مۇنداي ولجانى بىردەن ءوز قاجەتىنە جاراتۋعا بولا ما؟ زاڭگەر نۇرسۇلتان ورىنبەكوۆ بۇل سۇراققا جاۋاپ بەردى، دەپ حابارلايدى kznews.kz.
بۇعان دەيىن «سامۇرىق-قازىنا» ا ق باسقارما ءتوراعاسى نۇرلان جاقىپوۆ پەن «قازاقستان تەمىر جولى» ۇ ك» ا ق باسشىسى ەلجاس وتىنشيەۆتىڭ ۇستالعانى تۋرالى اقپارات تاراعان ەدى. كەيىن استاناداعى تۇرعىن ءۇي كەشەنىنىڭ ماڭىنا دوللار تولى بىرنەشە شابادان لاقتىرىلعانى ايتىلدى. وسى وقيعادان سوڭ الەۋمەتتىك جەلىدە اقشا تاۋىپ العان ادام ونى زاڭدى تۇردە يەمدەنە الا ما دەگەن ساۋال قىزۋ تالقىلاندى.
زاڭگەر نۇرسۇلتان ورىنبەكوۆتىڭ ايتۋىنشا، كوشەدەن اقشا نەمەسە باعالى زات تاۋىپ العان ادام ونى بىردەن ءوز مەنشىگىنە اينالدىرا المايدى. بۇل ماسەلە ازاماتتىق كودەكستىڭ 245-بابىمەن رەتتەلەدى.
«كوشەدەن اقشا تاۋىپ العان ادام ونى بىردەن ءوز مەنشىگىنە الا المايدى. اقشانىڭ كولەمى، قانداي ۆاليۋتادا ەكەنى نەمەسە ونىڭ قۇندى زات بولۋى بۇل ءتارتىپتى وزگەرتپەيدى. زاڭعا سايكەس، جوعالعان زاتتى نەمەسە اقشانى تاۋىپ العان ادام الدىمەن ونىڭ يەسىنە حابارلاپ، قايتارۋعا مىندەتتى. ەگەر اقشانىڭ يەسىن انىقتاۋ مۇمكىن بولماسا، ىشكى ىستەر ورگاندارىنا نەمەسە جەرگىلىكتى اكىمدىككە حابارلاۋى كەرەك»، - دەيدى زاڭگەر.
ماماننىڭ سوزىنشە، تابىلعان اقشانى ەشكىمگە حابارلاماي الىپ كەتۋ زاڭ تالاپتارىن بۇزۋ بولىپ سانالادى. اسىرەسە ءىرى كولەمدەگى قاراجات تابىلعان جاعدايدا بىردەن پوليتسيا شاقىرعان دۇرىس. سەبەبى ول اقشا قانداي دا ءبىر قىلمىستىق ىسكە قاتىستى زاتتاي دالەلدەمە بولۋى مۇمكىن.
«مىسالى، 10 مىڭ تەڭگە نەمەسە استاناداعى سوڭعى جاعدايداعىداي سەگىز شابادانعا سالىنعان 100 مىڭ دوللار تابىلسا، ءبىرىنشى كەزەكتە پوليتسيا شاقىرىپ، اقشانى ەسەپتەتىپ، ءتيىستى ورگانعا تاپسىرۋ كەرەك. ويتكەنى بۇل جەردە اقشانىڭ شىعۋ تەگىن انىقتاۋ ماڭىزدى»، - دەپ ءتۇسىندىردى نۇرسۇلتان ورىنبەكوۆ.
التى ايدان كەيىن اقشانى وزىڭىزگە الۋعا بولا ما؟
ازاماتتىق كودەكستىڭ 245-بابىنا سايكەس، تابىلعان اقشا تۋرالى پوليتسياعا نەمەسە اكىمدىككە رەسمي حابارلانعاننان كەيىن التى اي ىشىندە ونىڭ يەسى انىقتالماسا، اقشانى تاۋىپ العان ادام ونى ءوز مەنشىگىنە راسىمدەي الادى.
الايدا التى ايلىق مەرزىم اقشانى تاپقان كۇننەن ەمەس، ءتيىستى ورگانعا رەسمي حابارلاعان كۇننەن باستاپ ەسەپتەلەدى.
مىسالى، ازامات 2026-جىلعى 12-قاراشادا اقشا تاۋىپ الىپ، سول كۇنى پوليتسياعا حابارلاسا، 2027-جىلعى 12-مامىرعا دەيىن يەسى انىقتالماسا، اقشانى ءوز مەنشىگىنە الا الادى. ال تاۋىپ العان ادام ونى يەمدەنۋدەن باس تارتسا، قاراجات كوممۋنالدىق مەنشىككە وتەدى.
اقشانىڭ يەسى تابىلسا، 30 پايىز سىياقى الۋعا بولا ما؟
زاڭگەردىڭ تۇسىندىرۋىنشە، ەگەر التى اي وتپەي تۇرىپ اقشانىڭ زاڭدى يەسى تابىلىپ، وزىنە تيەسىلى ەكەنىن دالەلدەسە، ونى تاۋىپ العان ادام اقشانىڭ قۇنىنىڭ 30 پايىزى مولشەرىندە سىياقى تالاپ ەتۋگە قۇقىلى.
«تابىلعان اقشانىڭ 30 پايىزىنا قاتىستى نورما ازاماتتىق كودەكستىڭ 245-بابىنىڭ 6-تارماعىندا كورسەتىلگەن. ەگەر مەنشىك يەسى سىياقى تولەۋدەن باس تارتسا، ازامات سوتقا جۇگىنىپ، ءوز قۇقىعىن قورعاي الادى»، - دەيدى مامان.
دەگەنمەن بۇل تالاپ قىلمىستىق ىسكە قاتىستى اقشاعا جۇرمەيدى. ەگەر تابىلعان قاراجات قىلمىستىق قۇقىق بۇزۋشىلىق ناتيجەسىندە الىنعان نەمەسە تەرگەۋ ءۇشىن ماڭىزدى زاتتاي دالەلدەمە دەپ تانىلسا، ول قىلمىستىق ءىس اياسىندا ساقتالادى.
مۇنداي جاعدايدا اقشانى پوليتسياعا تاپسىرعان ادامعا 30 پايىز سىياقى اۆتوماتتى تۇردە بەرىلمەيدى. ونىڭ ءارى قارايعى تاعدىرى تەرگەۋ مەن سوت شەشىمىنە بايلانىستى انىقتالادى.
زاڭگەر ازاماتتارعا كوشەدەن اقشا نەمەسە باعالى زات تاۋىپ العان جاعدايدا ونى جاسىرماي، بىردەن پوليتسياعا نە اكىمدىككە حابارلاۋعا كەڭەس بەرەدى.