كوشپەندىلەر ويىنىندا قازاقى كادەسىيلارمەن دە ۇلتتىق قۇندىلىقتارىمىزدى تانىتا الامىز - ساتۋشى
استانا. KAZINFORM- دۇنيەجۇزىلىك كوشپەندىلەر ويىندارى اياسىندا قازاقى كادەسىيلارعا شەتەلدىك قوناقتاردىڭ قىزىعۋشىلىعى ارتقان.
بۇل تۋرالى قازاقپارات تىلشىسىنە جارىس الاڭدارىندا قازاقى كادەسىي ساتىپ تۇرعان ماقپال ساحيەۆا ايتىپ بەردى.
- قازاقى كادەسىيعا شەتەلدىك قوناقتاردىڭ قىزىعۋشىلىعى قالاي؟
- ءبىزدىڭ ءوزىمىزدىڭ وتاندىق كومپانيامىز بار. سول كومپانيا وندىرگەن زاتتاردى وسىندا، ياعني 5- دۇنيەجۇزىلىك كوشپەندىلەر ويىنىنا اكەلىپ ساتىپ تۇرمىز. شەتەلدىك قوناقتاردىڭ قىزىعۋشىلىعى جوعارى دەڭگەيدە دەپ سەنىممەن ايتا الامىن. مەن وسى جاقسىلىق ۇشكەمپىروۆ اتىنداعى جەكپە-جەك سارايىندا تۇرعانىما ەكى كۇن بولىپ قالدى. قىزىعا قارايتىندار كوپ. ساتىپ الىپ جاتقاندار دا جوق ەمەس. بۇل جابىق كەشەن بولعاندىقتان ساۋدامىز ءالى قىزا قويعان جوق. ال «قازانات»، «ەتنواۋىل» سياقتى اسپان استىندا كادەسىيدىڭ ساۋداسى قىزىپ تۇر. «ەتنواۋىلدا» تاعى ءبىر دۇكەنىمىز جۇمىس ىستەپ جاتىر. ول جاقتا كەلىپ-كەتۋشى حالىق تا كوپ.
- كادەسىيدىڭ قايسىسىنا سۇرانىس جاقسى بولىپ تۇر؟
- جالپى، ءار تاۋارىمىز ءوز ەرەكشەلىكتەرىمەن قوناقتارىمىزدى قىزىقتىرادى. ەلوردا تورىندەگى 5- دۇنيەجۇزىلىك كوشپەندىلەر ويىنى ۇلتىمىزدىڭ مادەني قۇندىلىقتارىن الەمگە پاش ەتۋگە سەپ بولدى. دۇنيەگە جار سالعان شارا ەلىمىزدىڭ قولونەر شەبەرلەرىنىڭ دە باسىن ءبىر ارناعا توعىستىردى دەپ ايتۋعا بولادى. بۇگىندە شەبەرلەر قاۋىمى قيالدارىنان تۋعان كادەسىيلارى مەن اۆتورلىق بۇيىمدارىنان پايدا تابۋمەن قاتار، مادەنيەتىمىزدى جۇرتشىلىققا تانىتىپ جاتىر. بۇگىنگى تاڭدا ەلىمىزدىڭ تۇكپىر-تۇكپىرىنەن كەلگەن شەبەرلەر استانادا ءوز مۇمكىندىكتەرىن كورسەتىپ وتىر. تەرى، كيىز، اعاش، قىش جانە زەرگەرلىك بۇيىمداردىڭ قايسىسىن ىزدەسەڭىز، سونى وسى جەردەن تابا الاسىزدار.
اۆتور
كۇنسۇلتان وتارباي