كوپ ادامدار اتوم ەلەكتر ستانسياسى «پوست- فۋكۋسيما» ەرەجەسىمەن سالىناتىنىن بىلمەيدى - ساراپشى

استانا. KAZINFORM - اتوم ەلەكتر ستانسياسىن سالۋ باستاماسىنان قورقاتىن ادامدار - جاساندى راديوفوبيا تۋدىراتىن اقپاراتقا سەنەتىندەر.

ويتكەنى حالىقتىڭ كوپشىلىگى ا ە س- ءتىڭ «فۋكۋسيمادان كەيىنگى» تالاپتارعا نەگىزدەلگەن قاتاڭ ەرەجەلەرمەن سالىناتىنىن بىلمەيدى. وزبەكستاندىق ساياساتتانۋشى، «Ma’no» زەرتتەۋ باستامالارى ورتالىعىنىڭ ديرەكتورى باقتيەر ەرگاشيەۆ وسىنداي پىكىر ءبىلدىردى.

جىل سايىن ورتالىق ازيا ەلدەرىندە ەلەكتر ەنەرگياسى تاپشىلىعى ارتىپ كەلەدى. بۇل اسىرەسە قىس مەزگىلىندە - سۋ ەلەكتر ستانسيالارىنىڭ جۇمىسى توقتاتىلعاندا ايرىقشا سەزىلەدى.

ساراپشىنىڭ ايتۋىنشا، ماسەلەنى شەشۋدىڭ بىرنەشە جولى بار. ءبىرىنشىسى - بىرلەسكەن سۋ ەلەكتر ستانسيالارىن سالۋ.

جاقىندا ورتالىق ازيا ەلدەرى وسى باعىتتا ماڭىزدى قادام جاسادى. اتاپ ايتقاندا، قازاقستان، وزبەكستان جانە قىرعىزستاننىڭ باستاماسىمەن قامبار اتا سۋ ەلەكتر ستانسياسىن سالۋ جوسپارلانعان.

سونىمەن بىرگە، باقتيەر ەرگاشيەۆ ەلەكتر ەنەرگياسىنىڭ ءوسىپ كەلە جاتقان تاپشىلىعىن جىلۋ ەلەكتر ستانسيالارىنىڭ قۋاتىن ۇلعايتۋ ارقىلى جابۋعا بولاتىنىن اتاپ ءوتتى. دەگەنمەن، كومىر مەن تابيعي گازدى جاعۋ ارقىلى ەنەرگيا ءوندىرۋدىڭ وزىندىك قولايسىز جاقتارى بار.

«قازىرگى ۋاقىتتا جىلۋ ەلەكتر ستانسيالارىندا گاز جاعۋ جولىمەن ەنەرگيا الۋ ماسەلەسى كۇردەلەنە تۇسۋدە. سەبەبى بۇل ەنەرگيا رەسۋرستارىنىڭ كوپ بولىگى حالىق پەن بيزنەستىڭ قاجەتتىلىكتەرىنە باعىتتالعان. تيىسىنشە، ەگەر ەلەكتر ستانسيالارىنا گازدى ۇلكەن كولەمدە جەتكىزۋ شەشىمى قابىلدانسا، تۇرعىندارعا بولىنەتىن ۇلەس ازايادى. بۇدان بولەك، الەمدە «جاسىل ەنەرگياعا» بەتبۇرىس بولىپ جاتقاندا كومىردى پايدالانۋ ەكولوگيالىق جاعدايدى ودان ءارى ناشارلاتاتىنى ءسوزسىز. ارينە، قازىرگى ۋاقىتتا ەشكىم شەكتەۋ قويمايدى، ءبىراق بولاشاقتا كوپتەگەن ەلدەر قاتتى وتىننان ەلەكتر ەنەرگياسىن ءوندىرۋدى ۇلعايتپايتىنى انىق»، - دەپ تۇسىندىرەدى ساراپشى.

ەلەكتر قۋاتىنىڭ جەتىسپەۋشىلىگىن شەشۋگە باعىتتالعان باستامالاردىڭ ءبىرى - كۇن پانەلدەرىن ورناتۋ جانە جەل ەلەكتر ستانسيالارىنىڭ سانىن كوبەيتۋ.

ب. ەرگاشيەۆ جاڭارتىلاتىن ەنەرگيا كوزدەرىنىڭ كەيبىر كەمشىلىكتەرىنە توقتالدى. مىسالى، كۇن باتارەيالارى كەشكى ۋاقىتتا، ياعني ەلەكتر ەنەرگياسى كوپ جۇمسالاتىن كەزەڭدە قاجەتتىلىكتەردى جابا المايدى.

«نەگىزگى كەمشىلىگى - جاڭارتىلاتىن ەنەرگيا كوزدەرى ەلەكتر ەنەرگياسىن ۇنەمى قاجەتتى كولەمدە بەرە المايدى. كۇن باتقان سوڭ كۇن پانەلدەرى قۋاتىن جوعالتادى، ال ەگەر جەلدىڭ جىلدامدىعى تومەندەسە، جەل ستانسيالارىندا ەنەرگيا ءوندىرىسى دە ازايادى. وسى ماسەلەلەر بويىنشا تەحنيكالىق شەشىم تابىلادى دەپ ۇمىتتەنەمىز، ءبىراق بۇل جاقىن ارادا بولا قويمايدى»، - دەيدى ب. ەرگاشيەۆ.

سوندىقتان ساراپشىنىڭ پىكىرىنشە، قازىرگى ۋاقىتتاعى ەڭ ءتيىمدى بالاما شەشىم - اتوم ەلەكتر ستانسياسى.

«ا ە س اتموسفەراعا زياندى قالدىق شىعارمايدى، ونىڭ جۇمىسى وزەندەگى سۋ دەڭگەيىنە بايلانىستى ەمەس جانە ول تاۋلىك بويى ۇزدىكسىز جۇمىس ىستەي الادى، كوپتەگەن جىلدار بويى ەنەرگيا وندىرە الادى. سوندىقتان ورتالىق ازيانىڭ بارلىق ەلدەرىندە بايقالاتىن ەنەرگيا تاپشىلىعىن جابۋ ءۇشىن ءتۇرلى اتوم ەلەكتر ستانسيالارىن سالۋ - جالعىز ماڭىزدى جانە قاجەتتى قادام»، - دەيدى ساراپشى.

ب. ەرگاشيەۆتىڭ ايتۋىنشا، قازاقستان مەن وزبەكستان اتوم ەنەرگەتيكاسىن دامىتا الادى. ەكى مەملەكەتتە دە بۇل ءۇشىن قاجەتتى شيكىزات - ۋران بار.

سونىمەن قاتار، ساراپشى ا ە س قاۋىپسىزدىگىنە قاتىستى جۇرتشىلىق اراسىندا ايتىلعان پايىمداۋلارعا قاتىستى ءوز پىكىرىن ءبىلدىردى.

«قازىر كوپشىلىك بىلمەيدى، اتوم ەلەكتر ستانسيالارى فۋكۋسيما اپاتىنان كەيىن «فۋكۋسيمادان كەيىنگى» دەپ اتالاتىن تالاپتار نەگىزىندە سالىنۋدا. مىسالى، بۇگىندە اتوم ەلەكتر ستانسيالارىنىڭ قۇرىلىسى مەن قاۋىپسىزدىگىنە قويىلاتىن تالاپتار بىرنەشە ەسە كۇشەيتىلدى. ولار كوپتەگەن شارالاردى قامتيدى»، - دەيدى ب. ەرگاشيەۆ.

ساراپشى تۇركيادا سالىنىپ جاتقان «اككۋيۋ» اتوم ەلەكتر ستانسياسىنىڭ مىسالىن كەلتىردى.

وتكەن جىلدىڭ اقپان ايىندا اتالعان مەملەكەتتىڭ وڭتۇستىك- شىعىسىندا ۇلكەن جەر سىلكىنىسى بولدى. ال ءزىلزالا وشاعىنىڭ جانىندا سالىنىپ جاتقان «اككۋيۋ» اتوم ەلەكتر ستانسياسىنا ەشقانداي زاقىم كەلگەن جوق.

«بۇل اتوم ەلەكتر ستانسياسىنىڭ قۇرىلىسى اياقتالۋعا جاقىن. وتكەن جىلى جەر سىلكىنىسى بولعاندا ونىڭ ىرگەتاسى مەن قابىرعالارىنا ەشقانداي زاقىم كەلگەن جوق. ا ە س وڭىردە بولعان جەر سىلكىنىسىنىڭ بارلىق تولقىندارىنا ءتوزىمدى ەكەنىن كورسەتتى»، - دەپ اتاپ ءوتتى ب. ەرگاشيەۆ.

قازىرگى ۋاقىتتا ا ە س سالىپ جاتقان ەلدەردىڭ كوپشىلىگى جەر سىلكىنىسى، سۋنامي جانە باسقا دا تابيعي اپاتتار قاۋپى جوعارى ايماقتاردا ورنالاسقان.

«مەنىڭ ويىمشا، مۇنىڭ ءبارى راديوفوبيا، اسىرەسە جاساندى تۇردە جاسالعان راديوفوبيا. تيىسىنشە، ا ە س تۋرالى بىلمەيتىن تۇرعىندار بۇعان سەنە باستايدى. ءبىز اتوم ەلەكتر ستانسيالارىنىڭ قاۋىپسىزدىگىنە قاتاڭ تالاپتار قويىلاتىنىن جان-جاقتى ءتۇسىندىرۋىمىز كەرەك»، - دەپ قورىتىندىلادى ب. ەرگاشيەۆ.

ەسكە سالا كەتەيىك، وزبەكستاندا رەسەيلىك تەحنولوگيا بويىنشا وڭىردەگى العاشقى از قۋاتتى اتوم ەلەكتر ستانسياسى سالىنادى.

اۆتور

ايجان سەرىكجان قىزى