كەترين حانشايىم حيميوتەراپيانى اياقتاعاننان كەيىن العاش رەت كوپشىلىك الدىنا شىقتى

استانا. KAZINFORM - ۋەلس حانشايىمى مەن ونىڭ كۇيەۋى اياق استىنان ساۋتپورتقا كەلدى، ولار وسى جىلدىڭ شىلدە ايىندا قايعىلى جاعدايدا قازا تاپقان ءۇش بالانىڭ وتباسىلارىمەن كەزدەستى.

بۇل كەتريننىڭ حيميوتەراپيانى اياقتاعاننان كەيىن كوپشىلىك الدىنا ءبىرىنشى رەت شىعۋى ەدى.

كورولدىڭ وتباسىنا جاقىن دەرەككوزدەردىڭ ايتۋىنشا، ول «جەرگىلىكتى قوعامداستىققا ءوزىنىڭ قولداۋىن، جاناشىرلىعىن جانە ادالدىعىن كورسەتۋ» ءۇشىن حانزادا ۋيليامعا قوسىلۋدى ءجون كورگەن.

ەلدىڭ سولتۇستىك- باتىس جاعالاۋىنداعى قالاعا حانشايىمنىڭ ساپارى تۇرعىندارعا توسىن سىي بولدى.

ەمىن اياقتاعان حانزادا ۋيليامنىڭ ايەلى بىرتە-بىرتە ءوزىنىڭ كورولدىك مىندەتتەرىنە ورالۋدا جانە ساۋتپورتقا ساپارى وسى باعىتتاعى ماڭىزدى قادام بولدى.

كەترين «جاقسى كۇندەر مەن جامان كۇندەر» تۋرالى ايتتى، ال كەنسينگتون سارايى ونىڭ كوپشىلىك الدىندا شىعۋ كەستەسى سوڭعى مينۋتتاردا وزگەرۋى مۇمكىن ەكەنىن ەسكەرتتى.

كورولدىك ەرلى-زايىپتىلار قايتىس بولعان 6-9 جاس ارالىعىنداعى ءۇش قىزدىڭ وتباسىمەن ءبىر جارىم ساعات اڭگىمەلەسىپ، توتەنشە جاعدايلار قىزمەتكەرلەرىمەن جۇزدەستى.

ايتا كەتەيىك، قايعىلى وقيعا شىلدە ايىندا 17 جاستاعى اكسەل رۋداكۋبانانىڭ Hart Space بي كلۋبىنداعى ساباققا پىشاقپەن كىرۋى كەزىندە ورىن العان. ەكى قىز وقيعا ورنىندا كوز جۇمدى، 11 ادام، ونىڭ ىشىندە 8 بالا جاراقات الدى، تاعى ءبىر قىز كەيىن اۋرۋحانادا كوز جۇمدى.

ۋەلستە تۋعان جانە ۇلى بريتانيا ازاماتتىعىن العان رۋاندالىق يمميگرانتتاردىڭ ۇلى اكسەل قىلمىس ورنىندا ۇستالدى. وعان كىسى ءولتىردى جانە ولتىرۋگە وقتالادى دەگەن ايىپ تاعىلدى.

اۆتور
اسحات رايقۇل