الەۋمەتتىك جەلىلەردە جۇك كولىكتەرىنىڭ ۇزىن-سونار كەزەگى تۇسىرىلگەن بەينەجازبالار تارادى. جۇرگىزۋشىلەردىڭ ايتۋىنشا، ولار شەكارادان ءوتۋ ءۇشىن ەكى-ءۇش تاۋلىككە دەيىن كۇتۋگە ءماجبۇر. سونىمەن قاتار، ولاردىڭ سوزىنشە، وتكىزۋ بەكەتىنە اپاراتىن جول بويىندا دارەتحانالار مەن قاجەتتى تۇرمىستىق جاعداي قاراستىرىلماعان. جۇك كولىكتەرىنىڭ جۇرگىزۋشىلەرى كەيبىر كولىكتەردىڭ جالپى كەزەكتى اينالىپ ءوتىپ، العا شىعىپ كەتەتىنىنە دە نارازى.
جاعدايعا قاتىستى Kazinform اگەنتتىگىنە قارجى مينيسترلىگى مەملەكەتتىك كىرىستەر كوميتەتى تۇسىنىك بەردى.
ۆەدومستۆو مالىمەتىنشە، «باۋىرجان قونىسبايەۆ» وتكىزۋ بەكەتىنىڭ الدىندا جۇك كولىكتەرىنىڭ شوعىرلانۋىنا حالىقارالىق جۇك تاسىمالى كولەمىنىڭ ماۋسىمدىق ارتۋى جانە قازاقستان اۋماعى ارقىلى وتەتىن ترانزيتتىك اعىننىڭ تۇراقتى ءوسۋى سەبەپ بولعان. بۇعان وتاندىق كولىك- لوگيستيكالىق باعىتتاردىڭ تارتىمدىلىعىنىڭ ارتۋى دا اسەر ەتىپ وتىر.
- 2026 -جىلدىڭ 10 ايىندا قازاقستان مەن وزبەكستان شەكاراسىنداعى كولىك اعىنى 16,2 پايىزعا ءوسىپ، 741,5 مىڭ اۆتوكولىككە جەتتى. اتاپ ايتقاندا، «باۋىرجان قونىسبايەۆ» وتكىزۋ بەكەتى ارقىلى 321 مىڭ اۆتوكولىك وتكەن. بۇل وتكەن جىلدىڭ سايكەس كەزەڭىمەن سالىستىرعاندا 21 پايىزعا كوپ (265 مىڭ اۆتوكولىك). اتالعان بەكەت تاۋلىگىنە 1500 اۆتوكولىك وتكىزىپ وتىر. ال ونىڭ جوبالىق قۋاتى - 1000 اۆتوكولىك. ياعني، ناقتى وتكىزۋ كولەمى جوبادا كوزدەلگەن مەجەدەن 50 پايىزعا جوعارى، - دەپ حابارلادى ۆەدومستۆودان.
مەملەكەتتىك كىرىستەر كوميتەتى وتكىزۋ بەكەتىنىڭ شتاتتىق رەجيمدە جۇمىس ىستەپ تۇرعانىن اتاپ ءوتتى. جۇكتەمەنى ازايتۋ ماقساتىندا كولىك اعىنىن «اتامەكەن» وتكىزۋ بەكەتىنە قايتا ءبولۋ، «اتامەكەن - گۋليستان» شەكارالاس وتكىزۋ بەكەتتەرىنىڭ وتكىزۋ مۇمكىندىگىن ارتتىرۋ جانە بالامالى باعىتتاردى پايدالانۋ جۇمىستارى جۇرگىزىلىپ جاتىر.
كوميتەت وكىلدەرى كولىك كەپتەلىسىنە تاسىمالداۋشىلاردىڭ ەلەكتروندى كەزەككە ۋاقىتىلى تىركەلمەۋى دە سەبەپ بولىپ وتىرعانىن حابارلادى.
- CarGoRuqsat جۇيەسى ارقىلى ەلەكتروندى كەزەككە الدىن الا تىركەلۋ مۇمكىندىگىنە قاراماستان، كەيبىر تاسىمالداۋشىلار وتكىزۋ بەكەتىنە الدىن الا تىركەلمەي كەلىپ، كەزەككە تەك سول جەرگە جەتكەن سوڭ عانا جازىلادى. سونىڭ سالدارىنان ولار بەلگىلەنگەن ۋاقىتتى كۇتىپ، وتكىزۋ بەكەتىنە اپاراتىن جولدا ۇزاق ۋاقىت ايالداۋعا ءماجبۇر. بۇل كولىك قۇرالدارىنىڭ ودان ءارى شوعىرلانۋىنا اكەلەدى، - دەپ مالىمدەدى مكك.
ۆەدومستۆونىڭ مالىمەتىنشە، CarGoRuqsat جۇيەسى ەلەكتروندى كەزەكتىڭ اشىقتىعىن قامتاماسىز ەتەدى. سونىمەن قاتار، ول كولىك قۇرالدارىنىڭ كەزەكتىلىگىن باقىلاۋعا جانە شەكارادان وتۋگە بولاتىن بوس ۋاقىت ارالىقتارىن كورۋگە مۇمكىندىك بەرەدى.
- 2026 -جىلعى 3-قاراشادا ساعات 10:00 دەگى جاعداي بويىنشا «باۋىرجان قونىسبايەۆ» وتكىزۋ بەكەتىندە ەلەكتروندى كەزەككە تىركەلۋگە ارنالعان 130 بوس ورىن بولعان. دەمەك، جەكەلەگەن كولىكتەردىڭ وتكىزۋ بەكەتىنە اپاراتىن جولداردا ۇزاق ۋاقىت تۇرۋى بارلىق تاسىمالداۋشىنىڭ شەكارادان ءوتۋ ءۇشىن بىرنەشە تاۋلىك كۇتۋگە ءماجبۇر ەكەنىن بىلدىرمەيدى، - دەپ اتاپ ءوتتى كوميتەت وكىلدەرى.
مەملەكەتتىك كىرىستەر كوميتەتى جۇرگىزۋشىلەرگە شەكارادان وتەتىن كۇن مەن ۋاقىتتى الدىن الا تىركەپ، وتكىزۋ پۋنكتىنە بەلگىلەنگەن ۋاقىتتا كەلۋگە كەڭەس بەردى. بۇل جوسپاردان تىس كىدىرىستەردى بولدىرماۋعا كومەكتەسەدى.
ايتا كەتەيىك، قازاقستان مەن وزبەكستان شەكاراسىندا مۇنداي جاعداي تامىز ايىندا دا بولعان ەدى. ول كەزدە الەۋمەتتىك جەلىلەردە جۇك كولىكتەرىنىڭ كەزەگى 40 شاقىرىمعا دەيىن سوزىلعانى تۋرالى اقپارات تاراعان. وڭىرلىك مەملەكەتتىك كىرىستەر دەپارتامەنتى «باۋىرجان قونىسبايەۆ» وتكىزۋ بەكەتى ارقىلى كولىك اعىنىنىڭ ايتارلىقتاي ارتقانىن جانە ونىڭ جوبالىق وتكىزۋ مۇمكىندىگىنەن اسىپ كەتكەنىن حابارلاعان ەدى.