرا» كومىر كەن ورنىنىڭ باسشىلىعى جانە «اۋعانستان سوعىسى ارداگەرلەرى مەن مۇگەدەكتەرى ۇيىمى» قوعامدىق بىرلەستىگى اراسىندا ءۇشجاقتى مەموراندۋم جاسالدى. وسىنىڭ اياسىندا جەر ۇيلەردە تۇراتىن جانە قالا ماڭىنداعى اۋىلداردىڭ حالقىنا كومىردى - تونناسىنا 15700-16200 تەڭگە ارالىعىندا ساتىپ الۋعا مۇمكىندىك بەرىلمەك.

- حالىق قارا وتىندى ءتورت كومىر تۇيىعىنان الا الادى. وتىنىشتەر تۇرعىلىقتى مەكەنجايى بويىنشا ورتالىق اۋماقتىق باسقارۋ بولىمشەلەرىندە قابىلدانادى، - دەپ حابارلادى وسكەمەن قالاسى اكىمدىگىنەن.

وسىلايشا، كومىرگە ءوتىنىشتى ەرتەرەك بەرۋ - كۇزگى سۋىق باستالعان كەزدە كەزەك پەن وتىن تاپشىلىعىنىڭ الدىن الادى.

الەۋمەتتىك كومىرگە از قامتىلعان جانە كوپبالالى وتباسىلار، تىل ەڭبەككەرلەرى مەن وزگە دە الەۋمەتتىك ساناتتاعى ازاماتتار ۇمىتكەر بولا الادى. ولار ءۇشىن كومىر باعاسى ءار تونناسىنا ورتا ەسەپپەن 500 تەڭگەگە ارزان.

ايتا كەتەيىك، بۇل جوبا وسكەمەندە 2007-جىلدان بەرى جۇزەگە اسىرىلىپ كەلەدى.

ەسكە سالساق، قازاقستاندا كومىر وندىرۋشىلەردى قايتا وڭدەۋگە مىندەتتەيتىنى حابارلانعان بولاتىن.