كوكجوتەل اسقىنسا باسقا دا اۋرۋلارعا اكەلۋى مۇمكىن

الماتى. KAZINFORM - كوكجوتەل - بۇكىل الەمگە تاراعان ەندەميالىق، زاردابىن ۆاكسينا ارقىلى الدىن الۋعا بولاتىن بالالار اۋرۋى. ول سونداي-اق جوتەلمەن بىرگە جوعارعى تىنىس جولدارىنىڭ باكتەريالىق ينفەكسياسى بولىپ تابىلادى.

بۇل تۋرالى الماتى 36-قالالىق ەمحانانىڭ پەدياتريا ءبولىمىنىڭ مەڭگەرۋشىسى دينارا قايىپوۆا ايتتى.

دارىگەرلەردىڭ ايتۋىنشا، كوكجوتەل بالالار مەن جاسوسپىرىمدەرگە ۇلكەن قاۋىپ توندىرەدى. الايدا، ەرەسەكتەردە اۋرۋدىڭ اسقىنۋى تومەن، سەبەبى، ول بالالىق شاقتا العان ەكپەدەن كەيىنگى يممۋنيتەتتىڭ دامۋىمەن بايلانىستى. ەگەر ەكپە جاسالماسا، ينفەكسيانىڭ اۋىر تۇردە وتەدى.

«كوكجوتەلگە ءتان بەلگىلەر ينفەكسيا جۇقتىرعاننان كەيىنگى 10-14 كۇننەن كەيىن دامي باستايدى. اۋرۋ بىرنەشە دامۋ ساتىسىنان وتەدى. كاتارالدى كەزەڭدە سۋىق تيۋگە ۇقساس بەلگىلەر بايقالادى، ياعني، دەنە ىستىعىنىڭ كوتەرىلۋى، مۇرىننان سۋ اعۋ، تۇشكىرۋ مەن قۇرعاق جوتەل. كەلەسى ساتىسىندا اۋرۋ سپازماتيكالىق جوتەلمەن قارقىندى تۇردە دامي باستايدى. جوتەل ناۋقاستى اسىرەسە تۇنگى جانە تاڭعى ۋاقىتتاردا مازالايدى. شۋلى ىسقىرىقتى سىرىل ەستىلەدى. جوتەل ۇستامالارى اۋانى جۇتۋسىز باستالىپ، دەم العاندا كومەي ىسقىرىعىمەن اياقتالادى. وتتەگىنىڭ جەتىسپەۋىنەن بەت قىزارىپ ىسىنەدى. نارەستەلەردە سپازماتيكالىق جوتەل تىنىس الۋدىڭ توقتاپ قالۋىمەن بىرگە جۇرەدى، جالپى قۇرىسۋ ورىن الۋى مۇمكىن. اۋىرا باستاعاندا قاقىرىقتىڭ جوعارى تۇتقىرلىعىنا بايلانىستى برونح جەتكىلىكسىزدىگى بايقالادى. بالالاردا كوكجوتەلدىڭ بەلگىلەرى ورتا ەسەپپەن 4-6 اپتا بويى بەلسەندى بولادى. ەمدەۋ كەزەڭى 3-4 ايعا دەيىن سوزىلادى، بۇل كەزدە قالدىق جوتەل بىرتە-بىرتە باسىلادى»، - دەيدى دينارا قايىپوۆا.

دارىگەر كوكجوتەلدى الدىن الۋدىڭ ەڭ ءتيىمدى جولى - يممۋندىق جۇيەنى نىعايتۋ، ۆاكسينا الۋ جانە دەر كەزىندە دياگنوز قويۋ ەكەنىن اتاپ ءوتتى. ستاتيستيكا بويىنشا جاسوسپىرىمدەردىڭ @- ى دياگنوزى قويىلماعان كوكجوتەلگە بايلانىستى جوتەلەدى ەكەن. ەرەسەكتەردە بۇل سوزىلمالى جوتەلدىڭ قوزدىرعىش فاكتورى بولىپ تابىلادى. ينفەكسيانىڭ تۇراقتى تۇردە تارالۋى قورشاعان ورتادا بالالار مەن ەرەسەكتەردىڭ اۋرۋدى ارى قاراي جۇقتىرۋعا اكەلەدى.

«ەگەر ءسىزدىڭ بالاڭىزدا كوكجوتەل بەلگىلەرى بايقالسا، اۋرۋحاناعا جاتقىزۋ قاجەت بولۋى مۇمكىن. دارىگەردىڭ شەشىمى ناۋقاستىڭ جاسىنا جانە جاعدايىنا بايلانىستى بولادى. نەگىزگى اسقىنۋ - باكتەريالىق ينفەكسيانىڭ قايتالانىپ دامۋى. كوكجوتەل اسقىنعان جاعدايدا كەلەسى دياگنوزعا اينالۋى مۇمكىن: باكتەريالىق پنيەۆمونيا، وكپەنىڭ كوللاپسى، پليەۆريت، برونحيت، جارىلعان قۇلاق قالقانى، وتيت جانە سينۋسيت، گرىجانىڭ قالىپتاسۋى، قابىرعانىڭ سىنۋى (ەرەسەكتەردە). وسىعان بايلانىستى ۆاكسينا الۋ - اۋىر زارداپتارعا، ءتىپتى ولىمگە اكەلۋى مۇمكىن قاۋىپتى جۇقپالى اۋرۋلاردان قورعانۋدىڭ ءتيىمدى قۇرالى بولىپ تابىلادى. كوكجوتەل - قاۋىپتى اۋرۋ ەكەنىن ەستە ۇستاعان ءجون. ۋاقتىلى ۆاكسينا الۋ جانە دارىگەردەن كەڭەس الۋ - اۋرۋ مەن اسقىنۋدىڭ تارالۋىن بولدىرماۋعا كومەكتەسەدى»، - دەپ قورىتىندىلادى دينارا قايىپوۆا.

اۆتور

دۋمان ارعىنگەلدى