ۋكراينانىڭ قازاقستانداعى بۇرىنعى ەلشىسىنە ىزدەۋ جاريالاندى

ماسكەۋ. KAZINFORM - ماسكەۋ سوتى ۋكراينانىڭ قازاقستانداعى بۇرىنعى توتەنشە جانە وكىلەتتى ەلشىسى پەتر ۆرۋبليەۆسكيدى وشپەندىلىك تۋعىزاتىن ءسوزى ءۇشىن قوزعالعان قىلمىستىق ءىس اياسىندا سىرتتاي قاماۋعا الۋعا رۇقسات بەردى، دەپ حابارلايدى ت ا س س.

اگەنتتىكتىڭ ناقتىلاۋىنشا، ۋكراينالىق ديپلوماتقا فەدەرالدى جانە حالىقارالىق ىزدەۋ جاريالانعان.

«الدىن الا تەرگەۋ ورگانى ر ف قىلمىستىق كودەكسىنىڭ 282-بابى 2-بولىگىنىڭ «ا» تارماعىندا كوزدەلگەن قىلمىستى جاسادى دەپ سىرتتاي ايىپتالعان پەتر يۋريەۆيچ ۆرۋبليەۆسكيگە قاتىستى قىلمىستىق ءىستى تەرگەۋ اياسىندا (وشپەندىلىك تۋدىرۋ نەمەسە ارازدىق، سونداي-اق ادامدىق قادىر-قاسيەتىن قورلاۋ) ۋكراين ديپلوماتىن فەدەرالدىق، سودان كەيىن حالىقارالىق ىزدەۋگە بەرۋ تۋرالى قاۋلى شىعاردى. بۇدان باسقا، ماسكەۋ سوتى ۋكراينا ازاماتى ۆرۋبليەۆسكيگە ر ف اۋماعىنا ەكستراديتسيالانعان كەزدەن باستاپ نەمەسە ايىپتالۋشىنى ر ف اۋماعىندا ۇستاۋ ساتىنەن كەيىنگى كەزەڭدى ەسەپتەي وتىرىپ، ەكى اي مەرزىمگە قاماۋعا الۋ تۇرىندەگى بۇلتارتپاۋ شاراسىن تاڭداۋ تۋرالى تەرگەۋدىڭ ءوتىنىشىن قاناعاتتاندىردى»، - دەدى اگەنتتىككە سوتتاعى اقپارات كوزى.

ۋكراينانىڭ ەكس-ەلشىسىن سىرتتاي قاماۋعا الۋ تۋرالى شەشىم قابىلداعان ماسكەۋدىڭ باسمان سوتىنىڭ دەرەكتەر بازاسىندا كورسەتىلگەندەي، ءتيىستى شەشىمگە شاعىم ءالى تۇسكەن جوق.

ر ف قىلمىستىق كودەكسىنىڭ بۇل بابىنىڭ سانكسياسى التى جىلعا دەيىن باس بوستاندىعىنان ايىرۋ جازاسىن كوزدەيدى.

اۆتور

زارينا تۋعانبايەۆا