ەكولوگيا ءمينيسترى ورمان شارۋاشىلىعى سالاسىنىڭ قىزمەتكەرلەرىن ماراپاتتادى
استانا. KAZINFORM - كاسىبي مەرەكە - ورمان شارۋاشىلىعى قىزمەتكەرلەرى كۇنى قارساڭىندا قازاقستان رەسپۋبليكاسىنىڭ ەكولوگيا جانە تابيعي رەسۋرستار ءمينيسترى ەرلان نىسانبايەۆ سالا ارداگەرلەرىنە جانە ورمان سالاسىنىڭ ۇزدىك قىزمەتكەرلەرىنە ماراپاتتار تابىس ەتتى.
ق ر ەكولوگيا جانە تابيعي رەسۋرستار مينيسترلىگى باسپا ءسوز قىزمەتىنىڭ حابارلاۋىنشا، ەلىمىزدە ورمان شارۋاشىلىعى قىزمەتكەرلەرىنىڭ كۇنى ءداستۇرلى تۇردە قازان ايىنىڭ ءۇشىنشى جەكسەنبىسىندە اتاپ وتىلەدى.
مينيستر اتاپ وتكەندەي، ەلىمىزدىڭ تابيعاتى مەن ەكوجۇيەلەرىن ساقتاۋدا ورمانشىلاردىڭ ۇلەسى زور. ولار ورمانداردى قورعاپ، قالپىنا كەلتىرىپ قانا قويماي، بيوالۋانتۇرلىلىكتى ساقتاپ، بولاشاق ۇرپاققا تازا اۋا مەن دەنى ساۋ تابيعي ورتا قالدىرۋعا كۇش سالىپ كەلەدى.
ورمان شارۋاشىلىعىنداعى جۇمىس ۇلكەن كۇش-جىگەردى، باتىلدىق پەن جانقيارلىقتى تالاپ ەتەدى. ورمانشىلاردىڭ ارقاسىندا ورماندارىمىز ءالى دە اسەمدىگىمەن، تىرشىلىك كۇش-قۋاتىمەن قۋانتا بەرەدى.
ءمىنسىز ەڭبەگى مەن ماماندىققا دەگەن ادالدىعى ءۇشىن، قازاقستان رەسپۋبليكاسىنىڭ «ەڭبەك ارداگەرى» مەدالىمەن مۇراتبەك مولداش ۇلى مۋجۋبايەۆ، نۇرجان تىلەۋجان ۇلى ىسقاق، ەرەجەپ ەرتاي ۇلى جاناتايەۆ ماراپاتتالدى.
ورمان شارۋاشىلىعى جانە جانۋارلار دۇنيەسى كوميتەتىنىڭ «ەڭبەك سىڭىرگەن ورمان ءوسىرۋشى» قۇرمەتتى اتاعىمەن مۇنايتباس الشەرييەۆ، ماقسات بارلىباي ۇلى جۇمابەكوۆ، سامات ابدوللا ۇلى مۇرتازين، اسحات سەيىت ۇلى كەرتەشيەۆ، ماحامەت قىرعىزحان ۇلى نوعايبايەۆ، اركاديي ماركوۆيچ روديونوۆ، ۆيكتور اندرەيەۆيچ گريبوۆ جانە بولات سلامباي ۇلى چەجيمبايەۆ ماراپاتتالدى.
شارانىڭ سوڭىندا مينيستر، بۇل مەرەكە ورمان شارۋاشىلىعىمەن اينالىساتىن ادامدار ەڭبەگىنىڭ ماڭىزدىلىعىن جانە ولاردىڭ ەلدىڭ ورمان رەسۋرستارىن قورعاۋعا جانە قالپىنا كەلتىرۋگە قوسقان ۇلەسىن اتاپ وتۋگە ارنالعانىن اتاپ ءوتىپ، جينالعاندارعا جۇمىستا تابىسپەن قۇت-بەرەكە تىلەدى.