ەكس-مينيستر مارات بەكەتايەۆ تاعى ءبىر اي تۇتقىندا وتىرادى
استانا. KAZINFORM - بۇرىنعى ادىلەت ءمينيسترى مارات بەكەتايەۆتى قاماۋدا ۇستاۋ مەرزىمى 21- ناۋرىزعا دەيىن ۇزارتىلدى. بۇل اقپاراتتى استانا قالالىق سوتى راستادى.
ەستەرىڭىزگە سالا كەتسەك، وتكەن جىلدىڭ 22- قازانىندا استانا قالاسىنىڭ مامانداندىرىلعان اۋدانارالىق تەرگەۋ سوتى كۇدىكتى مارات بەكەتايەۆتى 2 اي مەرزىمگە كۇزەتپەن ۇستاۋ تۇرىندەگى بۇلتارتپاۋ شاراسىن سانكسيالاعان بولاتىن.
ول لاۋازىمدىق وكىلەتتىگىن اسىرا پايدالاندى دەگەن كۇدىككە ىلىنگەن.
سول ۋاقىتتا باس پروكۋروردىڭ ورىنباسارى اسەت شىنداليەۆ ب ا ق وكىلدەرىنە بەرگەن سۇحباتىندا مارات بەكەتايەۆتىڭ شەتەلگە قاشۋعا ارەكەت جاساعانىن ايتقان ەدى.
«ول قۇقىق قورعاۋ ورگاندارىنان باسقا جاققا قاشپاقشى بولدى. سول ارەكەتى كەزىندە ۇستالىپ، كۇدىكتى ەكەنىن ەسكەرە وتىرىپ، ونىڭ قاشۋعا وقتالعان ماقساتىن ەسكەرىپ، بەكەتايەۆ قاماۋعا الىندى. ءقازىر تەرگەۋ امالدارى ءجۇرىپ جاتىر. قىلمىستىق ءىس جۇرگىزۋ كودەكسىنە سايكەس، تەرگەۋ امالدارىنىڭ مالىمەتىن جاريالاۋعا تىيىم سالىنادى. سوندىقتان ءىستىڭ ءمان-جايىن تولىق ايتا المايمىن»، - دەدى اسەت شىنداليەۆ.