كولساي كولدەرىنە كەلىپ قونعان تىكۇشاق تۋريستەردى شاڭعا بوكتىردى

استانا. KAZINFORM - كۇتپەگەن جەردەن كولساي كولدەرى توڭىرەگىنە كەلىپ قونعان تىكۇشاقتىڭ ۆيدەوسىن Facebook پاراقشاسىنا سابي بايبۋسينوۆ جاريالادى.

اۆتوردىڭ جازۋىنشا، ۇشۋ اپپاراتى قونام دەگەنشە اينالانىڭ ءبارى شاڭعا كومىلىپ، تاماقتانىپ وتىرعان تۋريستەرگە ۇساق تاستار شاشىراپ، ءتىپتى ءبىر ساۋدا نۇكتەسىنىڭ پاۆيلونى زاقىمدالعان.

«قاتتى اشۋلىمىن. قازىر كولسايدامىن. تاماقتانۋعا كەلگەنىمىز سول ەدى، قورعانىس مينيسترلىگىنىڭ تىكۇشاعى قوناتىن جەر تاپپاعانداي دۇكەندەر مەن ءدامحانالار ورنالاسقان توڭىرەككە قونۋعا ارەكەتتەندى. بۇل مەزگىلدە تۋريستەر تاماق ءىشىپ وتىرعان بولاتىن. اينالانى شاڭ باسىپ كەتتى. ءتىپتى دەمالۋعا كەلگەن شەتەلدىك تۋريستەردىڭ توبەسىنە ءجاي تۇسكەندەي بولدى. بەت-اۋىزدارىنا شاڭ قونىپ، ابىگەرگە ءتۇستى. ءوز ەلىمىز تۋرالى وسىنداي ەستەلىكتەر سىيلاعانىمىز وكىنىشتى»، - دەپ جازدى اۆتور.

اشۋعا بۋلىققان بەينەجازبا اۆتورى ق ر قورعانىس مينيسترلىگىنىڭ باسپا ءسوز قىزمەتىنە سۇراۋ سالعانىن جازىپ، تۇسىنىكتەمە بەرۋىن تالاپ ەتكەن. ونىڭ پىكىرىنشە، بۇل قاۋىپتى جاعداي. ترانسپورت بولعاندىقتان كوپشىلىك ادام دەمالاتىن ورىننان تىس جەردە قونۋ ايلاعى بولۋى ءتيىس.

اۆتور

باقىتگۇل اباي قىزى