كۇنىنە كەمىندە 10 مىڭ قادام جاساۋ كەرەك - عالىم
استانا. قازاقپارات - استانا مەديتسينا ۋنيۆەرسيتەتىنىڭ اكادەميك ە. د. دالەنوۆ اتىنداعى پروفيلاكتيكالىق مەديتسينا ع ز ي جەتەكشى عىلىمي قىزمەتكەرى جاننا نۇربەرگەن سالاۋاتتى ءومىر سالتى ادام دەنساۋلىعى مەن ءومىر ءسۇرۋ ۇزاقتىعىن انىقتايتىن ماڭىزدى فاكتورلاردىڭ ءبىرى ەكەنىن ايتتى.
سترەسستىڭ جوعارى دەڭگەيىمەن، فيزيكالىق بەلسەندىلىكتىڭ تومەندەۋىمەن، قولايسىز ەكولوگيالىق جاعدايلارمەن جانە زياندى ادەتتەردىڭ تارالۋىمەن سيپاتتالاتىن قازىرگى الەمدە دەنساۋلىقتى ساقتاۋ جانە ءومىر ءسۇرۋ ۇزاقتىعىن ارتتىرۋ ماسەلەسى وزەكتى. سالاۋاتتى ءومىر سالتى - ادامنىڭ دەنساۋلىقتى نىعايتۋعا جانە اۋرۋلاردىڭ الدىن الۋعا باعىتتالعان ادەتتەرى مەن ارەكەتتەرىنىڭ جيىنتىعى، - دەدى مامان.
سالاۋاتتى ءومىر سالتىنىڭ نەگىزگى كومپونەنتتەرىنە مىنالار جاتادى:
• دۇرىس تاماقتانۋ:
قازىرگى زياندى حيمياعا تولى دۇكەن سورەلەرىندەگى ءتاتتى سۋسىندار مەن فاستفۋد زامانى دۇركىرەپ تۇرعاندا دەنساۋلىقتى كۇتۋدىڭ، اۋرۋدى الدىن الۋدىڭ العاشقى باسپالداعى دۇرىس تاماقتانۋدان باستالادى.
اقۋىزداردىڭ، مايلاردىڭ جانە كومىرسۋلاردىڭ، سونداي-اق ۆيتاميندەر مەن ميكروەلەمەنتتەردىڭ كۇندەلىكتى راتسيوندا بولۋى وتە ماڭىزدى.
• تۇراقتى فيزيكالىق بەلسەندىلىك:
كۇنىنە كەمىندە 30 مينۋت سپورتپەن اينالىسىپ جاتتىعۋ جاساۋ نەمەسە كەمىندە 10000 قادام جاساۋ كەرەك.
• جامان ادەتتەردەن باس تارتۋ:
تەمەكى شەگۋدەن، الكوگولدى ىشۋدەن جانە ەسىرتكىنى قولدانۋدان باس تارتۋ.
• كۇن ءتارتىبىن ساقتاۋ:
ۇيقىنىڭ جەتكىلىكتى بولۋىن قامتاماسىز ەتۋ (تاۋلىگىنە 7-8 ساعات) جانە كۇندىزگى ۋاقىتتى ۇتىمدى ءبولۋ. ايتا كەتۋ كەرەك، دۇرىس فيزيولوگيالىق ۇيقى كەشكى 22-دەن تاڭعى 5-كە دەيىن.
• سترەسستىڭ الدىن الۋ، وڭ كوزقاراستى ساقتاۋ جانە جاقسى پسيحو-ەموتسيونالدى جاعدايدى ساقتاۋ قابىلەتى.
كوپتەگەن عىلىمي زەرتتەۋلەر سالاۋاتتى ءومىر سالتى ادام دەنساۋلىعىنىڭ بارلىق اسپەكتىلەرىنە وڭ اسەر ەتەتىنىن دالەلدەيدى. جۇرەك- قانتامىر جۇيەسىنىڭ اۋرۋلارىنىڭ، ينسۋلتتىڭ، قانت ديابەتىنىڭ، قاتەرلى ىسىكتىڭ كەيبىر تۇرلەرىنىڭ جانە باسقا دا سوزىلمالى اۋرۋلاردىڭ دامۋ قاۋپىن ازايتادى. يممۋندىق جۇيەنى نىعايتادى، اعزانىڭ جۇقپالى اۋرۋلارعا توزىمدىلىگىن ارتتىرۋعا كومەكتەسەدى، - دەدى استانا مەديتسينا ۋنيۆەرسيتەتىنىڭ اكادەميك ە. د. دالەنوۆ اتىنداعى پروفيلاكتيكالىق مەديتسينا ع ز ي جەتەكشى عىلىمي قىزمەتكەرى جاننا نۇربەرگەن.
BAQ. KZ