كەيبىر زاڭنامالىق اكتىلەرگە جول قاۋىپسىزدىگىن سيفرلاندىرۋ جانە جۇرگىزۋشىلەردى دايارلاۋ سالاسىنداعى كاسىپكەرلىك قىزمەت ماسەلەلەرى بويىنشا وزگەرىستەر مەن تولىقتىرۋلار ەنگىزۋ كوزدەلگەن زاڭ جوباسىن تالقىلاۋ بارىسىندا دەپۋتات ىشكى ىستەر مينيسترلىگىنە اتالعان ماسەلەگە قاتىستى ساۋال جولدادى.
- ءبىر جىل بۇرىن قوعامدا كولىكتى قىزدىرعانى ءۇشىن ايىپپۇل سالۋ نورماسى قىزۋ تالقىعا ءتۇستى. ال مىنا زاڭ جوباسىندا ءبىز قىسقى ۋاقىتتا ەلدى مەكەندەردە كولىكتى قىزدىرۋعا تىيىمدى تولىق الىپ تاستاۋدى ۇسىندىق. بۇل رەتتە ءتيىستى بەلگىمەن بەلگىلەنگەن تۇرعىن ايماقتاردا تىيىم ساقتالادى. ءسىز بۇل ۇسىنىسقا قالاي قارايسىز، - دەپ سۇرادى دەپۋتات.
ساۋالعا جاۋاپ بەرگەن ىشكى ىستەر ءمينيسترىنىڭ ورىنباسارى سانجار ءادىلوۆ ۆەدومستۆو اتالعان باستامانى قولدايتىندىعىن مالىمدەدى.
ايتا كەتەيىك، «قازاقستان رەسپۋبليكاسىنىڭ كەيبىر زاڭنامالىق اكتىلەرىنە جول قاۋىپسىزدىگىن سيفرلاندىرۋ جانە جۇرگىزۋشىلەردى دايارلاۋ سالاسىنداعى كاسىپكەرلىك قىزمەت ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى ءبىرىنشى وقىلىمدا ماقۇلداندى.