كولىك ءمينيسترى اۋەجايلارعا ينۆەستورلار تارتۋعا قاتىستى تۇسىنىك بەردى

استانا. KAZINFORM - اۋەجايلارعا ينۆەستورلار تارتىلسا دا، بۇل نىساندار مەملەكەتتىك ورگانداردىڭ تولىق باقىلاۋىندا بولا بەرەدى. بۇل تۋرالى ۇكىمەت وتىرىسىنان كەيىنگى باسپا ءسوز ءماسليحاتىندا كولىك ءمينيسترى مارات قارابايەۆ ايتتى.

تىلشىلەر مينيسترگە قوستانايداعى اۋەجايدىڭ اكسيالارىن ساتۋعا قاتىستى سۇراق قويىلدى.

«نە سەبەپتى وسى اۋەجايلاردى قازاقستاندىق كومپانيالاردىڭ باسقارۋىنا بەرمەسكە؟ بۇل رەتتە، قوستانايداعى اۋەجايدىڭ ماسەلەسىنە تۇسىنىك بەرسەڭىز»، - دەپ سۇرادى تىلشىلەر.

ءوز كەزەگىندە م. قارابايەۆ قوستاناي اۋەجايىنا بەلگىلى ءبىر ينۆەستوردىڭ بولۋى نەمەسە ساتىلۋى تۋرالى ءوتىنىش تۇسپەگەنىن ايتتى.

«كەز كەلگەن ءوتىنىش بولسا، ونى ۇكىمەت قاراستىرادى. ءاربىر اۋەجاي ستراتەگيالىق نىسان سانالادى جانە ونى كىمگە بەرۋ شەشىمى ۇكىمەتتىڭ قۇزىرەتىندە. وسىعان دەيىن قوستانايلىق اۋەجايدى ساتىپ الۋ جونىندە ۇسىنىس جاساعانى تۋرالى رەسمي مالىمەت مينيسترلىككە تۇسپەدى. جالپى، ەلدەگى اۋەجايلاردىڭ بارشاسىنا رەت- رەتىمەن ينۆەستور تارتۋ جۇمىسى ءجۇرىپ جاتىر. بۇل تۇرعىدا قازاقستاننان دا، سونداي-اق شەتەلدەن دە تارتىلۋى مۇمكىن. شەتەلدەن ينۆەستوردىڭ كەلۋى زاڭعا قايشى ەمەس. اتاپ ايتقاندا، اۋەجاي مەملەكەتتىك ورگانداردىڭ تولىق باقىلاۋىندا بولا بەرەدى، سەبەبى ول ستراتەگيالىق نىسان سانالادى. نىساننىڭ قۇرىلتايشىسى شەتەلدىك نەمەسە قازاقستان ازاماتى بولسا دا، باقىلاۋدان تىس قالمايدى»، - دەدى ۆەدومستۆو باسشىسى.

ونىڭ ايتۋىنشا، اۋەجايلاردىڭ ينفراقۇرىلىمىن ينۆەستور ەسەبىنەن جاڭارتۋعا كولىك مينيسترلىگى ەرەكشە ەكپىن قويىپ وتىر.

«وسىنىڭ ناتيجەسىندە اۋەجايلار جاڭارتىلىپ، جولاۋشىلارعا ىڭعايلى جاعداي جاسالادى»، - دەدى مينيستر.

بۇدان بۇرىن حابارلانعانداي، قوستاناي اۋەجايى اكسياسىنىڭ 50 پايىزعا جۋىعى اۋكسيونعا شىعارىلدى.

اۆتور

رۋسلان عابباسوۆ