ەكسپورتتى قولداۋعا جۇمسالعان 1 تەڭگەنىڭ ورنىنا 500 تەڭگە پايدا تۇسەدى

استانا. قازاقپارات - «QazTrade» ينستيتۋتىنىڭ بازاسىندا جىل سايىن 450 دەن استام كومپانيا قولداناتىن سەرۆيستىك شارالار شوعىرلانعان. بۇل تۋرالى ۇكىمەت وتىرىسىندا ساۋدا جانە ينتەگراتسيا ءمينيسترى ارمان شاققاليەۆ ءمالىم ەتتى.

«ءبىز «QazTrade» بازاسىندا ساۋدا اعىندارىن قالىپتاستىراتىن كاسىبي نارىق قاتىسۋشىلارىمەن بىرلەسىپ، ساۋدا اكسەلەراتورىن ىسكە قوسامىز. بۇعان ەكسپورتتىق ءونىمنىڭ كەپىلدىك بەرىلگەن كولەمىن فورۆاردتىق ساتىپ الۋعا اۆانستىق تولەمدەردى كوزدەيتىن ءونىمدى جەتكىزۋگە ۇزاق مەرزىمدى كەلىسىمشارتتار جاساسۋ ەسكەرىلگەن. سونىمەن قاتار، ناتيجەگە قول جەتكىزۋ ءۇشىن ساۋدا مينيسترلىگىنىڭ دامۋ ينستيتۋتتارىن تارتا وتىرىپ، ۆەدومستۆوارالىق ۇيلەستىرۋدى جۇزەگە اسىرادى. قازىرگى جاعدايدى ەسكەرە وتىرىپ، بيۋدجەتتەن تىس قارجىلاندىرۋدى «بايتەرەك» حولدينگىنىڭ قۇرالدارىمەن، ونىڭ ىشىندە جاڭادان قۇرىلعان ەكسپورتتىق-كرەديتتىك اگەنتتىكتى پايدالانۋ ۇسىنىلدى»، - دەدى ا. شاققاليەۆ.

ونىڭ ايتۋىنشا، بۇل تۇرعىدا بيزنەستى ىنتالاندىرۋ جانە بەلسەندى ەكسپورتتاۋشىلار سانىن ارتتىرۋ ءۇشىن ىشكى جانە سىرتقى شيكىزاتتىق ەمەس ەكسپورتتى دامىتۋ جانە ىلگەرىلەتۋ ينفراقۇرىلىمى قالىپتاستىرىلدى.

«الدىڭعى قاتارلى ەلدەردىڭ تاجىريبەسى بويىنشا بيىل بيزنەس سۋبەكتىلەرىنە ەكسپورتتىق سيكلدىڭ بارلىق كەزەڭدەرىندە ساقتاندىرۋ جانە قارجىلىق قولداۋ شارالارىنىڭ سپەكترىن ۇسىناتىن ەكسپورتتىق-كرەديتتىك اگەنتتىك قۇرىلدى. ەكسپورتتىق اعىنداردىڭ سىرتقى فاكتورلارعا تاۋەلدىلىگىن تومەندەتۋ ءۇشىن قارجىلىق شارالار تەرەڭدەتىلگەن قايتا وڭدەۋ تاۋارلارىن قولداۋعا باعىتتالادى. «QazTrade» ينستيتۋتىنىڭ بازاسىندا جىل سايىن 450 دەن استام كومپانيا قولداناتىن سەرۆيستىك شارالار شوعىرلانعان. سوڭعى ءۇش جىلدا ەكسپورتتىڭ ءوسۋى تەك وسىمدىك مايلارى بويىنشا 2,2, تىڭايتقىشتار - 1,7، قوي ەتى 4,4 پايىزعا ارتتى. ءبىزدىڭ ەسەبىمىزگە سايكەس، ەكسپورتتى قولداۋعا جۇمسالعان ءبىر تەڭگە ەكسپورتتىق ءتۇسىم بويىنشا 500 تەڭگەنى قۇرايدى. بۇل رەتتە، سەرۆيستىك تاۋارلار مەن كورسەتىلەتىن قىزمەتتەردى قولداۋدىڭ ورتاشا جىلدىق كولەمى شامامەن 2,3 ميلليارد تەڭگەنى قۇرايدى»، - دەدى مينيستر.

اۆتور
رۋسلان عابباسوۆ