2026-2027 وقۋ جىلىندا 2-4-سىنىپتاردا فورماتيۆتىك جانە ارالىق باعالاۋ قاتار جۇرگىزىلەدى. باعالاۋدىڭ بۇل ەكى ءتۇرى ءبىر-ءبىرىن تولىقتىرادى جانە وقۋ پروتسەسى بارىسىندا قاتار قولدانىلادى.
ارالىق باعالاۋ وقۋ باعدارلاماسىنىڭ اياقتالعان بولىمدەرى بويىنشا جۇرگىزىلەدى. باعالاۋ فورماتى پانگە بايلانىستى:
قازاق ءتىلى نەمەسە ورىس ءتىلى - ديكتانت جانە وقۋ ساۋاتتىلىعىنا ارنالعان تاپسىرمالار. وقۋشىنىڭ ءماتىندى ساۋاتتى جازۋى جانە ونىڭ مازمۇنىن ءتۇسىنۋى باعالانادى؛
ادەبيەتتىك وقۋ — شىعارما نەمەسە مازمۇنداما جانە وقۋ ساۋاتتىلىعىنا ارنالعان تاپسىرمالار. ءماتىندى ءتۇسىنۋ، نەگىزگى ويدى انىقتاۋ جانە ءوز ويىن جۇيەلى جەتكىزۋ ەسكەرىلەدى؛
ماتەماتيكا — باقىلاۋ جۇمىسى. ەسەپتەۋ داعدىلارىمەن قاتار، ەسەپتىڭ شارتىن ءتۇسىنۋ، شەشۋ جولىن دۇرىس تاڭداۋ جانە جاۋابىن نەگىزدەي الۋ باعالانادى.
وقۋ-اعارتۋ مينيسترلىگىنىڭ مالىمەتىنشە ءبىر ارالىق باعالاۋ جۇمىسىنىڭ ۇزاقتىعى - 40 مينۋت. ەڭ جوعارى بال: 2-سىنىپتا - 12, 3-سىنىپتا - 14, 4-سىنىپتا - 16 بال.
— فورماتيۆتىك باعالاۋ توقسان بويى جالعاسادى. پەداگوگ ءار وقۋشىنى وتكىزىلگەن ساباقتاردىڭ كەمىندە 30 پايىزىندا باعالاپ، توقسانعا جوسپارلانعان وقۋ ماقساتتارىنىڭ كەمىندە 50 پايىزىن قامتۋى ءتيىس. ناتيجە 1-10 بالدىق شاكىل بويىنشا باعالانادى، — دەلىنگەن مينيسترلىك حابارلاماسىندا.
كالليگرافيا ارنايى باعالاۋ ماقساتى بولماسا، وقۋشىنىڭ جازۋ ەرەكشەلىگى بالدى تومەندەتۋگە نەگىز بولمايدى.
1-سىنىپتا بالدىق باعالاۋ جۇرگىزىلمەيدى.
باعالاۋدىڭ نەگىزگى ماقساتى - وقۋشىعا تەك باعا قويۋ ەمەس، ونىڭ وقۋ ماتەريالىن قانشالىقتى مەڭگەرگەنىن انىقتاۋ، ىلگەرىلەۋىن باقىلاۋ جانە ءارى قاراي دامۋىنا باعىت بەرۋ. باعالاۋ بالانىڭ العا جىلجۋىنا كومەكتەسەتىن كەرى بايلانىس قۇرالى بولۋى ءتيىس.
ايتا كەتەلىك بىرنەشە پاننەن جىلدىق باعاسى «2» بولعان وقۋشى وقۋ جىلىن قايتا وقۋعا قالدىرىلادى.