كوشپەندىلەر ويىندارىنىڭ سالتاناتتى اشىلۋى «استانا ارەنادا» وتەدى
استانا. قازاقپارات - 8-قىركۇيەكتە «استانا ارەنا» ستاديونىندا جىلدىڭ ەڭ اۋقىمدى سپورتتىق شاراسى V دۇنيەجۇزىلىك كوشپەندىلەر ويىندارىنىڭ سالتاناتتى اشىلۋ ءراسىمى وتەدى. قازىرگى ۋاقىتتا عيماراتقا كۇردەلى جوندەۋ جۇمىستارى جۇرگىزىلۋدە.
كوشپەندىلەر ويىندارى ەلوردانىڭ 7 عيماراتىندا وتەدى. قازىر ونىڭ ۇشەۋى - «استانا ارەنا» ستاديونى، «الاۋ» مۇز سارايى جانە يپپودرومدا قايتا جاڭعىرتۋ جۇمىستارى جۇرگىزىلۋدە.
«استانا ارەنا» ستاديونى مەن «الاۋ» مۇز ايدىنىنىڭ رەكونسترۋكتسياسىنا 29 ميلليارد تەڭگە بولىنگەن.
«استانا ارەنا» ستاديونى 2009 -جىلى اشىلعان جانە بۇعان دەيىن رەكونسترۋكتسيا جۇمىستارى جۇرگىزىلمەگەن. مۇندا 30 مىڭنان استام ادام سىيادى. بىلتىر كوشپەندىلەر ويىنىنا دايىندىق ءۇشىن دەمونتاج جۇمىستارى باستالدى، سودان بەرى جوندەۋ جۇمىستارى كەزەڭ-كەزەڭىمەن جۇرگىزىلىپ كەلەدى. مۇندا 10-تامىزعا دەيىن نەگىزگى جۇمىستار اياقتالادى جانە 20-تامىز كۇنى تولىعىمەن پايدالانۋعا بەرىلۋى قاجەت»، - دەدى استانا قالالىق قۇرىلىس باسقارماسى باسشىسىنىڭ ورىنباسارى نۇرداۋلەت قۇربانبەك ۇلى.
قازىرگى ۋاقىتتا «استانا ارەنادا» 500-دەن استام جۇمىسشى كۇنى-ءتۇنى ەكى اۋىسىمدا قارقىندى جۇمىس ىستەۋدە. قۇرىلىس ماتەريالدارى دا - وتاندىق ءونىم، استانا، تەمىرتاۋ، اتىراۋ قالالارىنان جەتكىزىلگەن.
«رەكونسترۋكتسيا بولعاندىقتان، عيماراتتاردىڭ بارلىق فۋنكتسيونالى ساقتالادى، تەك ماتەريالدارى جاڭارتىلىپ، ينجەنەرلىك جەلىلەرى اۋىستىرىلىپ، كەلۋشىلەر مەن سپورتشىلارعا ىڭعايلى بولا تۇسەدى. سىرتتاعى اباتتاندىرۋ، ارلەۋ، ۆيتراجدار قويۋ جانە اعاش ەگۋ جۇمىستارى تولىعىمەن اياقتالىپ قالدى. ىشكى بولىگىندە دە ءار قاباتتا جوندەۋ جۇمىستارى جۇرەدى، ستاديوننىڭ شاتىرى اۋىستىرىلادى. ال گازون كوشپەندىلەر ويىنى اياقتالعان سوڭ اۋىسادى»، - دەپ ءتۇسىندىردى باسقارما وكىلى.
كوشپەلىلەر مادەنيەتىنىڭ بىرەگەي مەرەكەسى سانالعان الەمدىك وقيعا ءداستۇر مەن زاماناۋي جەتىستىكتەردى ناسيحاتتاۋ ماقساتىندا الەمنىڭ تۇكپىر-تۇكپىرىنەن قاتىسۋشىلار مەن كورەرمەندەردىڭ باسىن بىرىكتىرەدى.
الەمدىك سپورت شاراسىنا 89 ەلدەن 2000 نان استام سپورتشى قاتىسادى دەپ كۇتىلىپ وتىر. استانادا وتەتىن دۇنيەجۇزىلىك كوشپەندىلەر ويىندارىندا 21 سپورت تۇرىنەن 97 مەدال جيىنتىعى ساراپقا سالىنادى.
اۆتور
ايجان سەرىكجان قىزى