كوشپەندىلەر ويىنى: 41 ەلدەن 114 سپورتشى توعىزقۇمالاقتان جۇلدەنى ساراپقا سالادى
استانا. KAZINFORM - V دۇنيەجۇزىلىك كوشپەندىلەر ويىندارىنىڭ توعىزقۇمالاق باسەكەسى استانا قالاسىنداعى «دۋمان» قوناق ۇيىندە باستالدى.
توعىزقۇمالاق ويىنىنان باس تورەشى باۋىرجان تولەگەنوۆتىڭ ايتۋىنشا، الەمنىڭ 41 ەلىنەن كەلگەن 114 سپورتشى جۇلدەگە تالاسىپ جاتىر.
- ويىن شارتىنا سايكەس، ءار ەلدەن 2 ەر جانە 2 ايەل سپورتشى قاتىسۋعا بولادى. جالپى، 41 ەلدەن 114 سپورتشى (65 ەر جانە 49 ايەل) باق سىناپ جاتىر. سپورتشىلار جەكەلەي سىندا جۇلدەگە تالاسىپ، ونىڭ قورتىندىسى بويىنشا كوماندالىق جۇلدەگەرلەر انىقتالادى، - دەپ اتاپ ءوتتى باس تورەشى.
بەكىتىلگەن ەرەجەگە ساي، باسەكەگە 14-75 جاس ارالىعىنداعى سپورتشىلار قاتىسا الادى.
- ازەربايجان، چەحيا جانە تۇركيادان كەلگەن 14 جاسار قاتىسۋشىلار بار. سونداي-اق، زەينەتكە شىققان ەگدە جاستاعى قاتىسۋشىلارىمىز دا كوپ، - دەيدى باۋىرجان تولەگەنوۆ.
ايتا كەتەيىك، قازاقستان قۇراماسى ساپىندا بوستاندىق بەكسۇلتان ( قىزىلوردا وبىلىسى)، اۋەلباي ەرسۇلتان (استانا قالاسى)، قوجاناسىپ اڭساعان (قاراعاندى وبىلىسى) جانە سەرىك قىزى ءمولدىر (اقتوبە وبىلىسى) ەل نامىسىن قورعايدى.
توعىزقۇمالاق ويىنىنىڭ فينالدىق باسەكەسى 11-قىركۇيەكتە وتەدى.
ال جۇلدەگەرلەردى ماراپاتتاۋ شاراسى 12-قىركۇيەك كۇنى ەتنواۋىلدا بولادى.
اۆتور
مۇحتار قاليموللا ۇلى