اقمولا وبلىسىندا بىردەن ءۇش تاريحي مەرەيتويدى توعىستىراتىن اۋقىمدى مادەنيەت اپتالىعى وتەدى.
بيىل ۇكىلى ىبىراي اتىنداعى اقمولا وبلىستىق فيلارمونياسىنىڭ قۇرىلعانىنا - 80 جىل، شاحمەت قۇسايىنوۆ اتىنداعى اقمولا وبلىستىق قازاق مۋزىكالىق- دراما تەاترى ءوزىنىڭ 30-مەرەيتويلىق ماۋسىمىن اشسا، اقمولا وبلىستىق ورىس دراما تەاترى 50-مەرەيتويلىق ماۋسىمىن باستايدى.
ءۇش ونەر ۇجىمى - وڭىردەگى كاسىبي ونەردىڭ قالىپتاسۋى مەن دامۋىنىڭ جارقىن شەجىرەسىن، ۇرپاقتار ساباقتاستىعىن جانە ۇلتتىق مادەنيەتكە دەگەن ادال قىزمەتتى تانىتاتىن ىرگەلى شىعارماشىلىق ورتالار.
مادەنيەت اپتالىعىنىڭ اشىلۋى 7-قازانعا جوسپارلانعان. بۇل كۇن تولىعىمەن ۇكىلى ىبىراي اتىنداعى اقمولا وبلىستىق فيلارمونياسىنىڭ 80 جىلدىعىنا ارنالادى.
وسى كۇنى فيلارمونيا باسشىلارى مەن سالا ساراپشىلارىنىڭ قاتىسۋىمەن، بەلگىلى اقىن ءارى جۋرناليست بايكال باياديلدىڭ مودەراتورلىعىمەن «تازالىق - مادەنيەتتىڭ باستاۋى» اتتى رەسپۋبليكالىق دوڭگەلەك ۇستەل وتەدى.
سونداي-اق شاراعا قاتىسۋشىلار شىعارماشىلىق سالاعا ماماندار دايارلايتىن اقان سەرى اتىنداعى جوعارى مادەنيەت كوللەدجىنە بارادى.
كۇننىڭ باستى مادەني وقيعاسى - فيلارمونيانىڭ شىعارماشىلىق ۇجىمدارى مەن وركەسترلەرى جانە رەسپۋبليكانىڭ بەلگىلى ونەر جۇلدىزدارى قاتىساتىن گالا-كونسەرت بولماق. كەشتە سەكەن تۇرىسبەك، قايرات بايبوسىنوۆ، ءبىرجان حاسانعاليەۆ جانە ايتقالي جايىموۆ ونەر كورسەتەدى.
8-قازاندا مادەنيەت اپتالىعىنىڭ ەستافەتاسىن شاحمەت قۇسايىنوۆ اتىنداعى اقمولا وبلىستىق قازاق مۋزىكالىق-دراما تەاترى جالعاستىرادى. كورەرمەن نازارىنا مارا بايدجيەۆتىڭ «ون ەكىنشى كۇن» كومەدياسى ۇسىنىلادى. قويىلىمدى قازاقستاننىڭ ەڭبەك سىڭىرگەن قايراتكەرى تولەۋبەك كوڭباي ساحنالاعان.
بۇل كەش قازاقستاننىڭ حالىق ءارتىسى جىبەك باگيسوۆا ءۇشىن دە ەرەكشە بولماق. ونەر يەسى جاڭا ماۋسىمنىڭ پرەمەراسى وتەتىن كۇنى ءوزىنىڭ تۋعان كۇنىن اتاپ وتەدى.
مادەنيەت اپتالىعى 9 قازاندا اقمولا وبلىستىق ورىس دراما تەاترىنىڭ 50-مەرەيتويلىق ماۋسىمىنىڭ سالتاناتتى اشىلۋىمەن قورىتىندىلانادى.
كورەرمەن نازارىنا مۇحتار اۋەزوۆتىڭ شىعارماسى نەگىزىندە ساحنالانعان «ليۋتىي» دراماسى ۇسىنىلادى. قويىلىمنىڭ رەجيسسەرى - تيمۋر كۋلوۆ، كومپوزيتورى - باتىرحان سابىر.
سالتاناتتى كەشكە ەلىمىزدىڭ تانىمال مادەنيەت جانە كينو قايراتكەرلەرى - مەرۋەرت وتەكەشوۆا، اسحات ماەميروۆ، گۇلسينا مەرعاليەۆا جانە اسىلحان تولەپوۆ شاقىرىلعان.
مادەنيەت اپتالىعى وڭىرلىك شىعارماشىلىق ۇجىمداردىڭ كاسىبي الەۋەتىن كەڭىنەن تانىتىپ، ولاردىڭ ەلىمىزدىڭ رۋحاني دامۋىنا قوسىپ وتىرعان ۇلەسىن كورسەتۋگە مۇمكىندىك بەرەدى. سونىمەن قاتار شارا ۇلتتىق ونەر داستۇرلەرىنىڭ زاماناۋي ساحنالىق ونەرمەن ساباقتاستىعىن ايقىنداي تۇسەدى.