بۇل تۋرالى رينات زايىت Adal ADAM YouTube ارناسىنا بەرگەن سۇحباتىندا مالىمدەدى.
رينات زايىتتىڭ سوزىنشە، دەپۋتاتتىق مانداتىن تاپسىرعاننان كەيىن ول ءبىر-ەكى اي دەمالىپ، جاڭا جۇمىسقا كىرىسۋگە دايىندالعان.
- شىلدە ايىنان بەرى، مانداتىمدى تاپسىرعاننان كەيىن، شىنىمدى ايتسام، ءبىر-ەكى اي دەمالدىم. سەبەبى ءۇش جىل ءۇش اي مەن ءۇشىن اۋىر كەزەڭ بولدى. بۇعان دەيىن دە وسىدان كەيىن بۇنداي جۇمىسقا جولاماۋعا تىرىساتىنىمدى ايتىپ ءجۇردىم. سەبەبى، جاۋاپكەرشىلىگى جوعارى جۇمىستا اتقارعان ەڭبەگىڭ ەلەنبەي قالسا، ادامنىڭ كوڭىلىنە قاياۋ سالادى. ۋاقىت وتە كەلە جۇمىسقا دەگەن قۇلشىنىس تا السىرەي باستايدى، - دەدى ول.
ونىڭ ايتۋىنشا، قازان ايىنىڭ باسىندا جاڭا قورعانىس مينيسترلىگىنىڭ شاقىرتۋىمەن ۇلتتىق اسكەري-پاتريوتتىق ورتالىقتىڭ جۇمىسىنا قوسىلعان.
- قورعانىس مينيسترلىگىنە قاراستى ۇلتتىق اسكەري-پاتريوتتىق ورتالىق دەگەن ۇجىم بار. ونىڭ قۇرامىندا انسامبل مەن وركەستر جۇمىس ىستەيدى. سونىمەن قاتار ورتالىق پاتريوتتىق ءىس-شارالار مەن مادەني جۇمىستاردى ۇيىمداستىرادى. اسكەردىڭ جانە اسكەرگە دەيىنگى جاستاردىڭ بويىندا پاتريوتتىق قالپى، ولاردىڭ وتان الدىنداعى وتانسۇيگىشتىگىن ارتتىرۋىن قاداعالايتىن بىردەن ءبىر ورتالىق. مەن وسى ورتالىققا كەلدىم، - دەدى رينات زايىت.
سونداي-اق ول مەملەكەت باسشىسى قاسىم-جومارت توقايەۆتىڭ قورعانىس سالاسىن رەفورمالاۋ جونىندەگى تاپسىرمالارى جاڭا وزگەرىستەرگە جول اشقانىن اتاپ ءوتتى.
- قازىرگى جاعدايدى ەسكەرە وتىرىپ، مەملەكەت باسشىسى قاسىم-جومارت كەمەل ۇلى توقايەۆتىڭ تۇبەگەيلى قورعانىس سالاسىنا جاساڭدار دەپ تاپسىرعان رەفورماسى باستالدى. مەن جاڭا وزگەرىستەرگە قاتىسۋدى جاقسى كورەتىن ادام رەتىندە بۇل جۇمىسقا قۋانا-قۋانا كەلدىم، - دەدى ول.
ايتا كەتەيىك، اسقار ۋماروۆ قازاقستان حالىق كەڭەسى ءتوراعاسىنىڭ كەڭەسشىسى لاۋازىمىنا تاعايىندالدى.