ادەتتەگىدەي، كوپشىلىك تولەمدى سوڭعى كۇنگە قالدىرادى. ەگەر بۇگىن ۇلگەرمەي قالساڭىز، ەرتەڭنەن باستاپ قارىز سوماسى كۇن سايىن ءوسىپ وتىراتىنىن قاپەردە ۇستاڭىز. كولىك سالىعى قوزعالتقىش كولەمىنە قاراي ەسەپتەلەدى. ياعني كولىكتىڭ قۋاتى جوعارى بولعان سايىن، تولەم مولشەرى دە ارتادى. بيىل بۇل ءتارتىپ وزگەرىسسىز قالدى.
كوپشىلىك ءۇشىن تۇسىنىكسىز جايتتاردىڭ ءبىرى - سالىقتىڭ قالاي ەسەپتەلەتىنى. كۇنتىزبەدە 2026-جىل بولعانىمەن، تولەم وتكەن سالىق كەزەڭىنە، ياعني 2025-جىلعا ارنالعان كورسەتكىشتەر بويىنشا ەسەپتەلەدى. بۇل رەتتە 2025-جىلعا بەلگىلەنگەن ايلىق ەسەپتىك كورسەتكىش - 3932 تەڭگە قولدانىلادى. ال ناقتى سوما كولىكتىڭ قوزعالتقىش كولەمىنە بايلانىستى انىقتالادى.
سالىق ورگاندارى ءار جۇرگىزۋشى بويىنشا تولەم سوماسىن دەربەس ەسەپتەپ، اقپاراتتى بانكتەردىڭ ءموبيلدى قوسىمشالارى ارقىلى push-حابارلاما تۇرىندە جىبەرگەن. ەگەر مۇنداي حابارلاما كەلمەسە، بەرەشەكتى مەملەكەتتىك كىرىستەر كوميتەتىنىڭ رەسمي پورتالىنان تەكسەرۋگە بولادى. سونىمەن قاتار ەسەپتەۋدى ناقتىلاۋ ءۇشىن ونلاين-كالكۋلياتور دا قاراستىرىلعان. مەملەكەتتىك كىرىستەر كوميتەتى تولەمدى كەشىكتىرمەۋگە شاقىرادى.
2-ساۋىردەن باستاپ سالىق تولەمى كەشىكتىرىلگەن ءار كۇن ءۇشىن ءوسىمپۇل ەسەپتەلەدى. ال بەرەشەك ۋاقىتىندا وتەلمەگەن جاعدايدا، زاڭناماعا سايكەس ماجبۇرلەپ ءوندىرىپ الۋ شارالارى قولدانىلادى، - دەپ ەسكەرتتى ۆەدومستۆو.
ساراپشىلاردىڭ ايتۋىنشا، ەڭ باستىسى، تولەمدى سوڭعى كۇنگە قالدىرماۋعا تىرىسىڭىز. سەبەبى ءوسىمپۇل كۇن سايىن قوسىلىپ وتىرادى. ونىڭ مولشەرى ۇلتتىق بانكتىڭ بازالىق مولشەرلەمەسىنە بايلانىستى ەسەپتەلىپ، شامامەن 0,03-0,05 پايىز كولەمىندە وسەدى. مىسالى، كولىك سالىعى 50 مىڭ تەڭگە بولسا، ءبىر كۇن كەشىككەندە شامامەن 15-25 تەڭگە قوسىلادى. ال بىرنەشە اپتا نەمەسە اي وتكەن سايىن بۇل سوما ايتارلىقتاي ۇلعايادى.
الايدا ماسەلە تەك وسىمپۇلمەن شەكتەلمەيدى. كوميتەت مالىمەتىنشە، 10-مامىردان كەيىن بەرەشەك وتەلمەسە، ءىس ماجبۇرلەپ ءوندىرۋ كەزەڭىنە وتەدى.
ەگەر بەرەشەك سوماسى 1 ا ە ك- تەن اسسا، بورىشكەرگە سالىق بۇيرىعى جولدانادى. ول 5 جۇمىس كۇنى ىشىندە ورىندالماعان جاعدايدا، ماتەريال جەكە سوت ورىنداۋشىعا جىبەرىلەدى، - دەپ ءتۇسىندىردى مەملەكەتتىك كىرىستەر كوميتەتى.
مۇنداي جاعدايدا جۇرگىزۋشىلەرگە ءبىرقاتار شەكتەۋ قويىلادى. اتاپ ايتقاندا، بانك شوتتارى مەن مۇلكىنە تىيىم سالىنۋى مۇمكىن. ەگەر بەرەشەك كولەمى 40 ا ە ك- تەن اسسا، ەلدەن شىعۋعا دا شەكتەۋ ەنگىزىلەدى. بۇعان قوسا، سوت ورىنداۋشىلارىنىڭ قىزمەتى ءۇشىن قوسىمشا شىعىندار قاراستىرىلعان.
سوندىقتان جۇرگىزۋشىلەرگە بىرنەشە قاراپايىم نارسەنى ەسكەرگەن ءجون. ەڭ الدىمەن، سالىق بەرەشەگىنىڭ بار-جوعىن الدىن الا تەكسەرىپ العان دۇرىس. كەي جاعدايدا كولىك ساتىلعانىمەن، بازا جاڭارتىلماي، سالىق بۇرىنعى يەسىنە ەسەپتەلۋى مۇمكىن. سونداي-اق تولەم جاساۋ كەزىندە دەرەكتەردى دۇرىس ەنگىزۋ ماڭىزدى. قاتە جىبەرىلسە، تولەم جۇيەدە كورىنبەي قالۋى ىقتيمال.
كولىك سالىعى بويىنشا بارلىق اقپاراتتى eGov Mobile قوسىمشاسىنان نەمەسە بانكتەردىڭ موبيلدى سەرۆيستەرىنەن كورۋگە بولادى.
ال الداعى وزگەرىستەرگە كەلسەك، 2026-جىلدان باستاپ كولىكتىڭ جاسىنا بايلانىستى تومەندەتۋ كوەففيتسيەنتتەرى ەنگىزىلەدى. بۇل ەسكى كولىك يەلەرى ءۇشىن سالىق جۇكتەمەسىن ازايتۋعا مۇمكىندىك بەرەدى. الايدا بۇل نورما بيىلعى تولەمگە ەمەس، 2027-جىلى تولەنەتىن سالىققا قاتىستى بولادى.
el.kz