ەكس-ديپلومات ساكەن ماماش 6 جىلعا سوتتالدى
استانا. KAZINFORM - بۇگىن استانا قالاسىنىڭ قىلمىستىق ىستەر جونىندەگى اۋدانارالىق سوتىنىڭ ۇكىمىمەن ەكس-ديپلومات ساكەن ماماش 6 جىلعا باس بوستاندىعىنان ايىرىلدى.
- قىلمىستىق-پروتسەستىك كودەكستىڭ 387-390، 393، 395-398، 401-402-ءى باپتارىن باسشىلىققا الا وتىرىپ، سوت ماماش ساكەن تاشكەنباي ۇلىن قىلمىستىق كودەكستىڭ 110-بابى 2-بولىگى 1) تارماعىندا كوزدەلگەن قىلمىس جاساعانى ءۇشىن كىنالى دەپ تانىپ، وعان 6 جىل مەرزىمگە باس بوستاندىعىنان ايىرۋ جازاسىن تاعايىندادى، - دەگەن ۇكىم شىعاردى سۋديا ارتۋر ابدىحانوۆ.
ەكس-ديپلومات جازاسىن قاۋىپسىزدىگى ورتاشا مەكەمەدە وتەيدى.
ەسكە سالا كەتسەك، بىلتىر مامىردا قازاقستاننىڭ ب ا ءا- دەگى ەلشىلىكتىڭ كەڭەسشىسى ساكەن ماماش ايەلىنە ۇنەمى كۇش كورسەتكەنى، ءتىپتى جۇبايىنىڭ اپكەسىنە دە قول كوتەرگەنى تۋرالى حابارلاعان ەدىك.
ارتىنشا ايەلىن ۇردى دەپ ايىپتالعان قازاقستاندىق ديپلوماتقا قىلمىستىق ءىس قوزعالدى.
سونداي-اق ەلشى كەڭەسشىسىنىڭ ايەلى كارينا ماماش داعدارىس ورتالىعىنا ورنالاستىرىلدى.
كەيىن ايەلىن ۇرعان ەكس-ديپلوماتقا قاتىستى تاعى ءبىر قىلمىستىق ءىس قوزعالدى.
بيىل 21-مامىردا ايەلىن ۇنەمى ۇرىپ كەلگەن ەكس-ديپلومات ساكەن ماماشتىڭ ءىسى سوتقا جىبەرىلدى.
ال 10-ماۋسىمدا استانادا ەكس-ديپلومات ساكەن ماماشقا قاتىستى سوت وتىرىسى باستالدى.
ايتا كەتەيىك، ەكس-ديپلومات ساكەن ماماشقا قاتىستى سوت وتىرىسى جابىق ءوتتى.