كولىك جۇرگىزۋ قۇقىعىنان ايىرىلسا دا، رولگە وتىرعان 115 ادام قاماۋعا الىندى

استانا. KAZINFORM - قازاقستاندا سوڭعى بەس كۇندە كولىك جۇرگىزۋ قۇقىعىنان ايىرىلعانىنا قاراماستان، رولگە وتىرعان 245 جۇرگىزۋشى ۇستالدى، دەپ حابارلادى ىشكى ىستەر مينيسترلىگى.

Фото: ЖИ

ۆەدومستۆو مالىمەتىنشە، سوت شەشىمىمەن كولىك جۇرگىزۋ قۇقىعىنان ايىرىلعان كەيبىر ازاماتتار زاڭ تالابىن ەلەمەي، قايتادان رولگە وتىرادى. وسىلايشا ولار وزگە جول قوزعالىسىنا قاتىسۋشىلاردىڭ ءومىرى مەن قاۋىپسىزدىگىنە قاتەر توندىرەدى.

سوڭعى بەس كۇندە پوليتسيا قىزمەتكەرلەرى وسىنداي 245 جۇرگىزۋشىنى انىقتاعان. ولاردىڭ 115 ءى اكىمشىلىك قاماققا الىنسا، 130 نا ايىپپۇل سالىنعان.

سونىمەن قاتار ۇستالعان جۇرگىزۋشىلەردىڭ 245 اۆتوكولىگى دە ارنايى ايىپ تۇراعىنا قويىلدى.

- ءى ءى م ۇستانىمى ايقىن: قۇقىعىنان ايىرىلعان جۇرگىزۋشى كولىك تىزگىنىنە وتىرا المايدى. ەشقانداي ەرەكشەلىك جوق. پوليتسيا مۇنداي جۇرگىزۋشىلەرگە قاتاڭ شارا قولدانادى. بۇل جاي عانا قاعيدا ەمەس. بۇل ادامداردىڭ ءومىرى مەن قاۋىپسىزدىگى، - دەلىنگەن ۆەدومستۆو حابارلاماسىندا.

ىشكى ىستەر مينيسترلىگى جۇرگىزۋشىلەردى جول قوزعالىسى ەرەجەلەرىن ساقتاۋعا جانە سوت شەشىمدەرىن ورىنداۋعا شاقىردى.

ايتا كەتەيىك، بۇعان دەيىن الماتىدا جىل باسىنان بەرى كولىك باسقارۋ قۇقىعىنان ايىرىلعانىنا قاراماستان، قايتادان رولگە وتىرعان 414 جۇرگىزۋشى ۇستالعانى حابارلانعان ەدى. ولاردىڭ بارلىعى سوت شەشىمىمەن كولىك جۇرگىزۋ قۇقىعىنان ايىرىلعان.