كولىك شيناسىنىڭ ەنى قانداي بولۋى كەرەك: بەس نەگىزگى تالاپ

استانا. KAZINFORM - كولىك جۇرگىزۋشىلەرى اراسىندا شينانىڭ ەنىنە قاتىستى سۇراق جيى تالقىلانادى. سەبەبى بىرەۋلەر ونىڭ كەڭ بولعانى دۇرىس دەپ سانايدى. سونىمەن قاتار «ديسكىنى قالاي دۇرىس تاڭداۋ كەرەك؟» دەگەن ساۋال دا وزەكتى.

ەندەشە سولارعا جاۋاپ ىزدەپ كورەيىك.

شينانىڭ ەنى ونىڭ بۇيىرىندەگى ХХХ/ХХ RХХ فورماتىنداعى بەلگىلەۋدىڭ العاشقى ءۇش سيفرى ارقىلى كورسەتىلەدى. ماسەلەن، 185/65R16 ولشەمىندەگى شينانىڭ ەنى - 185 ميلليمەتر. Techinsider مالىمەتىنشە، بۇل كورسەتكىش كەيبىر جۇرگىزۋشىلەر ءۇشىن وتە ماڭىزدى، سەبەبى كەڭ شينا تەمىر تۇلپاردى سپورتتىق كولىككە اينالدىرعانداي كورىنىس بەرەدى.

سويتە تۇرا ساراپشىلار بۇل پارامەتر ماڭىزدى بولعانىمەن، ول تۋرالى قالىپتاسقان پىكىرلەردىڭ ءبارى بىردەي شىندىققا جاناسا بەرمەيدى دەپ وتىر.

شينا تار بولۋى مۇمكىن بە؟

كەيدە جۇرگىزۋشىلەر ساتىپ العان شيناسىنىڭ ەنى كورسەتىلگەننەن تار كورىنەدى دەپ شاعىمدانادى. ءبىراق ءىس جۇزىندە شينا ەنى پروتەكتور ارقىلى ەمەس، تولىق ۇرلەنگەن كەزدەگى ءبۇيىر قابىرعالارىنىڭ ەڭ كەڭ نۇكتەلەرى اراسىنداعى قاشىقتىقپەن ولشەنەدى. ەگەر ايىرماشىلىق بىرنەشە ميلليمەتر بولسا - بۇل قالىپتى جاعداي.

بۇعان ديسك ەنىنىڭ ءارتۇرلى بولۋى سەبەپ. ول شينانىڭ ءبۇيىرىن ازداپ قىسىپ نەمەسە، كەرىسىنشە، كەرىپ جىبەرەدى. سوعان بايلانىستى پروتەكتوردىڭ ناقتى ەنى كوزگە وزگەشە كورىنۋى مۇمكىن.

شينا مەن ديسك ەنى سايكەس كەلمەسە، نە ىستەۋ كەرەك؟

اۆتوساراپشى، «كولەسا داروم» كومپانياسىنىڭ سەرۆيستىك قىزمەتتەرىن دامىتۋ جونىندەگى جەتەكشىسى ادەل نۋرگاليەۆتىڭ سوزىنشە، بۇل - جيى كەزدەسەتىن جاعداي. ءتىپتى ءىس جۇزىندە شينا مەن ديسك ەنى دالمە-ءدال سايكەس كەلۋى سيرەك بولادى.

بۇل قالىپتى قۇبىلىس. سەبەبى شينا ەنى ميلليمەترمەن، ال ديسك ەنى ديۋيممەن ولشەنەدى. ونىڭ ۇستىنە، بۇل كورسەتكىشتەر ءارتۇرلى نۇكتەلەردە ولشەنەدى. سوندىقتان بۇل ارالىق بەلگىلى ءبىر دەڭگەيدە وزگەرىپ وتىرۋى مۇمكىن، - دەيدى ادەل نۋرگاليەۆ.

جالپى العاندا، ءبىر شينا ءۇشىن ديسك ەنى 0,5-1 ديۋيم ارالىعىندا اۋىتقۋى مۇمكىن. ءبىراق شەكتەن تىس ايىرماشىلىق بولماعانى ءجون، ەڭ دۇرىسى، ءوندىرۋشى كورسەتكەن پارامەترلەرگە بارىنشا جاقىن نۇسقانى تاڭداۋ كەرەك.

قاتە تاڭدالسا نە بولادى؟

ەگەر شينا مەن ديسك ەنى سايكەس كەلمەسە، بۇل كولىك جۇرگىزۋ ساپاسىنا اسەر ەتەدى:

شينا ديسككە قاراعاندا تىم كەڭ بولسا، بۇيىرلەرى قىسىلادى. بۇل باسقارۋدى قيىنداتىپ، كولىكتىڭ جولدا «جۇزۋىنە» اكەلەدى. سونىمەن قاتار پروتەكتوردىڭ شەتتەرى تەز توزادى.

ال ديسك تىم كەڭ بولسا، شينا «ۇيشىك» ءتارىزدى ورنالاسادى. بۇل ءجۇرىستى قاتايتىپ، سوققىنى كۇشەيتەدى جانە ديسك زاقىمدانۋ قاۋپىن ارتتىرادى.

شينا كەڭ بولۋى كەرەك پە، الدە تار بولۋى كەرەك پە؟

بۇل جەردە باستى ەرەجە - كولىك ءوندىرۋشىسى كورسەتكەن دياپازوننان شىقپاۋ.

وسى شەكتەۋدىڭ ىشىندە تاڭداۋ جاساۋعا بولادى:

كەڭ شينالار:

ارتىقشىلىقتارى - جولدا جاقسى ءجۇرۋى، بۇرىلىستا تۇراقتىلىق جانە قىسقا تەجەۋ جولى.

كەمشىلىكتەرى - اكۆاپلانينگ قاۋپى جوعارى، جانارماي شىعىنى كوپ، باعاسى قىمبات.

تار شينالار:

ارتىقشىلىقتارى - سۋ مەن لايدا تۇراقتى، جانارمايدى ۇنەمدەيدى، ءجۇرىسى جۇمساق.

كەمشىلىكتەرى - تەجەۋ جولى ۇزارادى، بۇرىلىستا كولىك كوبىرەك ەڭكەيەدى.

ساراپشى ماۋسىمدىق تاڭداۋعا دا نازار اۋدارادى:

جازدا جانە تراسسادا بەلسەندى جۇرگىزۋ كەزىندە ءسال كەڭىرەك شينالاردى تاڭداۋعا بولادى، ال قىستا - قار مەن لايدا جاقسى ءجۇرۋ ءۇشىن تارلاۋ شينالار ءتيىمدى، - دەيدى ادەل نۋرگاليەۆ.