كوشپەندىلەر ويىندارى: تۇركيادان شىققان ساياحاتشىلار اقتوبەنىڭ تەمىر اۋدانىنا ايالدادى
اقتوبە. KAZINFORM - اقتوبە وبلىسى تەمىر اۋدانىنىڭ اكىمدىگى تۇركيانىڭ انكارا قالاسىنان شىققان ساياحاتشى ەرلى- زايىپتىلاردى اقتوبە-استراحان تاسجولىنان كۇتىپ الدى. ولارعا قۇرمەت كورسەتىپ، ءدام ۇسىندى.
تەمىر اۋداندىق اكىمدىگىنىڭ حابارلاۋىنشا، اۋدان اكىمى سالامات امانبايەۆ تۇرىك ساياحاتشى-بلوگەرلەرى بۋراك دۋران جانە جۇبايى يديل دۋران جانە تۇرىك جۋرناليسى ەنەس يلدىريممەن كەزدەستى.
- كەزدەسۋ بارىسىندا قازاقستان مەن الەم ەلدەرىنىڭ ۇزدىك قولونەر شەبەرلەرىنىڭ كورمە-جارمەڭكەسى، شەبەرلىك ساباقتارى، اقىندار ايتىسى مەن ءتول مادەنيەتىمىزدى پاش ەتەتىن قوسىمشى ءىس-شارالار بارىسى تالقىلاندى. اۋدان باسشىسى بەسىنشى دۇنيەجۇزىلىك كوشپەندىلەر ويىندارى ۇلتتىق سپورت پەن سالاۋاتتى ءومىر سالتىن ناسيحاتتاۋ ماقساتىندا ۇيىمداستىرىلعانىن اتاپ ءوتىپ، اق جول تىلەپ، ءوزىنىڭ ارنايى سىيىن تابىستادى. ءوز كەزەگىندە تۇرىك ساياحاتشى-بلوگەرلەرى قۇرمەت ءۇشىن العىسىن ءبىلدىردى. قوناقتارعا ۇلتتىق تاعامداردان ءدام ۇسىنىلىپ، اۋدان ونەرپازدارى مەن جاستارى سىي- قۇرمەتتەرىن كورسەتتى. ولار اقتوبە- استراحان اۆتوماگيسترالى بويىنداعى بوپاي جول بويى قىزمەت كورسەتۋ ورتالىعىنا ورنالاستى. تەمىر ءوڭىرىنىڭ ەرەكشە تاريحى تانىستىرىلدى، - دەپ حابارلادى تەمىر اۋدانىنىڭ اكىمدىگى.
ەسكە سالساق، بۇعان دەيىن تۇرىك اعايىندار اقتاۋ قالاسىنا ايالدادى.
ولار 8-15-قىركۇيەك ارالىعىندا وتەتىن بەسىنشى دۇنيەجۇزىلىك كوشپەندىلەر ويىندارىنا ارنايى كەلە جاتىر.
اۆتور
التىناي ساعىندىقوۆا