بۇل جونىندە ايگىلى فۋتبولشى ءوزىنىڭ Instagram-داعى پاراقشاسىندا جازدى. وعان قاتىستى اسەرلى بەينەجازبا جاريالادى. وندا ەلدىڭ باستى كومانداسى ساپىندا وتكىزگەن 23 جىلىنا ارنالعان پىكىرىن ءبىلدىرىپ، «پورتۋگاليا ءاردايىم مەنىڭ ءبىر بولىگىم بولىپ قالا بەرەدى» دەپ جازدى.
- ۇلتتىق قۇرامانىڭ جەتىنشى ءنومىرلى جەيدەسىن تاپسىراتىن كۇن جەتتى. مەن ونى ەشقاشان تەك وزىمە تيەسىلى دەپ ەسەپتەگەن ەمەسپىن. ۇلتتىق قۇرامادا ونى 23 جىل بويى كيۋ باقىتى بۇيىردى، الەمنىڭ كوپ ستاديونىندا ەلىمنىڭ نامىسىن قورعاۋ مەن ءۇشىن ۇلكەن مارتەبە مەن جاۋاپكەرشىلىك بولدى، - دەگەن ويىن ءبىلدىردى كريشتيانۋ رونالدۋ.
پورتۋگاليالىق بۇل شەشىمنىڭ وزىنە وڭايعا سوقپاعانىن مويىندادى. شابۋىلشىنىڭ ايتۋىنشا، ۇلتتىق قۇرامادا وتكىزگەن جىلدارى ول گولداردان، رەكوردتاردان جانە تروفەيلەردەن الدەقايدا كوپ نارسە الدى. ونىڭ ەستەلىگندە جانكۇيەرلەر ەرەكشە ورىن الادى، سونىڭ ىشىندە تۋعان جەرىنەن تىس تۇراتىن پورتۋگاليالىقتار دا بار. رونالدۋ فۋتبولدىڭ ءوزى ءۇشىن جاي عانا ويىننان ارتىق بولعانىن، ويتكەنى ول ادامداردى بىرىكتىرەتىنىن اتاپ ءوتتى.
كريشتيانۋ رونالدۋ دۋش سانتۋش اۆەيرۋ 1985 -جىلى 5-اقپاندا پورتۋگاليانىڭ مادەيرا ارالىنداعى فۋنشال قالاسىندا دۇنيەگە كەلگەن.
رونالدۋ كاسىبي مانسابىن پورتۋگاليانىڭ «سپورتينگ» كلۋبىندا باستادى. 2002-2003 -جىلدارداعى جارقىن ويىنىنان كەيىن ونى انگليانىڭ «مانچەستەر يۋنايتەد» كلۋبى شاقىردى. مانچەستەردە ول الەمدىك دەڭگەيدەگى جۇلدىزعا اينالىپ، العاشقى «التىن دوبىن» جەڭىپ الدى.
2009 -جىلى رونالدۋ يسپانيانىڭ «رەال مادريد» كلۋبىنا اۋىسىپ، توعىز ماۋسىم بويى كوماندانىڭ باستى كوشباسشىسى بولدى. مادريدتىك كەزەڭدە ول ءتورت رەت چەمپيوندار ليگاسىن جەڭىپ، كلۋب تاريحىنداعى ەڭ كوپ گول سوققان فۋتبولشى اتاندى.
كەيىن پورتۋگاليالىق شابۋىلشى يتاليانىڭ «يۋۆەنتۋس» كلۋبىندا ويىن كورسەتتى. ال 2021 -جىلى «مانچەستەر يۋنايتەدكە» ورالدى. 2023 -جىلدان بەرى ول ساۋد ارابياسىنىڭ «ال-ناسر» كلۋبىنىڭ نامىسىن قورعاپ كەلەدى.
پورتۋگاليا قۇراماسى ساپىندا رونالدۋ 2003 -جىلدان بەرى وينايدى. ول 200 دەن استام ماتچتا 130 دەن استام گول سوعىپ، الەمدىك رەكورد ورناتتى. قۇرامامەن بىرگە 2016 -جىلعى ەۋروپا چەمپيونى جانە 2019 -جىلى ۇلتتار ليگاسىنىڭ جەڭىمپازى اتاندى.
رونالدۋ - بەس دۇركىن «التىن دوپ» يەگەرى، بەس دۇركىن چەمپيوندار ليگاسىنىڭ جەڭىمپازى بولدى. وعان قوسا الەمدىك جۇلدىز - فۋتبول تاريحىنداعى ەڭ كوپ گول سوققان ويىنشىلاردىڭ ءبىرى.
ايتا كەتسەك، پورتۋگاليا فۋتبول فەدەراتسياسى «التىن دوپتىڭ» بەس دۇركىن يەگەرى كريشتيانۋ رونالدۋدى ۇلتتىق قۇراما ساپىنان ۋاقىتشا شەتتەتۋ تۋرالى شەشىم قابىلدادى. بۇعان فۋتبولشىنىڭ كوماندادان ءوز بەتىنشە كەتۋى سەبەپ بولعان.
رونالدۋدىڭ قۇرامادان كەتۋىنە پورتۋگاليا قۇراماسىنىڭ باس باپكەرى جورجە جەزۋشپەن اراداعى جانجال سەبەپ بولعان.
ەسكە سالايىق، بۇدان بۇرىن ارگەنتينا قۇراماسىنىڭ كاپيتانى ليونەل مەسسي 39 جاسىندا ۇلتتىق قۇرامادان كەتەتىنىن مالىمدەدى.
https://kaz.inform.kz/news/krishtianu-ronaldu-ulttik-kuramadan-shettetld-fbd227f2/