كولىك جۋۋ بەكەتتەرىنە سۋدى ۇنەمدەۋ قۇرىلعىسىن ورناتۋ مىندەتتەلىپ جاتىر

 استانا. KAZINFORM - بۇگىن ەلوردادا قالالىق «اتامەكەن» ۇلتتىق كاسىپكەرلەر پالاتاسىنا ءبىر توپ كولىك جۋۋ بەكەتتەرىنىڭ يەلەرى مەن جالعا الۋشىلار جينالدى.

ولارعا ءبىر اي بۇرىن سۋدى ۇنەمدەيتىن ارنايى قۇرىلعى ورناتۋ كەرەكتىگى تۋرالى حابارلاما كەلگەن.

«كولىك جۋۋ بەكەتتەرىنەن سۋدى قايتا پايدالانۋعا ارنالعان قۇرىلعى ورناتۋدى تالاپ ەتىپ جاتىر. قۇرىلعىنى ورناتۋ تۋرالى 2017 -جىلدان باستاپ ايتىلىپ كەلەدى، بيىل تاعى كولىك جۋۋ بەكەتتەرىنىڭ يەلەرىنە قايتا حابارلاما جىبەردىك. بۇگىندە ەلوردادا 50 كولىك جۋۋ بەكەتى ارنايى قۇرىلعىنى قويعان، تاعى 100 شاقتى كولىك جۋۋ بەكەتى بىزگە 1-1,5 جىل ۋاقىت بەر دەپ وتىر. حابارلاندىرۋعا سايكەس قۇرىلعىنى ءبىر ايدىڭ ىشىندە ورناتۋ كەرەك، ارينە ورناتپاعان جاعدايدا سۋدى بىردەن اجىراتىپ تاستامايمىز. كولىك جۋۋ بەكەتتەرىنىڭ يەلەرى جاعدايىن ايتىپ كەلەدى، ءبىز قوسىمشا ۋاقىت بەرەمىز»، - دەدى «استانا سۋ ارناسى» مەكەمەسى باس ديرەكتورىنىڭ ورىنباسارى قانات نۇرماعامبەتوۆ.

ونىڭ ايتۋىنشا، سۋدى ۇنەمدەپ، قايتا پايدالانۋعا ارنالعان قۇرىلعىنىڭ قۇنى ءارتۇرلى، شامامەن 800 مىڭ تەڭگەدەن باستالادى.

«1 جەڭىل كولىكتى جۋۋعا 300 ليتر سۋ كەتەدى، ال قۇرىلعىنىڭ كومەگىمەن 200 ليتر سۋدى قايتا قولدانۋعا بولادى. قۇرىلعىنى ورناتپاعان كولىك جۋۋ بەكەت يەلەرىنە ايىپپۇل باسقا دا جازا قولدانىلمايدى. ءبىزدىڭ ماقسات - سۋدى ۇنەمدەۋگە شاقىرۋ»، - دەيدى ول.

بۇگىندە ەلوردا اۋماعىندا استانا سۋ ارناسى مەكەمەسىندە رەسمي تىركەلگەن 272 كولىك جۋۋ بەكەتى بار.

«بىرىنشىدەن، اينالىمداعى سۋمەن جابدىقتاۋ جۇيەلەرىن ورناتۋ ايتارلىقتاي ينۆەستيتسيا مەن ۋاقىتتى قاجەت ەتەدى. كوپتەگەن اۆتوكولىك جۋۋ بەكەتى يەلەرىنىڭ بۇل تالاپتى ورىنداۋعا جەتكىلىكتى قاراجاتى جوق. ەكىنشىدەن، سۋمەن جابدىقتاۋ جۇيەلەرىن تەحنيكالىق ورناتۋ جانە باپتاۋ بىلىكتى مامانداردىڭ قاتىسۋىن تالاپ ەتەتىن كۇردەلى پروتسەسس. تالاپتاردى ورىنداۋ ءۇشىن ايتارلىقتاي ۋاقىت كەرەك»، - دەيدى استانا قالاسى كاسىپكەرلەر پالاتاسىنىڭ ديرەكتورى قانات الين.

ءوز كەزەگىندە كولىك جۋۋمەن اينالىساتىن كاسىپ يەلەرى اتالعان قۇرىلعىنىڭ قىمبات ەكەنىن جانە ۋاقىت بەرۋدى سۇراپ وتىر.

«الدىمەن قۇرىلعىنى قويۋ ءۇشىن ۋاقىت جانە قاراجات كەرەك. ءيا، بىرنەشە كولىك جۋۋ بەكەتتەرىنىڭ يەسى ورناتقان شىعار، ءبىراق ولار 1-1,5 ميلليون تەڭگەنىڭ ارزان قۇرىلعىسى، ساپالى قۇرىلعى شامامەن 10 ميلليون تەڭگە تۇرادى، ال بىزدە ول كولەمدە قارجى جوق. بىزگە ۋاقىت بەرسىن، سۋبسيديا جاعىن قاراستىرسىن، مۇمكىن قۇرىلعىنى وزدەرى قويىپ بەرەر. مەن كولىك جۋۋ بەكەتىن 10 جىل بويى جالعا الىپ كەلەمىن، ارەندانىڭ باعاسى، جۇمىسشىلاردىڭ ايلىعى، سالىق باسقا دا شىعىندار بار. مەن سۋدى ۇنەمدەۋ قۇرىلعىسىن ورناتۋعا قارسى ەمەسپىن، تەك ۋاقىت كەرەك، سەبەبى ونىڭ سوماسى قوماقتى»، - دەيدى استانالىق كاسىپكەر تولقىن كوپەيەۆا.