ناقتى ايتار بولساق، 1758-جىلدىڭ (كەي دەرەكتەردە 1759-جىل دەلىنەدى) قىركۇيەك ايىندا ابىلاي حاننىڭ باستاماسىمەن قابانباي باتىر چيڭ يمپەرياسىنىڭ وكىلدەرىمەن ساياسي جانە ساۋدا كەلىسسوزدەرىن جۇرگىزۋ ءۇشىن قازىرگى قىتاي اۋماعىنداعى ءۇرىمجى قالاسىنا بارعان دەلىنەدى. بۇل ساپاردا قىتايمەن ساۋدا قاتىناسىن ورناتىپ، قازاقتاردىڭ چيڭ پاتشالىعىنا جىلقى ساتۋعا قول جەتكىزەدى. قابانباي باتىر باستاعان قازاق دەلەگاتسياسى ۇرىمجىگە 300 دەن استام جىلقى ايداپ بارىپ، ەكى ەل اراسىنداعى العاشقى رەسمي ساۋدا مامىلەسىن جاساعان.
بۇل قازاق-قىتاي اراسىنداعى بەيبىت قارىم-قاتىناس پەن شەكارالىق ماسەلەلەردى رەتتەۋگە باعىتتالعان ماڭىزدى قادام بولعان. قىتايدىڭ ىلە قازاق اۆتونوميالى وبلىسى، توعىزتاراۋ اۋدانىندا «قابانباي شوقىسى» دەپ اتالاتىن بيىك تاۋ شىڭىنىڭ ساقتالۋى دا باتىردىڭ سول وڭىرلەردەگى جورىقتارى مەن ديپلوماتيالىق ميسسيالارىنىڭ ءىزى رەتىندە تاريحتا قالعان دەلىنىپ كەلدى.
تاريحشى الايدا كەيىنگى زەرتتەۋلەر بۇل دەرەكتەردى جوققا شىعارىپ وتىر. بەلگىلى تاريحشى دۇيسەنالى ءابدىلاشىمنىڭ جازۋىنشا، قابانباي باتىر ۇرىمجىگە بارماعان. «قابانباي باتىر ۇرىمجىگە بارعان با... جوڭعارلار جويىلعاننان كەيىن قازاق حاندىعى مەن چيڭ پاتشالىعى 1757-جىلى رەسمي قارىم-قاتىناس ورناتتى. بۇل قازاقتىڭ جىل قايىرۋى بويىنشا سىيىر جىلىنا تۋرا كەلەدى. وسى جىلدىڭ كۇزىندە كەنجەقارا باستاعان ابىلاي مەن ابىلپەيىزدىڭ ەلشىلەرى چيڭ ورداسىنا بارىپ، پاتشامەن ديدارلاسىپ قايتتى. وسىدان كەيىن كوپ وتپەي ەكى ەل اراسىندا ساۋدا-ساتتىق ءىسى قولعا الىندى. باستابىندا ابىلاي مەن ابىلپەيىز ساۋدا بازارى ۇلىڭگىردە (ش ۇ ا ر بۋرىلتوعاي اۋدانىندا ورنالاسقان كول) بولسىن دەگەن وتىنىشتەرىن بىلدىرەدى، بۇعان چيڭ ۇكىمەتى «جەر شالعاي، ساۋدا جاساۋعا قولايسىز» دەگەن ءۋاج ايتىپ، ساۋدا جارمەڭكەسى ەتىپ ءۇرىمجى، ەرەنقابىرعانى بەلگىلەيدى.
ءسويتىپ شيانلۋن جىلناماسىنىڭ 23-جىلى 9-ايدىڭ 17-كۇنى (گريگوريان كۇنتىزبەسى بويىنش 1758-جىلى 29 -قازان) قازاق حاندىعى مەن چيڭ پاتشالىعى ۇرىمجىدە تۇڭعىش رەت ساۋدا جاساستى. بۇل تۋرالى قىتاي جازبالارىندا («平定準噶爾方略 جوڭعارلاردى تىنىشتاندىرۋدىڭ ستراتەگياسى»، «清高宗實錄 شيانلۇڭ پاتشانىڭ وردا كۇندەلىگى») بىلاي حاتتالعان: نۋسان قاتارلىلاردىڭ مالىمدەۋىنشە، قازاقتىڭ قابانبايى بۋكۋچاحاننىڭ (布庫察罕 بۇعىشاعان؟) ۇلىن ادام شىعارىپ جەتكىزۋمەن بىرگە، 300 دەن استام جىلقى ايداتىپ، 9 -ايدىڭ 17-كۇنى ۇرىمجىدە ساۋدالاعان. ال «清代西北民族貿易史 چيڭ داۋىرىندەگى باتىس تەرىستىكتەگى ۇلتتاردىڭ ساۋدا تاريحى» اتتى كىتاپتا، نۋسان مەن يۋندە: «حالحا جاساعىنىڭ قورعاۋشىسى باتىر مەن سولون شياۋسيسياوى سوليلار قابانبايدىڭ ۇلى ەدىگە مەن ءىنىسى تومتاي (تۋماتاي) قاتارلى 57 ادامدى باستاپ، ءمىنىس كولىكتەرىمەن قوسا جيىنى 380 نەشە جىلقىنى ايداپ، 9-ايدىڭ 17-كۇنى ۇرىمجىگە جەتتى» دەپ مالىمدەدى دەلىنگەن. قاي دەرەككوزىن الساق تا، قابانبايدىڭ ۇرىمجىگە بارماعانى اڭعارىلادى»، - دەپ جازعان تاريحشى ءوزىنىڭ facebook پاراقشاسىندا.