كوكشەتاۋدا سۋ تاسقىنىنا بايلانىستى توتەنشە جاعداي جاريالاندى

 كوكشەتاۋ. KAZINFORM - كوكشەتاۋدا قىلشاقتى وزەنىنىڭ ارناسىنان اسىپ، تۇرعىن ۇيلەردى، الەۋمەتتىك نىسانداردى، كوشەلەر مەن ءۇي اۋلالارىن سۋ باسۋىنا بايلانىستى توتەنشە جاعداي جاريالاندى.

«كوكشەتاۋ قالاسىندا قالىپتاسقان جاعدايعا بايلانىستى، ياعني قىلشاقتى وزەنىندەگى سۋدىڭ دەڭگەيى شامادان تىس كوتەرىلۋى تۇرعىنداردىڭ ءومىر سۇرۋىنە قولايسىزدىق تۋعىزدى. جاعدايدى تۇراقتاندىرۋ ءۇشىن توتەنشە جاعداي ەنگىزىلدى. سونىڭ شەڭبەرىندە كەلتىرىلگەن شىعىن كولەمى انىقتالىپ، كوميسسيا ارقىلى ماتەريالدىق كومەك ماسەلەسى شەشىلەتىن بولادى. سۋ تاسقىنىنان كەلتىرىلگەن زالالداردى جويۋ بويىنشا جەدەل شتاب قۇرىلدى. سۋ باسقان ايماقتارداعى تۇرعىنداردى ەۆاكۋاتسيالاۋ جۇمىستارى جۇرگىزىلۋدە، قازىرگى كەزدە 100 جۋىق ادام ارنايى دايىندالعان ورىندارعا ورنالاستىرىلدى. جەرلەستەرىمە جاعدايدى تۇسىنگەنىڭىز ءۇشىن جانە سۋ تاسقىنىنا قارسى كۇرەستە قولدان كەلگەنشە كومەك كورسەتكەنىڭىز ءۇشىن العىس ايتامىن»، - دەدى قالا اكىمى باۋىرجان عايسا.

ايتۋىنشا، سۋ تاسقىنىنان زارداپ شەككەندەر كوكشەتاۋلىق 87756669908 (ۆاتساپ) تەلەفون ءنومىرى بويىنشا حابارلاسۋعا بولادى.

ايتا كەتسەك، قازىرگى تاڭدا كوكشەتاۋ قالاسىندا سۋ تاسقىنىنان زارداپ شەككەن قالا تۇرعىندارىنا قوعام بەلسەندىلەرى، مەتسەناتتار، ەرىكتىلەر جانە باسقا دا ازاماتتار كومەك قولداۋ كورسەتۋدە.

ەسكە سالايىق، بۇدان بۇرىن كوكشەتاۋدا سۋ تاسقىنىنا بايلانىستى 52 ادام ەۆاكۋاتسيالانعانىن جازعان ەدىك.