كوللەدجدەردە ونلاين وقىتۋ مەن اكادەميالىق ۇتقىرلىق ەنگىزىلەدى

استانا. KAZINFORM - كوللەدجدەر جۇيەسىنە ونلاين وقىتۋدى ەنگىزۋ ۇسىنىلدى. بۇل تۋرالى ءماجىلىستىڭ جالپى وتىرىسىندا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە ءبىلىم بەرۋ جانە بالانىڭ قۇقىقتارىن قورعاۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىن ءبىرىنشى وقىلىمدا تالقىلاۋ كەزىندە وقۋ-اعارتۋ ءمينيسترى عاني بەيسەمبايەۆ ايتتى.

«تەحنيكالىق جانە كاسىپتىك ءبىلىم بەرۋ ۇيىمدارىندا ونلاين وقىتۋ جانە اكادەميالىق ۇتقىرلىق ەنگىزىلەدى. قازىرگى كەزدە ەڭبەك نارىعىنىڭ تالاپتارىنا جاۋاپ بەرەتىن مامانداردى ساپالى دايارلاۋدى ىسكە اسىرۋ ءۇشىن كوللەدجدەر جۇيەسىنە ونلاين وقىتۋدى ەنگىزۋ ۇسىنىلدى. بۇل وزگەرىس وندىرىستەن قول ۇزبەي، كادرلاردى دايارلاۋ ماسەلەسىن شەشۋگە باعىتتالعان جانە ستۋدەنتتەرگە وقۋ مەن ەڭبەك قىزمەتىن ۇيلەستىرە وتىرىپ، جەكە باعدارلامالار بويىنشا وقۋعا مۇمكىندىك بەرۋ كوزدەلگەن»، - دەدى ع. بەيسەمبايەۆ.

ونىڭ ايتۋىنشا، مۇنداي تاجىريبە ا ق ش، كانادا، قىتاي، اۆستراليا جانە ۇلى بريتانيا سياقتى ەلدەردە كەزدەسەدى. بۇل ەلدەردەگى ونلاين وقىتۋ ءبىلىم بەرۋ پروتسەستەرىنىڭ تيىمدىلىگىن ارتتىرعان. ونلاين وقىتۋ فورماتىن ەنگىزۋدىڭ نەگىزگى ماقساتى - كوللەدجدەرگە سالا ساراپشىلارى مەن وزىق تەحنولوگيالاردى تارتا وتىرىپ، ءبىلىم بەرۋ باعدارلامالارىن يكەمدى بەيىمدەۋ، ال ستۋدەنتتەرگە جۇمىستى ۇزبەي-اق ناقتى جاعدايلاردا پراكتيكالىق داعدىلاردى قالىپتاستىرۋعا جاعداي جاساۋ.

«ەكونوميكانى سيفرلاندىرۋ جاعدايىندا ەرەكشە سۇرانىسقا يە IT ماماندىقتارعا باستى نازار اۋدارىلادى. ەلىمىزدە IT سالا سەكتورى دامۋ ۇستىندە - قازىرگى ۋاقىتتا وسى باعىتتار بويىنشا 56 مىڭ ستۋدەنت وقىتاتىن 227 كوللەدج دايىندىقتى جۇرگىزىپ كەلەدى»، - دەدى مينيستر.

بۇدان بۇرىن حابارلانعانداي، اتالعان زاڭ جوباسى اياسىندا جەكەمەنشىك مەكتەپتەردە وقيتىن الەۋمەتتىك وسال وتباسىلاردان شىققان بالالارعا كومەك بەرىلەدى.