كولىگىڭىزگە اعاش نە جول بەلگىسى قۇلاسا نە ىستەۋ كەرەك

استانا. KAZINFORM - كولىگىڭىزگە اعاش نە جول بەلگىسى قۇلاپ زاقىمداعان جاعدايدا شەككەن شىعىنىڭىز وتەلۋگە مىندەتتى.

مۇنداي جاعدايدا نە ىستەۋ كەرەك

ەڭ الدىمەن، قۇلاعان اعاشتى نەمەسە جول بەلگىسىن ءوز بەتىڭىزشە الىپ تاستاۋعا تىرىسپاڭىز. بۇل قاۋىپتى بولۋى مۇمكىن: اعاش ۇستىڭىزگە قۇلاپ، جاراقات الىپ قالۋىڭىز ىقتيمال. سونىمەن قاتار، پوليتسيا قىزمەتكەرى كەلگەنگە دەيىن اعاشتى، بەلگىنى نەمەسە كولىكتى جىلجىتۋعا تىيىم سالىنادى.
بىردەن «102» نومىرىنە قوڭىراۋ شالىڭىز. پوليتسيا قىزمەتكەرلەرى اعاشتىڭ نەمەسە بەلگىنىڭ قۇلاۋ فاكتىسىن تىركەپ، كولىگىڭىزگە قوسىمشا زاقىم كەلتىرمەستەن كەدەرگىلەردى كاسىبي تۇردە الىپ تاستايتىن ارنايى قىزمەتتەرگە اقپارات بەرۋى كەرەك.

پوليتسيا قىزمەتكەرىن كۇتىپ تۇرعان كەزدە:

- وقيعا ورنىن ءتۇرلى قىرىنان فوتوعا جانە ۆيدەوعا ءتۇسىرىپ الىڭىز؛
- ەڭ دۇرىسى كۇنىن، ساعاتىن، كوورديناتى مەن اۋا رايىن تىركەيتىن ارناۋلى قوسىمشالاردى پايدالانعان ءجون. ماسەلەن، Timestamp Camera نەمەسە Auto Stamper (Android پەن iOS قوسىمشالارىندا قولجەتىمدى).
- اعاشتى مۇقيات قاراپ شىعىڭىز، ەگەر زاقىمدانۋ بەلگىلەرى (كەۋىپ قالعان، شىرىگەن، كۇيگەن نەمەسە كەسىلگەن بولۋى مۇمكىن) شولىپ قاراعاندا كوزگە بايقالسا، ونى تاسپالاپ الۋدى ۇمىتپاڭىز. سىزگە جەرگىلىكتى بيلىك ونى الدىن الا الىپ تاستاۋى كەرەك ەكەنىن دالەلدەۋ قاجەت بولۋى مۇمكىن. ەگەر كورشىلەرىڭىز اكىمدىككە ەسكى نەمەسە زاقىمدالعان اعاشتى كەسىپ تاستاۋ تۋرالى ءوتىنىش بىلدىرگەنىن راستايتىن قۇجات بولسا، وندا ءتىپتى جاقسى.

ەگەر جول بەلگىسى ماشيناڭىزدىڭ ۇستىنە قۇلاپ كەتسە، وندا ونىڭ قالاي بەكىتىلگەنىن تەكسەرۋىڭىز كەرەك - ەگەر جول بەلگىسى جەردە تۇرسا، وندا ىرگەتاستاسىن سۋرەتكە ءتۇسىرىپ الىڭىز، ال ەگەر ول انكەرگە نەمەسە ارنايى قۇرىلىمعا ورناتىلعان بولسا، وندا بەتىتىلىپ تۇرعان بولىگىن تاسپالاعانىڭىز ءجون. بەكىتكىشتەردى جانە جول بەلگىسى بەكىتىلگەن ورىندى ءتۇسىرىپ الۋ ماڭىزدى.
ورىن العان جايت فاكتىسى قۇجاتتالىپ، كولىگىڭىزدەن اعاش نەمەسە جول بەلگىسى الىنىپ تاستالعاننان كەيىن، بارلىق شىعىنىڭىزدى تىركەي باستاڭىز - بۇل سوما تولىعىمەن وتەلۋى ءتيىس. ەگەر كولىگىڭىز جۇرۋگە جارامسىز بولىپ قالىپ، تاسىمالداۋعا تۋرا كەلسە، وندا ەۆاكۋاتوردان چەك سۇراڭىز، ودان كەيىن كولىگىڭىزدى جوندەيتىن تەحنيكالىق قىزمەت كورسەتۋ ورتالىعىنان دا قۇجات الۋدى ۇمىتپاڭىز. تاۋەلسىز باعالاۋشى ىزدەڭىز (ارنايى كومپانياعا حابارلاسىپ، ال ولاردىڭ ءنومىرىن جارناما سايتتارىنان الا الاسىز نەمەسە ساقتاندىرۋ كومپانياسى وكىلىنەن بايلانىس ءنومىرىن سۇراپ الۋعا بولادى.

ساقتاندىرۋ

اۆتوكولىكتى مىندەتتى ساقتاندىرۋ مۇنداي شىعىنداردى تولىعىمەن وتەي المايدى. مۇنداي جاعدايدا سىزگە تەك ەرىكتى ساقتاندىرۋ جانە ونىڭ جازاتايىم وقيعا ەكەنىن دالەلدەۋ عانا كومەكتەسە (فوتوسۋرەتتەر مەن بەينەتاسپالار كادەگە جارايدى) الادى. ەگەر جاقىن جەردە بەينەباقىلاۋ كامەرالارى ورناتىلعان بولسا، وندا ولاردان الىنعان كادرلار دا كەرەمەت كومەكشى بولار ەدى.

ەگەر ساقتاندىرۋ شىعىندارىڭىزدى تولىق وتەمەسە، وندا تۇرعىلىقتى جەرىڭىز بويىنشا اكىمدىككە جۇگىنۋىڭىز قاجەت. مۇنى ونلاين رەجيمىندە جاساۋعا نەمەسە جازباشا ءوتىنىش جازۋعا بولادى. سىزگە جاسىل جەلەكتەردى كۇتىپ ۇستاۋعا جانە قورعاۋعا كىم جاۋاپتى ەكەنىن انىقتاۋ قاجەت. كوبىنەسە بۇل جەرگىلىكتى اكىمدىكتىڭ بولىمشەلەرىنىڭ قۇزىرەتىنە كىرەدى. بارلىق جول بەلگىسى دە قالانىڭ مەنشىگىندە. سوڭعى كەزەڭدە سوتقا دەيىنگى تالاپ جازۋ قاجەت. ەگەر ونى ەلەمەسە نەمەسە زالالدى تولەۋدەن باس تارتسا، وندا ءسىز كەلتىرىلگەن زيان مەن زالالدى وتەۋ تۋرالى سوتقا سەنىمدى تۇردە جۇگىنە الاسىز.
سونداي- اق، كولىك قۇرالى جول قوزعالىسى ەرەجەلەرىن بۇزا وتىرىپ تۇراقتا تۇرسا دا، سىزگە كەلگەن شىعىن سوماسىن تولىق كولەمدە تولەۋگە مىندەتتى ەكەنىن قاپەردەن شىعارماڭىز. كولىك دۇرىس تۇرماسا دا اعاش نەمەسە جول بەلگىسى قۇلاماۋى ءتيىس. ارينە، بۇل جاعدايدا ءسىز پوليتسيا شاقىرعان كەزدە قىزمەتكەرلەر ەكى حاتتاما جاسايدى - بىرەۋىمەن قۇلاۋ فاكتىسىن تىركەپ، ال ەكىنشىسىمەن كولىگىڭىزدى دۇرىس قويماعانىڭىز ءۇشىن ايىپپۇل سالادى.

بۇعان دەيىن ءۇيدى ءورت، ءزىلزالا، ۇرلىق پەن جوعارى قاباتتاعى كورشىنىڭ سۋ اعىزىپ جىبەرۋىنەن ساقتاندىرۋعا بولاتىنىن جازعان ەدىك.

قازىرگى كەزدە ەلىمىز بويىنشا ساقتاندىرۋ تاريفى (ءبىر كومپانيانىڭ ءارتۇرلى ايماقتاعى باعاسى) شامالاس بولىپ كەلەدى. ساقتاندىرۋشىلار جىلجىمايتىن مۇلىكتىڭ نارىقتاعى باعاسىنىڭ %0,1 - %0,35 ارالىعىنداعى باعانى ۇسىنادى. ماسەلەن پاتەر باعاسى 30 ميلليون تەڭگە بولسا، ساقتاندىرۋ كومپانياسى قىزمەتى ءۇشىن جىلىنا 24-90 مىڭ تەڭگە ارالىعىندا اقى سۇرايدى.

سونىمەن قاتار تاياۋدا جاريالانعان ق ر ۇلتتىق بانكىنىڭ ەكونوميكالىق شولۋى» باسىلىمىندا دۇلەي ءزىلزالالاردان ساقتاندىرۋدا قازاقستان ءۇشىن تۇركيا تاجىريبەسى قولايلى ەكەندىگى ايتىلعان.

اۆتور

مارلان جيەمباي