ەكولوگيا مينيسترلىگى قىتايعا 1,5 مىڭ كيىك بەرۋ تۋرالى پىكىر ءبىلدىردى

استانا. KAZINFORM - ەكولوگيا جانە تابيعي رەسۋرستار مينيسترلىگى ورمان شارۋاشىلىعى جانە جانۋارلار دۇنيەسى كوميتەتى قازاقستاننىڭ قىتايعا 1,5 مىڭ باس كيىك بەرەتىنى جونىندە مالىمدەمە جاسادى.

بۇگىن «ورتالىق ازيا-قىتاي» ەكىنشى سامميتى اياسىندا پرەزيدەنت قاسىم-جومارت توقايەۆ قىتاي حالىق رەسپۋبليكاسىنا 1,5 مىڭ كيىك بەرۋ تۋرالى شەشىم قابىلدادى.

- وسىعان بايلانىستى قىتاي تاراپىمەن جانۋارلاردى بەرۋ مەحانيزمى پىسىقتالاتىن بولادى. بۇرىن قىتايدىڭ باتىس بولىگى كيىكتەردىڭ مەكەن ەتۋ ورتاسىنا كىرگەنىن ەسكە سالامىز. الايدا، XIX عاسىردىڭ ەكىنشى جارتىسىندا ادامداردىڭ قارقىندى قونىستاندىرۋىنا بايلانىستى كيىكتەردىڭ مەكەن ەتۋ ورتاسى مەن سانى ايتارلىقتاي ازايدى. بيىلعى جىلدىڭ كوكتەمگى ەسەبى بويىنشا قازاقستانداعى كيىك سانى 3,9 ميلليونعا جەتتى. وسىلايشا 1974 -جىلعى تاريحي ماكسيمۋمىنان (1,2 ميلليون باس) اسىپ ءتۇستى، - دەپ جازىلعان مالىمدەمەدە.

ايتا كەتەيىك، كيىك سانىن رەتتەۋ ءىس-شارالارى كۇزدە باستالۋى مۇمكىن ەكەنى تۋرالى جازعان ەدىك.

كيىك سانىن رەتتەۋگە، اۋلاۋعا قاتىستى عالىمداردىڭ بيولوگيالىق نەگىزدەمەسى ءالى دايىن ەمەس. ءدال وسى قۇجاتقا، سايكەس، كيىكتىڭ بەلگىلى ءبىر سانىن اۋلاۋ ماسەلەسى كوتەرىلەدى.

سونداي-اق، اڭشىلارعا تەك انالىق كيىكتى اتۋعا رۇقسات بەكىتىلۋى مۇمكىن.

اۆتور

ايجان سەرىكجان قىزى