ەكسترەمالدى فوتو، قامالعان بالالار: ت ج د قىزمەتكەرلەرى قۇتقارۋ وپەراتسيالارىن ەسكە الدى

شىعىس قازاقستان وبلىستىق توتەنشە جاعدايلار دەپارتامەنتىنىڭ قىزمەتكەرلەرى جىل كولەمىندە بولعان ەرەكشە قۇتقارۋ وپەراتسيالارىن ءتىزىپ ءوتتى، دەپ حابارلايدى Kazinform.

ش ق و ت ج د باسپا ءسوز قىزمەتىنىڭ مالىمەتىنشە، 2023 -جىلى بارلىعى 215 ادام قۇتقارىلىپ، ءتۇرلى توتەنشە جاعدايلارعا تاپ بولعان 410 ازامات ەۆاكۋاتسيالاندى. دەپارتامەنت قىزمەتكەرلەرى 65 بالاعا كومەككە كەلىپ، 59 جانۋاردى قۇتقارىپ قالدى. جىلدى قورىتىندىلاي كەلە، ەرەكشە ەستە قالعاندارى تومەندەگىلەر بولدى:

ەكسترەمالدى فوتو

ريددەر قالاسىندا ءبىر توپ جاس تاۋلى ءارى ورماندى جەرگە بارىپ دەمالعان. ەر ادامداردىڭ ءبىرى كوز تارتار ادەمى كورىنىستى سۋرەتكە ءتۇسىرۋ ءۇشىن بيىك اعاشقا ورمەلەپ شىقتى. الايدا اياعى تايىپ كەتىپ، قۇلاپ ءتۇسىپ، اۋىر جاراقات العان. №1-مامانداندىرلعان ءورت ءسوندىرۋ بولىمشەسىنىڭ قىزمەتكەرلەرى ونى تاۋدان جەدەل جاردەم كولىگىنە دەيىن زەمبىلمەن تاسىمالدادى.

«ساقينا» وپەراتسياسى

12-ايدىڭ ىشىندە ءوڭىر بويىنشا 22 ادام ساۋساعىنان ساقينانى شەشە الماي قۇتقارۋشىلاردى شاقىرتقان. ولاردىڭ بارىنە دە كومەك كورسەتىلدى.

قامالىپ قالعاندار

65 بالا ەسىگى جابىلىپ قالعان ۇيدە قالىپ قويعان. ت ج د قىزمەتكەرلەرى دەرەۋ جەتىپ، بالالاردى شىعاردى.

بۇدان بولەك، وسكەمەندە ابايسىزدا اۆتوكولىك ەسىگى جابىلىپ قالىپ، ونىڭ ىشىندە ءبىر جاسار بالا قالىپ قويعان. اناسى «112» نومىرىنە قوڭىراۋ شالىپ، كومەك سۇرادى. ءسويتىپ، قۇتقارۋشىلار ەسىكتى اشىپ بەردى.

ريددەردە ويناپ جۇرگەن قارشاداي قىز اۋلاداعى اعاشقا ورمەلەپ شىعىپ، تۇسە المادى. ول قاتتى قورقىپ، جىلاپ وتىرعان كەزدە №14 ءورت ءسوندىرۋ ءبولىمىنىڭ قۇتقارۋشىلارى 8 مەتر بيىكتىككە كوتەرىلىپ، بالانى قولىنا الىپ، جەرگە ءتۇسىردى.

جانۋارلارعا كومەك

ءبىر جىل ىشىندە 17 مىسىق قۇتقارىلعان. وسكەمەن اكىمدىگى عيماراتىنىڭ سىرتقى قاپتاماسىنا قىسىلىپ قالعان مارعاۋ شىعارىلدى. ول سوقىر بولىپ شىقتى. قۇتقارۋشىلار مارعاۋدى زووكلينيكاعا تاپسىرىپ، وندا ول ەمدەلىپ، كوپ ۇزاماي وزىنە يە تاپتى.

بيىل وسكەمەندە بولعان ءورت كەزىندە ءورت سوندىرۋشىلەر 35 ارا ۇياسىن (ءارقايسىسىندا 30 مىڭ ارا بولعان) قۇتقاردى. سونداي-اق 37 ءيت توتەنشە جاعدايعا تاپ بولعان. بارلىق وقيعادا ءتورت اياقتىلارعا دەر كەزىندە كومەك كورسەتىلدى.