كۋرچاتوۆ قالاسىندا شەتەلدەن كوشىپ كەلگەن قانداس مەكتەپتە تابىستى ەڭبەك ەتىپ ءجۇر

اباي وبلىسىنىڭ كۋرچاتوۆ قالاسىندا قانداستارىمىزدىڭ قاتارى كوبەيىپ كەلەدى. ولار شاعىن شاھاردا ءارتۇرلى سالادا جەمىستى ەڭبەك ەتىپ ءجۇر. سولاردىڭ ءبىرى جاس مۇعالىم ايبولات ورازحان، دەپ حابارلايدى قازاقپارات.

2010 - جىلى قىتايدان وتباسىمەن بىرگە اتامەكەنىنە ورالعان ايبولات ورازحان كۋرچاتوۆتاعى №1 ورتا مەكتەپتە جۇمىس ىستەيدى. جاس مامان 5 جىلدان بەرى وسى ءبىلىم ورداسىندا قازاق ءتىلى مەن ادەبيەتى پانىنەن ساباق بەرەدى.

فاريدا اباي، 5 - سىنىپ وقۋشىسى:

- ءبىز قازىر حالىق اۋىز ادەبيەتى تۋرالى ءوتىپ جاتىرمىز. مۇعالىم بىزگە كوبىنەسە ماقال- ماتەل، ەرتەگىلەردى جاتتاپ، وقۋعا بەرەدى. مۇعالىم وتە جاقسى تۇسىندىرەدى. ءبارى تۇسىنىكتى. بۇكىل سىنىبىمىزعا ۇنايدى ساباعى.

ايبولات ۇنەمى ىزدەنىس ۇستىندە جۇرەدى. بىلىكتىلىكتى ارتتىرۋ كۋرستارىنا ءجيى قاتىسادى. ونىڭ تاربيەلەگەن شاكىرتتەرى ءبىلىم سايىستارىنان جۇلدەسىز قايتقان ەمەس.

ايدا قۇسايىنوۆا، 11- سىنىپ وقۋشىسى:

- مەن 2021-2022 وقۋ جىلىندا قانيپا بىتىبايەۆا اتىنداعى رەسپۋبليكالىق وليمپيادانىڭ وبلىستىق كەزەڭى مەن رەسپۋبليكالىق كەزەڭىنە بارىپ، ەكىنشى جانە ءۇشىنشى ورىندى يەلەندىم. ايبولات مۇعالىم مەنىڭ قازاق ءتىلى، ادەبيەتىنە دەگەن ماحاباتىمدى اشىپ، سول پانگە دەگەن سۇيىسپەنشىلىگىمدى وياتا بىلگەن جان بولىپ تابىلادى.

ايگەرىم سماعۇلوۆا، كۋرچاتوۆ قالالىق №1 جالپى ءبىلىم بەرەتىن مەكتەپتىڭ ديرەكتورى:

- ورازحان ايبولات 2013 -جىلى ءبىزدىڭ مەكتەبىمىزدى بىتىرگەن تۇلەك. سول جىلى شاكارىم اتىنداعى ۋنيۆەرسيتەتكە ءتۇسىپ، قازاق ءتىلى، ادەبيەتى ءپانى مۇعالىمى ماماندىعىن ءبىتىرىپ، مەكتەبىمىزگە قايتا ورالىپ، ساباق بەرىپ جاتىر. بەدەلدى، ابىرويلى، جاس مامانداردىڭ ءبىرى. ساباق بەرۋ ءادىسى، ءتاسىلى وزگەشە. بالالاردى باۋراي بىلەدى. سىنىپ جەتەكشىسى رەتىندە دە اتا- انالاردىڭ الدىندا بەدەلى زور.

ءوزى وقىعان ءبىلىم ورداسىنا قايتا ورالعان جاس مامان بۇگىندە مۇعالىمدەر مەكتەپكە كەلۋگە اسىعاتىنىن جاسىرمايدى. ويتكەنى، قازىر پەداگوگتەردىڭ مارتەبەسى بيىك، جالاقىسى جىلدان جىلعا ءوسىپ كەلەدى.

ايبولات ورازحان، قازاق ءتىلى مەن ادەبيەتى ءپانىنىڭ مۇعالىمى:

- تەك عانا جالاقىنىڭ كوپتىگى ەمەس، سوعان ساي اتقاراتىن قىزمەتىمىز دە كۇننەن كۇنگە قارىشتاپ دامىپ كەلە جاتىر. ونىڭ ۇستىنە بۇرىنعىداي ەمەس، ينتەرنەت دامىعاننان كەيىن ءاربىر مۇعالىم ينتەرنەتتە جۇمىس جاساي ءبىلۋ كەرەك. بۇرىنعى ينفورماتيكا مۇعالىمدەرى سياقتى ءاربىر ءپان مۇعالىمى ءوزىنىڭ پانىنە بايلانىستى ينتەرنەتتىك جەلىلەردى جاقسى پايدالانىپ، ساباق بەرۋى كەرەك.

ايبولات ورازحان ساباق تىس ۋاقىتتا دا شاكىرتتەرىنە كوڭىل بولەدى. اقىندارمەن كەزدەسۋگە قاتىستىرادى، ولاردىڭ ءسوز سويلەۋ شەبەرلىگىن شىڭداۋ ءۇشىن دەباتقا دايىندايدى. «مۇنىڭ ءبارى وقۋشىنىڭ جان جاقتى ءارى ءبىلىم كوكجيەگىنىڭ كەڭ بولۋى ءۇشىن قاجەت» دەيدى ول.

اباي وبلىسىنان ازامات قاسىم، بەرىك جوبالاي ۇلى

www.24.kz