كوكتوبەدەگى «دەنساۋلىق جولى» قاشان اشىلادى
الماتى. KAZINFORM - الماتى اكىمى ەربولات دوسايەۆ مەدەۋ اۋدانى تۇرعىندارىمەن كەزدەسۋ بارىسىندا جاياۋ جۇرگىنشىلەرگە ارنالعان دەنساۋلىق جولىنىڭ قۇرىلىسىمەن تانىستى.
الماتى تۇرعىندارىنىڭ «كوكتوبەگە قاتىستى» ءوتىنىشىن ەسكەرە وتىرىپ، قالا اكىمىنىڭ تاپسىرماسى بويىنشا 2023 -جىلدىڭ قازان ايىندا جاياۋ جۇرگىنشىلەرگە ارنالعان دەنساۋلىق جولىنىڭ قۇرىلىسى باستالعان ەدى.
بۇرىن بۇل جول جاياۋ جۇرگىنشىلەردى جول بويىمەن ءجۇرۋ قاجەتتىلىگىن ەسكەرمەي جوبالانعان بولاتىن، سونىڭ سالدارىنان الماتىلىقتار قاۋىپتى جول بويىمەن جۇرۋگە ءماجبۇر بولدى. دەنساۋلىق جولى پايدالانۋعا بەرىلگەن كەزدە بۇل ماسەلە تۇبەگەيلى شەشىلەدى. ساياباققا اپاراتىن جولدىڭ ۇزىندىعى - 1,2 شاقىرىم.
«مەركۋر حولدينگ» ج ش س باس ديرەكتورى ەسەنعالي بايمەنوۆتىڭ سوزىنشە، قازىر سوقپاقتىڭ قۇرىلىسى اياقتالىپ، اسفالت توسەلىپ، شەكارا بەلگىلەرى ورناتىلدى. الداعى ۋاقىتتا ەكى قاراۋ الاڭىن، باسپالداق جولىن سالۋ جانە ورىندىقتار مەن قورشاۋلاردى ورناتۋ جوسپاردا. بۇرىن مۇندا اباتتاندىرىلماعان ۋچاسكە بولعان.
قالا باسشىسى ءبىرقاتار ەلەۋلى كەمشىلىكتى جويۋ كەرەكتىگىن ەسكەرتتى. ول كوكتوبە ساياباعىنا كىرە بەرىستەگى شلاگباۋمدار ماڭىنداعى كەڭىستىكتى جابدىقتاپ، جاياۋ جۇرگىنشىلەر جولىنا جارىق پەن قالا تۇرعىندارى ۇستاپ وتەتىن تۇتقالار ورناتۋ قاجەت ەكەنىن اتاپ ءوتتى.
ەربولات دوسايەۆ مۇندا كەلۋشىلەر مەن تۋريستەر ءۇشىن ىسكە اسىرىلىپ جاتقان جوبانىڭ ماڭىزدىلىعىنا توقتالدى. اسىرەسە، قالا تۇرعىندارىنىڭ قاۋىپسىزدىگى باستى نازاردا ەكەنىن جەتكىزدى.
ەسكە سالايىق، بۇل جوبا جەكە ينۆەستيتسيالار ەسەبىنەن جۇزەگە اسىرىلىپ جاتىر. جالپى، الداعى جىلدارى الماتىدا كوبىرەك قوعامدىق كەڭىستىكتەر پايدا بولادى. ەسەنتاي، ۇلكەن الماتى وزەندەرىنىڭ بويىنداعى جاعالاۋلارعا رەكونسترۋكتسيا جۇرگىزىلەدى. وسى جىلى جاياۋ جۇرگىنشىلەرگە باعدارلانعان ۇزىندىعى 17 شاقىرىم رايىمبەك داڭعىلىن قايتا جاڭعىرتۋ كوزدەلگەن. پۋشكين كوشەسى بويىنشا گوگول كوشەسىنەن رايىمبەك باتىر داڭعىلىنا دەيىنگى ۇزىندىعى 1,1 شاقىرىم جاياۋ جۇرگىنشىلەر ايماعى اباتتاندىرىلادى.
بۇعان دەيىن ەربولات دوسايەۆ «كوكتوبە» تەلەمۇناراسى جازعا قاراي جارىقتاندىرىلاتىنىن ايتقان بولاتىن. قۇرىلىس- مونتاج جۇمىستارى بيىل مامىر-ماۋسىم ايلارىندا اياقتالادى.