بۇل تۋرالى ق ر وقۋ-اعارتۋ ءبىرىنشى ۆيتسە-ءمينيسترى شىنار اقپاروۆا ورتالىق كوممۋنيكاتسيالار قىزمەتىنىڭ الاڭىندا مالىمدەدى.
ونىڭ ايتۋىنشا، فورماتيۆتىك باعالاۋ وقۋشىنىڭ كۇندەلىكتى وقۋ بارىسىنداعى ناتيجەسىن كورسەتسە، ارالىق باعالاۋ بەلگىلى ءبىر ءبولىم نەمەسە بولىمدەر اياقتالعاننان كەيىن سول كەزەڭدە مەڭگەرىلگەن ءبىلىم مەن داعدىلاردى قورىتىندىلاۋعا باعىتتالادى.
- ارالىق باعالاۋدىڭ ەنگىزىلۋىمەن باعالاۋ جۇمىستارىنىڭ قۇرىلىمى دا وزگەرەدى. بۇعان دەيىن ءبولىم اياقتالعان سوڭ ب ج ب وتكىزىلىپ، توقسان سوڭىندا سول توقساندا وتكەن بولىمدەردىڭ مازمۇنىن قامتيتىن ت ج ب ورىندالاتىن. ياعني ءبولىم بويىنشا باعالاناتىن وقۋ ماتەريالى توقساندىق جيىنتىق باعالاۋ بارىسىندا قايتا قامتىلاتىن جاعدايلار بولدى، - دەدى شىنار اقپاروۆا.
جاڭارتىلعان ءتارتىپ بويىنشا توقسان سوڭىندا بولەك توقساندىق جيىنتىق باعالاۋ (ت ج ب) وتكىزىلمەيدى. وقۋ بولىمدەرىن مەڭگەرۋ ناتيجەسى ارالىق باعالاۋ ارقىلى انىقتالادى. وسىلايشا توقسان سوڭىندا بۇرىن باعالانعان بولىمدەردى قايتا قامتيتىن جەكە جيىنتىق جۇمىس جۇرگىزىلمەيدى.
- بۇعان دەيىن ماتەماتيكا پانىنەن ءبىر توقساندا 3 ب ج ب جانە 1 ت ج ب وتكىزىلسە، وقۋشى بارلىعى 4 باعالاۋ جۇمىسىن ورىندايتىن. جاڭا تارتىپتە ءتيىستى بولىمدەر اياقتالعان سايىن ءار بولىمنەن كەيىن ارالىق باعالاۋ جۇرگىزىلەدى، ال توقسان سوڭىنداعى جەكە ت ج ب الىپ تاستالادى، - دەدى ول.
ناتيجەسىندە توقسان ىشىندەگى باعالاۋ جۇمىستارىنىڭ سانى ءبىر جۇمىسقا قىسقارادى. مينيسترلىك بۇل وزگەرىس وقۋشىنىڭ باعالاۋ جۇكتەمەسىن وڭتايلاندىرۋعا، سونداي-اق پەداگوگتىڭ ت ج ب تاپسىرمالارىن بولەك ازىرلەۋگە، وتكىزۋگە جانە تەكسەرۋگە جۇمسايتىن ۋاقىتىن قىسقارتۋعا مۇمكىندىك بەرەدى دەپ وتىر.
سونىمەن قاتار ارالىق باعالاۋدىڭ وتكىزىلۋ فورماتى مەن مازمۇنى دا وزگەرەدى.
- بۇعان دەيىن ديكتانت، باقىلاۋ جۇمىسى، شىعارما، مازمۇنداما سياقتى جازبا جۇمىستارى فورماتيۆتىك باعالاۋ اياسىندا وتكىزىلىپ، ولاردى ورىنداۋعا ساباقتىڭ شامامەن 20-25 مينۋتى بولىنەتىن. ەندى مۇنداي جۇمىستار ارالىق باعالاۋدىڭ نەگىزگى نىساندارىنىڭ ءبىرى رەتىندە وتكىزىلىپ، ولاردى ورىنداۋعا تولىق ساباق ۋاقىتى - 45 مينۋت بەرىلەدى، - دەپ تۇيىندەدى ول.
ايتا كەتەيىك، ەلىمىزدە بيىل باستاۋىش سىنىپتاردا باعالاۋدىڭ جاڭا تاسىلدەرى ەنگىزىلەدى.