كولىگىڭىزدى توقتاتقان ساقشى قانداي قۇجاتتاردى كورسەتۋگە مىندەتتى - اكىمشىلىك پوليتسيا جاۋابى

استانا. KAZINFORM - ءى ءى م اكىمشىلىك پوليتسيا كوميتەتىنىڭ ءتوراعاسى قايسار سۇلتانبايەۆ ورتالىق كوممۋنيكاتسيالار قىزمەتىندە وتكەن باسپا ءسوز ءماسليحاتىندا كولىك توقتاتۋعا نەگىز بولاتىن پوليتسيا قۇجاتتارى تۋرالى تۇسىنىكتەمە بەردى.

«جول ءجۇرىسى تۋرالى» زاڭنىڭ 52-بابىندا كولىك قۇرالىن توقتاتۋدىڭ نەگىزدەرى مەن ءتارتىبى، سونداي-اق پوليتسيانىڭ ءىس-قيمىل رەتتىلىگى بەلگىلەنگەن.

ماسەلەن، جەدەل الدىن الۋ ءىس-شارالارىن جۇرگىزۋ كولىك قۇرالىن توقتاتۋ ءۇشىن نەگىز بولىپ تابىلادى. ودان كەيىن پوليتسيا قىزمەتكەرى جاقىنداپ، ءوزىن تانىستىرىپ، قاجەت بولسا جۇرگىزۋشىگە قىزمەتتىك كۋالىگىن كورسەتىپ، توقتاتۋ سەبەبىن تۇسىندىرۋگە مىندەتتى.

ەگەر جۇرگىزۋشىنىڭ زاڭ تالاپتارىن نەمەسە جول ەرەجەلەرىن بۇزۋى سەرتيفيكاتتالعان ارنايى تەحنيكالىق قۇرالدارعا تىركەلسە، جۇرگىزۋشىگە تانىسۋ ءۇشىن ماتەريالداردى كورسەتەدى.

پوليتسيا قىزمەتكەرى اتالعان ارەكەتتەردى ورىنداعاننان كەيىن جۇرگىزۋشى قىزمەتكەردىڭ زاڭدى تالاپتارىن ورىنداۋعا مىندەتتى.

وسىلايشا، پوليتسيا قىزمەتكەرىنىڭ مىندەتتەرىندە جۇرگىزۋشىگە جەدەل- پروفيلاكتيكالىق ءىس-شارانى وتكىزۋ تۋرالى قۇجاتتى ۇسىنۋ تۋرالى تالاپ جوق»، - دەدى كوميتەت باسشىسى.

قايسار سۇلتانبايەۆ كەيبىر بلوگەرلەردىڭ جول ساقشىلارى جۇرگىزەتىن جەدەل ءىس-شارالار كەستەسىن كوپشىلىككە جاريالاۋى قىلمىسكەرلەرگە قولايلى ەكەنىن ايتادى.

«مۇنداي ارەكەت اسىرەسە ۇرلىق، ەسىرتكى، براكونەرلىك سياقتى قىلمىستاردى توقتاتۋعا كەدەرگى كەلتىرەدى. قاراپايىم تىلمەن ايتقاندا، ءبىز كەستەنى كوپشىلىككە جاريالاۋ ارقىلى قىلمىسكەرلەرگە جوسپارىمىزدى الدىن الا حابارلايمىز دەگەن ءسوز.

پروفيلاكتيكا ماقساتىمەن وتكىزىلەتىن ءىس-شارالاردى ءبىز اقپارات قۇرالدارىندا الدىن الا جاريالايمىز. مىسالى، «ابايلاڭىز- بالالار!»، «اۆتوبۋس»، «زورلىق-زومبىلىقسىز 16 كۇن»، «مەن سەنىڭ ۋچاسكەلىك ينسپەكتورىڭمىن» جانە باسقالار»، - دەدى ءى ءى م وكىلى.

اۆتور
ەسىمجان ناقتىباي