مۇگەدەكتىگى بار 10,8 مىڭ ادام جۇمىسقا ورنالاستى
قازاقستاندا مۇگەدەكتىگى بار ادامداردى جۇمىسپەن قامتۋعا قولداۋ كورسەتۋ جالعاسىپ جاتىر. جىل باسىنان بەرى مەملەكەت ۇسىنعان جۇمىسپەن قامتۋ شارالارىنىڭ كومەگىمەن 10,8 مىڭ ادام جۇمىسقا ورنالاسقان.
2026-جىلدىڭ 1-قازانداعى مالىمەت بويىنشا، جۇمىسقا ورنالاسۋعا كومەك سۇراپ، مانساپ ورتالىقتارىنا 29,5 مىڭ مۇگەدەكتىگى بار ازامات جۇگىنگەن. ولاردىڭ 18,2 مىڭى جۇمىسپەن قامتۋعا باعىتتالعان بەلسەندى شارالارعا قاتىسقان.
- ناتيجەسىندە 10,8 مىڭ ادام جۇمىسقا ورنالاستى. ونىڭ 5,1 مىڭى تۇراقتى جۇمىس تاپسا، 5,4 مىڭى مەملەكەت سۋبسيديالايتىن جۇمىس ورىندارىنا ورنالاسقان. اتاپ ايتقاندا، 4264 ادام قوعامدىق جۇمىستارعا، 367 ادام الەۋمەتتىك جۇمىس ورىندارىنا، 495 ادام «جاستار پراكتيكاسى» باعدارلاماسىنا، ال 499 ادام «كۇمىس جاس» جوباسىنا قاتىسۋ ارقىلى جۇمىسقا ورنالاسقان، - دەلىنگەن ۆەدومستۆو كەلتىرگەن دەرەكتە.
مۇگەدەكتىگى بار ازاماتتاردى جۇمىسپەن قامتۋدى قولداۋدىڭ نەگىزگى تەتىكتەرىنىڭ ءبىرى جۇمىس ورىندارىنا كۆوتا بەلگىلەۋ. الەۋمەتتىك كودەكسكە سايكەس، 50 جانە ودان دا كوپ ادام جۇمىس ىستەيتىن ۇيىمدارعا قىزمەتكەرلەردىڭ جالپى سانىنىڭ 2-4 پايىزى كولەمىندە كۆوتا بەلگىلەنەدى. بۇل رەتتە اۋىر، زياندى جانە قاۋىپتى ەڭبەك جاعدايلارى بار جۇمىس ورىندارى ەسەپكە الىنبايدى.
2026-جىلى مۇگەدەكتىگى بار 16706 ادامدى جۇمىسقا ورنالاستىرۋعا ارنالعان كۆوتا بەلگىلەندى. بيىلعى ەكىنشى توقساننىڭ قورىتىندىسى بويىنشا وسى كۆوتا اياسىندا ەلىمىزدە شامامەن 6,2 مىڭ ادام جۇمىسقا ورنالاسقان.
سالىستىرۋ ءۇشىن ايتساق، 2025-جىلى بەلگىلەنگەن 16719 جۇمىس ورنىنىڭ 8,1 مىڭى قامتىلىپ، كۆوتا بويىنشا جۇمىسقا ورنالاستىرۋ كورسەتكىشى 48 پايىزدى قۇرادى.
ارنايى جۇمىس ورىندارى اشىلىپ، جالاقىنى سۋبسيديالاۋ جالعاسىپ جاتىر
سونىمەن قاتار ءار ادامنىڭ جەكە قاجەتتىلىگىنە ساي ارنايى جۇمىس ورىندارىن اشۋعا كوڭىل ءبولىنىپ وتىر. 2026-جىلعى 1-قازانداعى جاعداي بويىنشا وسىنداي 47 جۇمىس ورنى اشىلعان. ونىڭ 25 ءى ەستۋ قابىلەتى بۇزىلعان ادامدارعا، 12 ءسى كورۋ قابىلەتى بۇزىلعان ازاماتتارعا، تاعى 10 ى تىرەك-قيمىل اپپاراتى بۇزىلعان ادامدارعا ارنالعان.
ارنايى جۇمىس ورىندارىن اشقان جۇمىس بەرۋشىلەرگە دە مەملەكەت قولداۋ كورسەتەدى. اتاپ ايتقاندا، جۇمىسقا ورنالاسقان مۇگەدەكتىگى بار ازاماتتاردىڭ جالاقىسىن سۋبسيديالاۋ قاراستىرىلعان. 2026-جىلعى 1-قازانداعى مالىمەت بويىنشا، مۇنداي سۋبسيديا 235 قىزمەتكەرگە تولەنگەن. ونىڭ 19 ى 2026-جىلى، 105 ءى 2025-جىلى، 111 ءى 2024-جىلى جۇمىسقا ورنالاسقان.
بۇدان بولەك، مەملەكەت مۇگەدەكتىگى بار ازاماتتارعا جاڭا ماماندىق مەڭگەرۋگە جانە ءوز كاسىبىن اشۋعا دا كومەكتەسەدى.
مۇگەدەكتىگى بار ازاماتتارعا كاسىپتىك وقۋ مەن گرانتتار ۇسىنىلادى
جىل باسىنان بەرى 243 ادام قىسقا مەرزىمدى كاسىپتىك وقۋدان ءوتتى.
«باستاۋ بيزنەس» جوباسى اياسىندا 3639 ادام كاسىپكەرلىك نەگىزدەرىن ۇيرەندى. ولاردىڭ 2375 ءى ءتيىستى سەرتيفيكات الدى. سونىمەن قاتار 2951 ادام ونلاين وقۋعا قاتىسىپ، ونىڭ 2265 ءى وقۋىن ءساتتى اياقتاپ، سەرتيفيكاتقا يە بولدى.
ال 2026-جىلعى 1-قىركۇيەكتەگى جاعداي بويىنشا 578 مۇگەدەكتىگى بار ازامات جاڭا بيزنەس-يدەيالارىن جۇزەگە اسىرۋ ءۇشىن مەملەكەتتىك گرانت الدى. بۇل قولداۋ ازاماتتارعا ءوز ءىسىن اشىپ، كاسىپكەرلىك قابىلەتىن دامىتۋعا مۇمكىندىك بەرەدى.
- جالپى، قازاقستاندا مۇگەدەكتىگى بار ادامداردى جۇمىسپەن قامتۋ ءۇشىن بىرنەشە قولداۋ تەتىگى قاراستىرىلعان. ولاردىڭ قاتارىندا مانساپ ورتالىقتارى ارقىلى جۇمىس ىزدەۋ، كۆوتا بويىنشا جۇمىسقا ورنالاسۋ، ارنايى جۇمىس ورىندارىن اشۋ، كاسىپتىك وقىتۋ، جالاقىنى سۋبسيديالاۋ، قايتارىمسىز گرانتتار بەرۋ جانە جاستارعا ميكروكرەديت ۇسىنۋ بار. سونىمەن بىرگە ازاماتتار جۇمىس ىزدەپ، ءوز بەتىنشە دە جۇمىسقا ورنالاسا الادى، - دەپ تۇيىندەدى مينيسترلىك.
بۇعان دەيىن مۇگەدەكتىگى بار ادامداردىڭ قۇقىعى بۇزىلسا، قايدا شاعىمدانۋعا بولاتىنىن جازدىق.