كوشپەندىلەر ويىنىندا لايىقتى ونەر كورسەتۋگە تىرىسامىز - وزبەكستاننىڭ سپورت مينيسترلىگى
تاشكەنت. KAZINFORM - وزبەكستان قازاقستاندا وتەتىن V دۇنيەجۇزىلىك كوشپەندىلەر ويىنىنا قاتىسادى، دەپ حابارلايدى Kazinform اگەنتتىگىنىڭ تاشكەنتتەگى مەنشىكتى ءتىلشىسى ءاليحان اسقار.
كوشپەندىلەر ويىنى بيىل قىركۇيەكتە استانا قالاسىندا وتەدى. كورشى ەلدىڭ قۇراماسى دا ايتۋلى الاماننان شەت قالار ەمەس. ول ءۇشىن قازىردەن قىزۋ دايىندىقتى باستاپ كەتكەن. قۇراما مۇشەلەرى جاز ايلارىندا تولىق جاساقتالادى. وعان دەيىن ىشكى باسەكەلەردە ءوزارا كىم مىقتىنى انىقتايدى.
«بۇل جارىسقا وزبەكستاننىڭ سپورت دەلەگاتسياسى ماس-رەستلينگ، كۋراش (كۇرەس - اۆت. )، كوكپار، بەلبەۋ كۇرەسى، ارقان تارتىس جانە ساداق اتۋ سىندى باسەكەلەرگە قاتىسادى دەپ جوسپارلانعان. بۇگىندە كوشپەندىلەر ويىندارىنا دايىندىق قارقىندى ءجۇرىپ جاتىر. وندا لايىقتى ونەر كورسەتۋگە تىرىسامىز»، - دەدى وزبەكستان سپورت مينيسترلىگىنىڭ باس مامانى ءبيبىجان ارالبايەۆا Kazinform ءتىلشىسىنىڭ ساۋالىنا جاۋاپ بەرە وتىرىپ.
ايتا كەتەيىك، كوشپەندىلەر ويىنىنىڭ باعدارلاماسىنا 20 سپورت ءتۇرى ەنگەن. سونىڭ ىشىندە ماس-رەستلينگ، كۇرەس، كوكپار، ارقان تارتىس سياقتى باسەكەلەر وزبەكستاندا دا كەڭ تارالعان. ءتىپتى بۇعان دەيىن ورتالىق ازياداعى ەڭ كونە قالالاردىڭ ءبىرى شاحريسابزدا اۋقىمدى ەتنوسپورت فەستيۆالى ۇيىمداستىرىلعان ەدى. سول شارادا كورشىمىزدىڭ سپورتشىلارى ۇزدىكتەردىڭ ءبىرى اتانعان.
ەسكە سالا كەتەيىك، بۇعان دەيىن كوشپەندىلەر ويىنىنا الەمنىڭ 100 ەلىنەن سپورتشىلار قاتىساتىنىن جازعان ەدىك.
اۆتور
ءاليحان اسقار