ىستامبۇلدىڭ باشاكشەحير اۋدانىنداعى مەكتەپتە بولعان پىشاق شابۋىلىنان سەگىز وقۋشى جاراقات الدى. زارداپ شەككەندەردىڭ بارلىعى اۋرۋحاناعا جەتكىزىلدى.
وقيعا 6-قازان كۇنى تاڭەرتەڭ كاياباشى اۋدانىنداعى ورتا مەكتەپتە بولعان. تۇركيالىق Anadolu Ajansi مالىمەتىنشە، العاشقىدا وقۋشىلار اراسىندا جانجال شىققانى حابارلانعان. كەيىن وقيعانىڭ پىشاق قولدانىلعان شابۋىل ەكەنى بەلگىلى بولدى.
تۇركيانىڭ دەنساۋلىق ساقتاۋ ءمينيسترى كەمال مەميشوعلۋ سەگىز جارالىنىڭ ەم الىپ جاتقانىن مالىمدەدى. ونىڭ ايتۋىنشا، ءبىر وقۋشىنىڭ جاعدايى اۋىر، تاعى ەكى بالانىڭ جاعدايى ورتاشا اۋىر.
تۇركيالىق باسىلىمداردىڭ حابارلاۋىنشا، شابۋىلدى باسقا مەكتەپتە وقيتىن وقۋشى جاساعان. ول ءوزى تۇراتىن كاياباشى اۋدانىنداعى مەكتەپكە كەلىپ، وقۋشىلارعا پىشاقپەن شابۋىل جاساعان. شابۋىل جاساعان وقۋشى ۇستالعان، وقيعاعا قاتىستى تەرگەۋ باستالدى.
وقيعا تاڭعى ساعات 08:40 شاماسىندا بولعان. مەكتەپكە پوليتسيا مەن جەدەل جاردەم قىزمەتتەرى شاقىرىلىپ، جارالانعان وقۋشىلار اۋرۋحانالارعا جەتكىزىلدى.
وقيعاعا بايلانىستى مەكتەپتە وقۋ پروتسەسىنە ۋاقىتشا ءۇزىلىس بەرىلگەنى تۋرالى دا تۇركيالىق ب ا ق حابارلادى. سونىمەن قاتار سوت شەشىمىمەن شابۋىلعا قاتىستى اقپاراتتى تاراتۋعا شەكتەۋ ەنگىزىلگەن.
ەسكە سالساق، تۇركيادا مەكتەپتەرگە جاسالعان شابۋىلداردان كەيىن كيبەروپەراتسيا بارىسىندا 3,8 مىڭ ادام ۇستالدى.