105 شاقىرىمعا سوزىلىپ جاتقان بۇل باعىت جولاۋشىلاردى تالاي جىلدان بەرى ابدەن تيتىقتاتىپ كەلگەن ەدى. قيىن جولدان قاجىعان جۇرت وسكەمەنگە ءۇش ساعاتتا ارەڭ جەتەتىن. 11 ەلدى مەكەندى وبلىس ورتالىعىمەن بايلانىستىراتىن كۇرەجول قاشان تولىق قولدانىسقا بەرىلەدى؟
كولىك جۇرگىزۋشىلەرى ءۇشىن بۇرىن وسكەمەن مەن ريددەردىڭ اراسىنداعى بۇل جولدى ءجۇرىپ ءوتۋ ناعىز ازاپ ەدى. شۇرىق-تەسىك جەردىڭ كوپ بولعانى سونشا، ءتىپتى ونى اينالىپ ءوتۋ دە قيىنعا سوقتى. الەكساندر پوپوۆ سول ەسكى جولدىڭ ءار شۇڭقىرىن جاتقا بىلەتىن. ويتكەنى جۇمىس بابىمەن ەكى قالاعا ءجيى قاتىنايدى. قازىر تاقتايداي جولدى تەز ەڭسەرىپ ءجۇر.
الەكساندر پوپوۆ، ريددەر قالاسىنىڭ تۇرعىنى:
- بۇرىن جولدىڭ ساپاسى تىم ناشار بولدى. سوندىقتان وتە باياۋ جۇرۋگە تۋرا كەلدى. ءسويتىپ، ءۇش-ءۇش جارىم ساعاتتا ارەڭ ءجۇرىپ وتەتىن ەدىك. قازىر مىنە 2 ساعاتتا دىتتەگەن جەرىمىزگە جەتە الامىز.
جۇمىس قارقىنىن باسەڭدەتپەۋ ءۇشىن مۇندا اسفالت ەكى قالادان، وسكەمەن جانە ريددەردەن تاسىمالدانىپ جاتىر. جابىندىنىڭ ءبىرىنشى قاباتى تولىق توسەلىپ ءبىتتى، ال ەكىنشى قاباتىن اياقتاۋعا 40 شاقىرىمداي جەر قالدى. كۇرە جولدى تاقتايداي ەتۋ وڭايعا سوقپادى دەيدى جولشىلار. ويتكەنى جەر بەدەرى كۇردەلى، ونىڭ ۇستىنە توپىراق ىلعالى دا جوعارى. سوندىقتان قايتا-قايتا ءىسىنىپ كەتەتىن ۋچاسكەلەردى باستان اياق قوپارىپ جاڭادان سالۋعا تۋرا كەلگەن.
راميس يبراگيموۆ، مەردىگەر مەكەمە ديرەكتورى:
- اسىرەسە 58-شاقىرىمنان باستاپ ارى قارايعى 14 شاقىرىم جول بولىگىن جوندەۋ قيىنعا سوعىپ، ۇزاققا سوزىلدى. سەبەبى ول ۋچاسكەدەن جەراستى سۋى وتەدى. سونىڭ ءبارىن جويۋ ءۇشىن 70 مىڭ تەكشە مەتر تاس اكەلدىك. سالىنعانىنا 50 جىلدان اسقان سۋ وتكىزۋ قۇبرىلارى دا تۇگەلدەي اۋىستىرىلدى.
جالپى رەسپۋبليكالىق ماڭىزعا يە جولداردا بۇرىن-سوڭدى مۇنداي اۋقىمدى جۇمىس اتقارىلعان ەمەس.
نۇربەك تەمىرحانوۆ، «قازاۆتوجول» ۇ ك ش ق و فيليالىنىڭ ديرەكتورى:
- بۇرىن قارجى تاپشىلىعى كوپ جۇمىسقا كەدەرگى بولدى. شامامەن 20-30 شاقىرىمدى ارەڭ اياقتايتىن ەدىك. ياعني وسىلاي وسكەمەن-ريددەر نەمەسە وسكەمەن- شەمونايحا باعىتى سياقتى اۋقىمدى جوندەۋ جۇرگىزىلىپ كورگەن جوق.
وسىلايشا كوپ كۇتكەن كۇرە جول كۇزدە تولىق اياقتالىپ قولدانىسقا بەرىلەدى، دەيدى ماماندار. مەردىگەر مەكەمەنىڭ جاۋاپكەرشىلىگى دە كۇشەيتىلدى. جاڭعىرتىلعان جول ساپاسىنا بەرەتىن كەپىلدىك مەرزىمى بۇرىنعىداي ەكى جىل عانا ەمەس، 5 جىلعا ۇزارتىلعان.
24.kz