سوت شەشىمىمەن وعان 60550 تەڭگە ايىپپۇل سالىندى. بۇعان بلوگەردىڭ Threads جەلىسىندە كوشە اتاۋلارىنا قاتىستى جازبا جاريالاپ، وقىرماندارعا بالاعات سوزدەر ايتۋى سەبەپ بولعان.
قالالىق سوتتىڭ باسپا ءسوز قىزمەتىنىڭ مالىمەتىنشە، اكىمشىلىك ءىس 8-قازاندا قارالعان. سوت بلوگەردىڭ ارەكەتىن اكىمشىلىك قۇقىق بۇزۋشىلىق تۋرالى كودەكستىڭ 434-بابىنىڭ 1-بولىگى بويىنشا سارالاعان.
داۋدىڭ باستالۋىنا بەرداليەۆانىڭ Threads جەلىسىندەگى جازباسى سەبەپ بولعان. ول الماتىداعى لەنين، فۋرمانوۆ، دزەرجينسكي، ميرا جانە كومسومولسكايا كوشەلەرىنىڭ بۇرىنعى اتاۋلارىن اتاپ، ولاردىڭ قازىرگى اتاۋلارىن قولدانۋدان باس تارتقان. بۇعان نارازىلىق بىلدىرگەن وقىرماندارعا بلوگەر بەيادەپ سوزدەرمەن جاۋاپ بەرگەن.
كەيىن ول جاريالانىمى ءۇشىن كەشىرىم سۇراعانىمەن، الەۋمەتتىك جەلى قولدانۋشىلارىنىڭ ءبىر بولىگى ونىڭ كەشىرىمىن قابىلداماعان.
وسى وقيعادان كەيىن Eurasian Fashion Week (EFW) ۇيىمى دا مالىمدەمە جاسادى. ۇيىم بلوگەرمەن بۇدان بىلاي جۇمىس ىستەمەيتىنىن جانە ونىڭ بەينەسى بارلىق بيلبوردتار مەن ەكرانداردان الىنعانىن حابارلادى.