كولىكتى تەحنيكالىق تەكسەرۋ سالاسىندا زاڭ بۇزۋ دەرەكتەرى كوبەيدى - مينيسترلىك

استانا. KAZINFORM - جىل باسىنان بەرى اۆتوكولىكتى تەحنيكالىق تەكسەرۋ قاعيدالارىن ورىنداماعان وپەراتورلارعا 270 حاتتاما تولتىرىلدى. بۇل تۋرالى ق ر كولىك مينيسترلىگىنەن ءمالىم بولدى.

«قازىرگى كەزدە تەحنيكالىق قاراپ-تەكسەرۋدىڭ وپەراتورلارى جاعىنان زاڭ بۇزۋ دەرەكتەرى كوبەيگەنى بايقالىپ وتىر. ماسەلەن، 2023 -جىلى 12 ايدا مەحانيكالىق كولىك قۇرالدارى مەن ولاردىڭ تىركەمەلەرىن مىندەتتى تەحنيكالىق قاراپ-تەكسەرۋدەن وتكىزۋ كەزەڭدىلىگىن بەكىتۋ تۋرالى ق ر ينۆەستيتسيالار جانە دامۋ ءمينيسترىنىڭ م. ا. 2015 -جىلعى 26-ناۋرىزداعى № 329-بۇيرىعىن بۇزعانى ءۇشىن وپەراتورلارعا 394 اكىمشىلىك حاتتاما تولتىرىلىپ، 8 ميلليون تەڭگە سوماسىندا ايىپپۇل ءوندىرىلدى. سونىمەن قاتار، 2024 -جىلدىڭ 4 ايىندا مىندەتتى تەحنيكالىق قاراپ-تەكسەرۋدى ۇيىمداستىرۋ جانە جۇرگىزۋ قاعيدالارىن بۇزعانى ءۇشىن 270 اكىمشىلىك حاتتاما تولتىرىلىپ، 7,8 ميلليون تەڭگە ايىپپۇل ءوندىرىلدى»، - دەلىنگەن كولىك مينيسترلىگىنىڭ Kazinform اگەنتتىگىنە بەرگەن جاۋابىندا.

ۆەدومستۆو مالىمەتىندە بۇل تۇرعىدا كولىكتى تەحنيكالىق تەكسەرۋدەن وتكىزەتىن وپەراتورلار 10 - 50 ا ە ك دەڭگەيىندەگى ايىپپۇلدى تولەپ، ودان ءارى زاڭ بۇزۋدى جالعاستىرىپ وتىرعانى ايتىلعان.

«وسى سەبەپتى اكىمشىلىك قۇقىق بۋزۋشىلىق تۋرالى كودەكستە 616-باپتى بۇزعانى ءۇشىن ايىپپۇلدى 30 - 100 ا ە ك دەيىن كوتەرۋ قاراستىرىلعان»، - دەپ اتالىپ وتكەن مينيسترلىك اقپاراتىندا.

ەسكە سالا كەتەيىك، مامىر ايىنىڭ باسىندا كولىگىن وتىرىك تەحنيكالىق تەكسەرۋدەن وتكىزگەندەرگە ايىپپۇل 370 مىڭ تەڭگەگە دەيىن ءوسۋى مۇمكىن ەكەنى حابارلاندى.

قازىر نارىقتا 950 قا جۋىق وپەراتور كولىكتى تەحنيكالىق تەكسەرۋدەن وتكىزۋ قىزمەتىن كورسەتىپ جاتىر.

اۆتور
رۋسلان عابباسوۆ