سونىمەن وقۋ پروتسەسى كەزىندە ۇيالى بايلانىستىڭ ابونەنتتىك قۇرىلعىسىن پايدالانۋ ءتارتىبى مىناداي:
- وقۋ ساباعى باستالعانعا دەيىن ءبىلىم الۋشى نەمەسە تاربيەلەنۋشى ۇيالى بايلانىستىڭ ابونەنتتىك قۇرىلعىسىن ءدىرىلدى جانە دىبىستىق سيگنالداردى ءوشىرۋ ارقىلى دىبىسسىز رەجيمگە اۋىستىرادى نەمەسە ونى وشىرەدى؛
- وقۋ ساباعى كەزىندە ءبىلىم الۋشى نەمەسە تاربيەلەنۋشى ۇيالى بايلانىستىڭ ابونەنتتىك قۇرىلعىسىن پايدالانبايدى.
ءبىلىم الۋشىعا نەمەسە تاربيەلەنۋشىگە وقۋ پروتسەسى كەزىندە ۇيالى بايلانىستىڭ ابونەنتتىك قۇرىلعىسىن پايدالانۋعا مىناداي جاعدايلاردا جول بەرىلەدى:
- وقۋ تاپسىرماسىن ورىنداۋ ءۇشىن پايدالانۋ قاجەت بولعان كەزدە پەداگوگتىڭ نۇسقاۋى بويىنشا وقۋ ماقساتىندا؛
- ءبىلىم الۋشىنىڭ، تاربيەلەنۋشىنىڭ نە وزگە دە ادامداردىڭ ومىرىنە جانە (نەمەسە) دەنساۋلىعىنا قاتەر توندىرەتىن ءمان-جايلار تۋىنداعان كەزدە؛
- ءبىلىم الۋشىنىڭ نەمەسە تاربيەلەنۋشىنىڭ دەنساۋلىق جاعدايىنا بايلانىستى ۇيالى بايلانىستىڭ ابونەنتتىك قۇرىلعىسىن پايدالانۋ قاجەت بولعان كەزدە.
ماتەريالدىق-تەحنيكالىق جانە ۇيىمداستىرۋشىلىق مۇمكىندىگى بولعان كەزدە ورتا ءبىلىم بەرۋ ۇيىمى ۇيالى بايلانىستىڭ ابونەنتتىك قۇرىلعىلارىن ورنالاستىرۋ ءۇشىن ارنايى جابدىقتالعان ورىنداردى ايقىنداۋعا قۇقىلى. ارنايى جابدىقتالعان ورىندار بولعان كەزدە ولاردى پايدالانۋ ءتارتىبى جانە ولارعا ورنالاستىرىلعان قۇرىلعىلاردىڭ ساقتالۋىن قامتاماسىز ەتۋ جونىندەگى شارالارى ءبىلىم بەرۋ ۇيىمىنىڭ ىشكى ءتارتىپ قاعيدالارىمەن ايقىندالادى.
ۇيالى بايلانىستىڭ ابونەنتتىك قۇرىلعىسىن وقۋ ماقساتىندا پايدالانۋ كەزىندە پەداگوگ:
1) ورىنداۋ ءۇشىن ۇيالى بايلانىستىڭ ابونەنتتىك قۇرىلعىسىن پايدالانۋدى قاجەت ەتەتىن وقۋ تاپسىرماسىن ايقىندايدى؛
2) ۇيالى بايلانىستىڭ ابونەنتتىك قۇرىلعىسىن پايدالانۋدى باستاعانعا دەيىن ءبىلىم الۋشىلار مەن تاربيەلەنۋشىلەرگە وقۋ تاپسىرماسىنىڭ مازمۇنىن، ۇيالى بايلانىستىڭ ابونەنتتىك قۇرىلعىسىن پايدالانۋ ءتارتىبى مەن ۇزاقتىعىن تۇسىندىرەدى؛
3) وقۋ تاپسىرماسىن ءوز بەتىنشە ورىنداۋعا قويىلاتىن تالاپتاردى جانە ونى ورىنداۋ كەزىندە ۇيالى بايلانىستىڭ ابونەنتتىك قۇرىلعىسىن پايدالانۋدىڭ رۇقسات ەتىلگەن تاسىلدەرىن تۇسىندىرەدى؛
4) ۇيالى بايلانىستىڭ ابونەنتتىك قۇرىلعىسىن پايدالانۋدى باستاۋ جانە توقتاتۋ تۋرالى نۇسقاۋ بەرەدى.
ۇيالى بايلانىستىڭ ابونەنتتىك قۇرىلعىسىن وقۋ ماقساتىندا پايدالانۋ كەزىندە ءبىلىم الۋشى نەمەسە تاربيەلەنۋشى:
1) ۇيالى بايلانىستىڭ ابونەنتتىك قۇرىلعىسىن پەداگوگ ايقىنداعان وقۋ تاپسىرماسىن ورىنداۋ ءۇشىن عانا پايدالانادى؛
2) وسى قاعيدالاردىڭ 5-تارماعىنا سايكەس پەداگوگ بەلگىلەگەن ۇيالى بايلانىستىڭ ابونەنتتىك قۇرىلعىسىن پايدالانۋ ءتارتىبى مەن ۇزاقتىعىن ساقتايدى؛
3) وقۋ تاپسىرماسىن پەداگوگ بەلگىلەگەن ۇيالى بايلانىستىڭ ابونەنتتىك قۇرىلعىسىن پايدالانۋ شارتتارىن ساقتاي وتىرىپ، ءوز بەتىنشە ورىندايدى؛
4) پەداگوگتىڭ نۇسقاۋى بويىنشا ۇيالى بايلانىستىڭ ابونەنتتىك قۇرىلعىسىن پايدالانۋدى توقتاتادى.
وقۋ تاپسىرماسىن ورىنداۋ كەزىندە ۇيالى بايلانىستىڭ ابونەنتتىك قۇرىلعىسىنىڭ فوتو، اۋديو جانە بەينەجازبا فۋنكتسيالارىن پەداگوگتىڭ نۇسقاۋى بويىنشا قازاقستان رەسپۋبليكاسىنىڭ دەربەس دەرەكتەر جانە ولاردى قورعاۋ تۋرالى زاڭناماسىن، سونداي-اق جەكە ءومىردى جانە ادامنىڭ ءوز بەينەسىنە قۇقىعىن قورعاۋ جونىندەگى زاڭناما تالاپتارىن ساقتاي وتىرىپ پايدالانۋعا جول بەرىلەدى.