كوكتەمگى سۋ تاسقىنىنان 5 ادام قازا تاپتى

استانا. KAZINFORM - كوكتەمگى سۋ تاسقىنىنان 5 ادام قازا تاپتى. بۇل تۋرالى ءى ءى م رەسمي وكىلى شىڭعىس الەكەشيەۆ ايتتى.

«ۇيلەر مەن باسقا دا نىسانداردى سۋ باسىپ، ءدال سونىڭ سالدارىنان ازاماتتاردىڭ قازا بولۋ فاكتىلەرى تىركەلگەن جوق. بۇگىن ب ا ق- تا جانە الەۋمەتتىك جەلىلەردە شىققان وسى ماسەلەگە قاتىستى جاريالانىمدار بويىنشا ءتۇسىندىرىپ وتكىم كەلەدى. جالپى، رەسپۋبليكا بويىنشا كوكتەمگى سۋ تاسقىنى بارىسىندا 5 ءولىم فاكتىسى تىركەلدى. اتىراۋ وبلىسىندا – 4، اقتوبە وبلىسىندا - 1 فاكت. ولاردىڭ اراسىندا كامەلەتكە تولماعان بالالار جوق»، - دەدى ول ورتالىق كوممۋنيكاتسيالار قىزمەتىندەگى بريفينگتە.

ونىڭ اتاپ وتۋىنشە، اتالعان فاكتىنىڭ بارلىعى قاۋىپسىزدىك تالاپتارىنىڭ بۇزىلۋىنا بايلانىستى. ماسەلەن، بىرەۋى ءوز بەتىنشە وزەندى ءجۇزىپ وتپەك بولعان. ال ەندى ءبىرى سۋ تاسقىنىنىن كەيىن، ياعني ەۆاكۋاتسيادان سوڭ قاۋىپتى ايماققا ورالۋعا تىرىسقان. بارلىق فاكتى بويىنشا تەكسەرۋ باستالىپ، تەرگەۋ جۇرگىزىلىپ وتىر.

«ال تۇركىستان وبلىسىندا مۇنداي فاكتى مۇلدەم تىركەلگەن جوق. بۇل جەردە اقتوبە وبلىسىنداعى جاعداي مەڭزەلگەن بولاتىن. وندا كىشكەنتاي بالا ويناپ ءجۇرىپ تاياز سۋعا قۇلاپ، كوز جۇمعان. قاۋىپسىزدىك شارالارىن قاتاڭ ساقتاۋعا، ۋاكىلەتتى ورگانداردىڭ زاڭدى تالاپتارىن ورىنداۋعا، سونداي- اق مەملەكەتتىك ورگانداردىڭ جۇمىسىنا تۇسىنىستىكپەن قاراۋعا جانە ولارعا قول ۇشىن سوزۋعا شاقىرامىز»، — دەدى شىڭعىس الەكەشيەۆ.